Ezekiel 34

1Te Na'ayenɛ tɔgɛ bo mam yeti, 2Asaala dayɔa wa, porɛ bahɛ Israel duŋkeema wa zuo, porɛ yele ba yeti, Daana Na'ayenɛ la n yele se'em n wana: Yele boe Israel duŋkeema wa zuo! Se'ere n sɔe la ya yeem behera la ya mɛhe ma'an. Duŋkeema toonɛ dagɛ la ba behera piihe la? 3Yamam ton dita se iilom la, ge tara se konberɔ wogora futo yɛɛra, ge ganhera duŋsonhe la kɔrɔna ɔbera, ge ka beha piihe la. 4Ya ka behere te duŋse'ehe n ka tare paŋa la nyɛ paŋa, bii ya behɛ tebɛ duŋse'ehe n ben'ere la, bii ya bobe duŋse'ehe n pogolom la nɔra. Ya ka kan'ahɛ duŋse'ehe n yeregɛ la lebehe na, bii ya ɛ duŋse'ehe n bɔregɛ la na kɛn'ɛhɛ. Ya yen kɔ'ɔn tanhera se la bora bora ge kɔ'ɔn ete se vegila vegila. 5Bala te se yerom. Se'ere n sɔe la duŋkeena ka boe keena ba, ba me n daa yeregɛ la, ba lebege la dia bo mɔen dunhe la n boe mɔen ha la. 6Mam piihe la kɔ'ɔn yeregɛ ɛɛra la bora bora zoore wa zuo, la kuŋkune woo zuo. Ba kɔ'ɔn yeregɛ me ɛɛra sai teŋa wa zuo te se'em ka bɔna ɛɛra ba. 7Bala zuo la, yamam sɛba n de duŋkeema wa, wom ya Na'ayenɛ la n yeti ya se'ere wa. 8Mam, Daana Na'ayenɛ n vɔe wa, mam piihe wa n ka tare duŋkeena ge yeregɛ teŋa wa zuo, yare lebege dia bo mɔen dunhe wa zuo, la mam duŋkeendoma wa n ka eere mam piihe la ge kɔ'ɔn yee ba mɛhe behega ma'an la zuo, 9Yamam duŋkeendoma wa, wom ya Na'ayenɛ la n yeti se'em. 10Daana Na'ayenɛ la n yeti se'em n wana: Mam zaberɛ me la yamam duŋkeendoma wa, n wan gin' ya n piihe wa zuo. N wan dige duŋkeendoma wa te ya da le behera n piihe wa, la ya nyaŋɛ beha ya mɛhe, N wan fan' n piihe la duŋkeendoma wa nɔyan bahɛ, te ba da dekɛ mam piihe la lebege ba dia. 11Daana Na'ayenɛ la n yele se'em n wana: Mam mɛŋa wan ɛ lagahɛ n piihe la, la n behera se. 12Wo duŋkeena piihe n ne bɔregɛ te a ɛ ta nyɛ se nya ne lagahe se gura se se'em la, bala mea te mam mɛŋa wa gura n piihe wa. N wan ɛ zen'se'ehe woo te piihe wa daa yerom saŋgbana la lika daarɛ la, la n tare ba lagahe na. 13N wan tare se ze'ele teŋse'ehe woo te se bɔna la yehe na, la n tare se lebe se mɛŋa teŋa poan na. N wan pe'e se zom Israel zɔya la zuo ta gu'ura se bilam te se ɔbera, la bɔn'ɔrɔ la poan, la yia la kenkɛlehe zan'an poan te se ɔbera. 