Ezekiel 35

1Te Na'ayenɛ tɔgɛ bo mam yeti, 2Asaala dayɔa wa, dekɛ hɔ nɛŋa tɔ Seir zoore wa, la ho porɛ bahɛ de zuo, 3porɛ yeti, Daana Na'ayenɛ la n yele se'em n wana: Seir zoore wa, mam, Na'ayenɛ zaberɛ me la hɔ, n wan tɛɛn n nu'o zabɛ la hɔ te ho ta lebege daboo. 4N wan gbirige ho teŋkanra la bahɛ te se lebege daboto. Bala te ho wan baŋɛ te mam n de Na'ayenɛ. 5Hom n daa kelom tara won se'ere ha yɛla gura Israeldoma wa, te la daa ta wona ba te ho bahɛ te ba ko ba la, saŋsɛka n da de ba namehegɔ saŋa la te ho daa bahɛ te ba ko ba la so'a la zuo. 6Mam Daana Na'ayenɛ wa, n kɔ'ɔn bɔna wa, N bahɛ te ziim ka'ahegɔ dige ho. Hom daa ka zote ziim ka'ahegɔ la, ziim ka'ahegɔ wan tuluge dige ho. 7N wan bahɛ te Seir Zoore lebege daboo ge ŋma nɛresɛba woo n daa kene ho zen'an na, ge lɛbera la woo bahɛ. 8N wan bahɛ te ba ko ho nɛreba biŋe ho zoore la zuo zo'e zo'e so'a la wan kɔrom ba zo'e gaŋɛ, te basɛba lu ho zɔya la zuto, te sɛba lu bɔn'ɔrɔ poan, te sɛba me lu bɔgɔhe zuto. 9N bahɛ te ho lebege daboo kɔ'ɔn yɛ'ɛha, nɛra ka boe wan sɔe kɛn'ɛra ho teŋhe la poan. Bala te ho baŋɛ te mam n de Na'ayenɛ. 10Hom n yele bo ho mɛŋa yeti, Teŋsena seyi' wa dela tom denɛ, to wa fan' se sɔna la zuo, la mam, Na'ayenɛ wa daa pon bɔna bini la zan'an. 11Bala zuo, Daana Na'ayenɛ la yeti, Mam n kɔ'ɔn bɔna wa, n wan dekɛ sunsun se'a, la nini tɛnrega, la yaarɛ se'ere taaba te ho daa dekɛ doohe teŋhe seyi' poore la me doohe ho, n han gankɛ ho ba'ahɛ n wan nɛɛ n mɛŋa ba poan. 12Bala te ho wan baŋɛ te hom yele potoyɛla se'a bo Israel zɔya la, Na'ayenɛ wom ya. Ho yele bo ho mɛŋa yeti, ba nya dela daboto gan'an wa, ba dekɛ ba bo la yamam te ya sagom ba. 13Hom n daa ŋmɛ'ɛre ho nyɔn'ɔn la, ge tɔgɔra ho yetɔgɔyooro la te dabeem ka tara ho la, ho daa tɔgɔre la mam, n me daa wom ya. 14Daana Na'ayenɛ la n yele se'em n wana: Teŋa woo poorɛ han pee te ba yeena ge n wan bahɛ te hom lebege daboo. 15Se'ere n sɔe saŋsɛka te Israel teŋadoma wa nyɛta sagaŋɔ la, ho poorɛ daa pee me. Mam n yeti, N tee eŋɛ hɔ se'em n bala. Hom Seir zoore wa, la hom Edom teŋa wa zan'an wan lebege daboo. Bala te ba wan baŋɛ te mam n de Na'ayenɛ.

will be added

X\