Ezekiel 31

1Yuum pia la deyema la poan ŋmarehe setan' pɔhega daarɛ, te Na'ayenɛ tɔgɛ bo mam yeti, 2Asaala dayɔa wa, yele Mizraim teŋa naba Faro, la a nɛreba la yeti, Ane n boe te a paŋa zona la hom Mizraim teŋa wa? 3Asiria ane me wo mɔlɔsomɔ tia n bɔna Lebanon teŋa poan, te a yila ana soŋa ge kanregɛ wɔgɛ pin'ira tiihe la n boe mɔen la. Enŋa n wɔgɛ gana te sɛka woo n boe mɔɔ la poan. 4Ko'om n sekere en ge te ko kanra bɔ'ɔra en ko'om te a wɔgɔra. Kolehe n zote uura en, ge uura tiihe la woo n boe mɔen la poan la me tilain. 5Bala te a kɔ'ɔn wɔgɔra zɔna ha gana tiihe la woo n boe mɔen la poan la ge te a tile la malom karigira pa'aha, te a yila me wɔgɔra, ge yagena pa'aha. Se'ere n sɔe la ko'om n sekere en. 6Te teŋa wa zuo niihe wa'ana tɛ' tegero a zuo, ge te teŋa wa dunhe me kena a teŋa dɔgɔra a teŋa. Teŋkanra wa woo kene zin'ita la enŋa ma'ahom la teŋa. 7Ka dela tikantɛ n ane soŋa ge tare yila. Se'ere n sɔe la a yega la sige la teŋa keŋɛ sige lɛm kole kanra la ko'om la. 8Mɔlɔsomɔ tiihe se'ehe woo n boe Na'ayenɛ va'am la poan la ta' nyuuna la en, bii peelesomɔ tiihe se'ehe woo n yehe zɛ'a bini la zona la en. Tia ka boe Na'ayenɛ va'am la poan te ka soŋa yɛ'a tikana wa zen'an na. 9Mam maalɛ ka me te ka ana soŋa, ge tara yila te a zo'e, tikana wa ma'an n ane soŋa gana tiihe la woo n boe Na'ayenɛ va'am la poan la, ge bo en yila zo'e zo'e, tikana wa ma'an n daa de tia sɛka n ane soŋa Na'ayenɛ va'am la poan gana tiihe la woo. 10Bala zuo la, Daana Na'ayenɛ la yeti, Tia wa n wogɛ zom saazuo, te ka sɛla woo wogɛ gana tiihe la woo n boe va'am la poan la zuo, la kan tare pa'ale mea la ka woko la zuo, 11te mam dekɛ ka eŋɛ teŋa wa zuo naba nu'uhen te a dekɛ a potɔɔ la dogɛ en. Mam yehe ka bahɛ mɛ, 12te teŋa wa zuo nɛrebe'ero me ŋma' ka bahɛ teŋa yoo. 13Teŋa wa zuo niihe woo yagete la tia sɛka n lu gan'an ka teŋa, te mɔen dunhe la woo wan yaga ka zuo. 14Bala zuo la, tia kan le bona zɛ'a lɛm kolega te n bahɛ te ka wɔgɛ zom saazuo ha gana giihe la zan'an. Tia han pon le bɔna lɛm la ko'om la se'em me, n kan bahɛ te ka le wɔgɛ bala, se zan'an woo nya boe la kum nu'uhe teŋa wa zuo, bama la nɛresaaleba, zan'an wan sige ta paɛ sɛba woo n pon ki la. 15Daana Na'ayenɛ la n yele se'em n wana: Daanse'ere daarɛ te a ki la, te ba tare en wa'an yɔɔen na la, mam pin kolehe la me la kɛlega, bɔ'ɔra en ki la. Mam gu' bɔgɔhe se'ehe woo n zote kɛn'ɛra mɔgɔkantɛ la poan la, ge gu' ko'kantɛ la mɛŋa, enŋa zuo te mam bahɛ te lika pin Lebanon teŋa la kika, ge te tiihe la woo n boe mɔen la poan la ku'e sooɛ bahɛ yoo. 16Se'em ma'an te n daa yeti n bahɛ te a wa'ana paɛ ke'ema a yɔɔ poan la, n daa zan'ɛ en bahɛ me ta a lu dame wurigam, te a dameŋa la ɛnkɛ nɛreba paleŋa. Ge te tiihe se'ehe woo n da boe va'am la poan la Lebanon teŋa ti sonhe la zan'an la tiihe se'ehe woo n daa nyuure ko'om tegera la, daa doohe sige la teŋa teŋa ha. 17Sɛba woo me n daa boe a ma'ahom la poan la, la teŋse'ehe woo me n daa dekɛ ba mɛhe delom ka la, la sɛba woo te so'a pon kɔrom ba la zan'an daa doohe la tia wa sige la yɔɔ la poan. 18Tiihe kane buuri n boe Eden va'am la poan wan ta'an dekɛ ka mɛŋa makɛ la hom soŋa la kpe'eŋo poan. Ge la bala me, hom me wan ba'ahom sige la teŋa la tiihe se'ehe woo n boe Eden va'am la poan la. Ho wan sige ta gan'an la nɛre zanhe la sɛba te so'a pon kɔrom ba la. Ena daana dela Faro la a nɛreba zan'an. Daana Na'ayenɛ la n yele.

will be added

X\