Ezekiel 33

1Te Na'ayenɛ tɔgɛ bo mam yeti, 2Asaala dayɔa wa tɔgɛ bo ho taaba wa te hom la bama yehe teŋyeŋa na wa yeti, Mam han zɛnkɛ so'a zabera la teŋa, te teŋa la nɛreba han loe ba teŋa la bɔraa kayema te kaŋa dɛna ba gura, 3te a ta nyɛ te diŋdaana la maahom kena na, te a peebe tentanɛ la bo a teŋa la nɛreba la te ba mina te diŋdaana la kene na, 4te se'em me han bɔna teŋa la poan wom tentanɛ la peebego la, ge ka maahom a mɛŋa, te la wa'ana ko en, a taala dulum dole a mɛŋa. 5Enŋa n wom tentanɛ la peebego ge ka maahom a mɛŋa la zuo a dulum la dole la a mɛŋa. N wom ne tentanɛ la peebego la, a han maahom ne a mɛŋa a ta'an fan' ne a mɛŋa bahɛ. 6Ge gura la han nyɛ te diŋdaana la kene na, ge ka peebe tentanɛ la te a bahɛ te nɛreba baŋɛ te diŋdaana la kene na, ge te diŋdaana la wa'ana ko teŋa la nɛra ayena me, nɛra la be'em zuo te a ki, ge n wan soke gura la nɛra la ziim yele. 7Asaala dayɔa wa, mina te mam dekɛ hɔ te ho dɛna la Israel teŋa wa gura bala zuo la, kɛleha mam yetɔgom, ge la ho tɔ'ɔha mam ninmɔ'ɔrɛ kan'aŋɔ bɔ'ɔra ba. 8Mam han ya'ɛ n nɔɔrɛ wa yele potɔya yeti, Hom potɔya wa, ho wan ki' te hom ka tɔgɛ bo potɔya la, a wan ki a be'em la zuo, ge mam wan gin' la hom, soke ho nɛra la ziim yele. 9Ge ho han kan'am potɔya la la ninmɔ'ɔrɛ te a bahɛ a sose'ere te a dɔla la, te a zagahɛ, a wan ki a be'em la zuo, ge hom wan fan' ho mɛŋa bahɛ. 10Asaala dayɔa wa, yele Israeldoma wa yeti, Yamam yeti, Te tuure la, la te be'em la nya tare to yɛ'a la teŋa, te yeti to mɛlom mɛ n bala. Te yeti to eŋɛ la wane vo'e? 11Yele ba yeti, Daana Na'ayenɛ yeti, mam n vɔe wa, mam poorɛ ka pee la yelebe'erodaana kum. Mam bote la ba ton ŋmɛregɛ ba mɛŋa yehe ba be'em la poan na la ba vɔna. Ŋmɛrege ya! Ŋmɛrege ya ya mɛhe ya be'em la poan yehe na la ya vɔna! Bene n sɔe te Israeldoma wa, ya bɔta te ya ki yoo? 12Bala, asaala dayɔa wa, yele ho taaba sɛba te hom la bama ze'ele teŋyeŋa poan na wan yeti, Nɛre tontɔɔ la han zagahɛ, a tontɔɔtooma la kan ta'an fan' en bahɛ, ge potɔya la me han ŋmɛregɛ a toonbe'ero la poan yehe na, a pototoonse'a te a pon tom la kan ta'an sagom en. Tontɔɔdaana la me han ta tom be'em ba kan yeti en pon tabelɛ tom toonsoma la zuo, a vɔna. 13Mam han yele nɛre tontɔɔdaana yeti, Ho wan vɔna, te a nya kɔ'ɔn dekɛ a mea delom a tontɔɔtooma la, ge nya ŋmɛregɛ tom be'em, ba pon kan tɛnra a tontɔɔtooma la la deyena me, a wan ki a toonbe'o la zuo. 14N me han le yele potɔya yeti, Ho wan ki, te enŋa me wom bala ge ŋmɛregɛ a mea yehe a toonbe'ero la poan, nya tona sɛla n de yelemɛŋɛrɛ, la sɛla n ane soŋa, 15A han lebehe yɔ sɛla woo te a daa to'e ge biŋe nɔɔrɛ te a wan lebehe yɔ, ge lebehe degehɛ sɛla woo te a daa zun tare lebe ta bo la doma, ge dɔla malema se'a n bo'ore vom la, ge ka le tona be'em, la dela pɛnregerɛ te a wan vɔna. 16Ba kan kelom tɛnra toonbe'ero seto woo te a pon ton la la koyena me