14N wan gu'ura se dɔla yaam soma zen'an te se ɔbera Israel zɔya la zuto woo wan dɛna se ɔbega zen'an. Bilam, te se nya ne wan obe tegɛ ge kaahom yaam man'aha poan vɔ'ɔha, ge ɔbera yaam soma Israel zɔya la zuto. 15Daana Na'ayenɛ la yeti, Mam mɛŋa n wan behɛ n piihe wa, te se ne obe tegɛ ge gan'an vɔ'ɔha. 16N wan ɛ pese'ehe n bɔregɛ la, la pi se'ehe n yelege se ma'an tare se lebe na. N wan pɔnbɛ pi se'ehe n pɔgɔlom la nɔra, ge behɛ te pi se'ehe n ka kpe'em la me nyɛ paŋa, ge n wan sagom se'ehe n pon kanregɛ ge tara paŋa la bahɛ. N wan keena n piihe wa me la sosonɛ poan. 17Daana Na'ayenɛ la n yele se'em n wana: Han dɛna mam piihe wa bii, n wan gankera ya teŋasoka n wan gankera piihe la boohe teŋasoka. 18Yan obere yaam soma wa ka seke bo ya? Bala yamam me sontii yaam soma se'a n gee la, ya dekɛ ya na'ma nɛɛra feta? Yan nyuure ko'soma wa ka seke bo ya? Bala yamam me sontii ya dekɛ ya na'ma nɛ ko'om la gbiirom bo te bo lebege dɛngerɔ? 19Mam piihe la sontio ba obe yaam se'a te ya nɛ la ya na'ma fere la, ge nyuura ko sebo te ya dekɛ ya na'ma gbiirom bo te bo lebege dɛngerɔ la? 20Bala zuo la Daana Na'ayenɛ la n yele ba se'em n wana: Mam mɛŋa wan gankɛ piihe kanra la, la piihe baanlehe la teŋasoka. 21Yamam n tare loga la bɔgɔrɔ zan'ara piihe baanlehe la, ge tara ya iila ŋmɛ'ɛra ba, nya sa'ahɛ se bahɛ la, 22mam mɛŋa wan fan' n piihe la bahɛ te se'em ka bɔna wan fan' se le yɛ'ɛha. N wan gankera piihe se woo teŋasoka. 23N wan bo duŋkeena ayena te a beha se zan'an, mam duŋkeena David n wan beha se, enŋa n wan dena duŋkeena beha piihe wa. 24Mam n de Na'ayenɛ, ge te David dɛna nabia bɔna ba teŋasoka, Mam se'em n de Na'ayenɛ la n yele. 25N wan biŋe sunma'ahom nɔbiŋere la ba, ge sa'ahɛ mɔen dunhe la woo n boe teŋa la poan la bahɛ te ba keŋɛ ta bɔna pɔgɔtia teŋa poan ha, ge te piihe la bɔna daana ba. 26N wan kan' kan'somɔ bahɛ ba zuo, la zen'se'ehe n lɛm n zɔya la. N wan bahɛ te saahe niira se nia saŋa, ge te kan'somɔ ka'ahɛ bahɛ ba zuo na wo saa ko'om la. 27Tiihe se'ehe woo n boe ba samana zuto wan sɔna di'soŋa, ge te sɛla woo te ba bota samanɛ zuo la me wan dita di'soŋa, nɛreba la wan bɔna teŋa la poan fai te sɛsɛla ka daana ba. N han ta kɔ' yɔgɔhɔga la bahɛ, ge fan' ba nɛresɛba n dekɛ ba lebege da'aba la nu'uhen bahɛ ba'ahɛ ba nya wan baŋɛ te mam n de Na'ayenɛ. 28Teŋa ka le bɔna wan fan' ba, bii mɔen dunhe saai ba obe. Ba wan bɔna fai te se'em ka bɔna wa bahɛ te ba paleŋa ɛngera. 29N wan bo ba teŋsɛka n maale dia te ba kan le vibera la kom, bii teŋhe le tara ba kɛɛta. 30Bala te ba wan baŋɛ te mam se'em n de ba Na'ayenɛ la boe me la ba, Israeldoma wa dela mam nɛreba. Daana Na'ayenɛ la n yele. 31N piihe wa, pi se'ehe n obere mam yaama wa dela nɛresaaleba, mam n de ya Na'ayenɛ. Daana Na'ayenɛ la n yele.

will be added

X\