tare dɔla en. A tom la sɛla n de yelemɛŋɛrɛ, la tontɔɔ a wan ba'ahom vɔna. 17Ge la bala zan'an, ho teŋa nɛreba wa yeti, Daana en ete a yɛla se'em la dagɛ ma'an. Ge la dagɛ bala, bama sore la n ton dagana ma'an. 18Nɛre tontɔɔ han bahɛ a tontɔɔ bɔŋa la, ge ŋmɛregɛ tona be'em, a wan ki a be'em la zuo. 19Nɛre potɔya me ha ŋmɛregɛ a mea yehe a toonbe'ero la poan, ge tona sɛla n de tontɔɔ, la yelemɛŋɛrɛ a kɔ'ɔn yeti a vɔna me la eŋɛ la tone se'em la zuo. 20Ge la bala zan'an, yamam Israeldoma wa yeti, Na'ayenɛ n ete a yɛla se'em la dagɛ ma'an. Ge mam gankere nɛra woo dɔla la a tooma n ane se'em. 21Teŋloŋere la poan yuum pia la ayi' la poan ŋmarehe pia la dabeha anuu darɛ te boraa kayema ze'ele Yerusalem teŋa poan zɔ peɛn wa'ana mam zen'an na yele mam yeti, Teŋa la luya! 22Zanɔɔrɛ denɛ mea poan, se'em ma'an te boraa la nan pon ka paɛ na la, te Na'ayenɛ nu'o daa pon paga mam zuo me te mam ya'ɛ n nɔɔrɛ, ge te la nya dekɛ yɛ'a bolika te boraa la paɛ na. Bala zuo la, mam nɔɔrɛ daa ya'ɛ la bala te mam ka tana wan sina le yɛ'ɛha. 23Te Na'ayenɛ tɔgɛ bo mam yeti, 24Asaala dayɔa wa, nɛresɛba n kɛn'ɛre zen'an te ba gbi gbi bahɛ Israel teŋa la poan la yeti, Abraham yuun dela ayena ma'an ge sɔna teŋa wa. Ge tomam n zo'e se'em wa, la dela yelemɛŋɛrɛ, ba dekɛ teŋa wa bo to me ka dela to sɔ'ɔlom. 25Yele ba yeti, Daana Na'ayenɛ la n yele se'em n wana: Yamam n obere nɛnɔ te ziim bɔna bini la, ge gɔra beha ya mɛhe baga ka'aha ziim yɛɛla a la, ya wan nyaŋɛ kelom sɔna teŋa la? 26Yamam dekɛ ya mɛhe delom la ya so'ahe, ge te nɛra woo tona toonfɛn'ɛha se'a te a bɔta, te ya zan'an sagona taaba pɔgɔba, bala ya wan kelom sɔna teŋa la? 27Yele ba yeti ya, Daana Na'ayenɛ la n yele se'em n wana: Na'ayenɛ wa n kɔ'ɔn bɔna wa, sɛba n pon yee kɛn'ɛra dangoongbi'ihe wa poan wa, so'a wan kɔrom ba zan'an bahɛ. Sɛba me n zɔ sogɛ teŋa la poan la, n wan bahɛ te mɔen dunhe obe ba. Sɛba me sogɛ zen'kanra, la tanhe yogoro poan la, n wan bahɛ te too ko ba bini. 28N wan bahɛ te teŋa la lebege daboo, a pa'ale mea la, la a paŋa la ba'ahegɔ beene n bala, Israel teŋa zɔya la wan lebege zaŋa, te nɛra pon kan nɛ ba zuo tole zen'an. 29N han bahɛ te ba teŋa la lebege daboo la doohe la ba toonbe'ero la zuo, ba wan baŋɛ te mam n de Na'ayenɛ. 30Ge han dɛna hom, asaala dayɔa, ho nɛresɛba n ze'ele teŋyeŋa na la ba yiya zanɔya wa tɔgɔra ho yele yɛta te, Wa'an ya na la ya wom yelese'a te to Na'ayenɛ tɔgɔra. 31Ba ne lagahɛ me wa'an ho zen'an kɛleha yetɔgom la, ge ba ka tare bo tona. Ba tare la ba nɔya po'oha, ge ba sunya kɔ'ɔn yigira me te ba tom toonse'a n ka ane soŋa. 32Ba behere ho te ho dɛna la baam baana tana baana te ho konkore ana soŋa ge. Se'ere n sɔe la ba wan wom ho yetɔgom la soŋa soŋa, ge ba ka tare bo tona. 33Yele ana wa han ta wa'ana tole, a me seren wan wa'ana tole, ba wan baŋɛ te mam nɔtɔgɔha boe ba teŋasoka.

will be added

X\