Ezekiel 30

1Te Na'ayenɛ tɔgɛ bo mam yeti, 2Asaala dayɔa wa, porɛ yeti, Daana Na'ayenɛ la n yele se'em n wana: Kaaha yɛta yeti, Dabaherɛ la! Dabaherɛ la! 3Dabaherɛ la pɔnre, Na'ayenɛ dabaherɛ la pɔnrɛ. Lika dabaherɛ la pɔnre, teŋhe sagaŋɔ saŋa la pɔnre. 4So'a wan wa'ana zabɛ la Mizraim teŋa, ge te sunsagaŋɔ me sige Kus teŋa poan. Ba han ta kɔrom Mizraim teŋa nɛreba wa biŋe ba'ahɛ, ba wan zi a tatelom la zan'an tare keŋɛ, ge wɔnrɛ teŋa la bahɛ. 5Kus la Put la Lidia la Arabia la Libya teŋhe zan'an la nɛresɛba n kɛn'ɛre nɔbiŋere teŋa la poan la zan'an so'a wan kɔrom ba ta ta' la Mizraim teŋa. 6Na'ayenɛ n yele se'em n wana: Mizraim teŋa pɛɛntɛɛnreba la zan'an wan lu pɛɛnbɔn'en la, Mizraim pa'alɛ mea la wan di vi. So'a wan kɔrom ba bala ze'ele Migdol teŋa, ta paɛ Siene teŋa. Daana Na'ayenɛ la yele. 7Ba wan lebege daboo, bɔna teŋse'ehe n pon dɛna daboto poan, ba teŋkanra la wan lebege daboto bɔna teŋse'ehe n pon nyɛ sagaŋɔ poan. 8Bala te ba wan baŋɛ te mam n de Na'ayenɛ, ba han ta nyɛ te n mɔ'ɛ bugum laŋɛ Mizraim teŋa, ge sagom sɛba woo te Mizraim teŋa dekɛ a mɛŋa delom ba te ba soŋɛ en la. 9Daanden daarɛ, n wan tom n tontona te ba kɛn' ɔɔnrɔnɔ keŋɛ ta vuuhe Kus teŋa te ka man'ɛn la ka nyɔyɔm la. Sunsagaŋɔ ma'an n wan ko ba Mizraim teŋa sagaŋɔ daarɛ la, la dela sɛla n seren wan ba'ahom eŋɛ. 10Daana Na'ayenɛ n yele se'em n wana: N wan bo Babilon teŋa Naba Nebukadnezar nu'o paŋa, te a gu Mizraim teŋa n sogore lɔgɔseto a poan la. 11Naba kana wa la ka teŋa pɛɛntɛɛnreba la n ba' dɛna potɔpa doma teŋa wa zuo, bama n wan wa'ana sagom teŋa la. Ba wan fɔ ba so'ahe, zabɛ la Mizraim teŋa wa, kɔrom nɛreba teŋa la poan zen'an woo te ba gan'an zen'an woo. 12N wan bahɛ te Nile la ku'e ge te n dekɛ teŋa la me koohe bo toonbe'erodoma. N wan bo saama nu'uhe paŋa, te ba bahɛ te Mizraim teŋa wa la sɛla woo n boe ka poan bahɛ yoo. Mam Na'ayenɛ yele bala. 13Daana Na'ayenɛ la n yele se'em n wana: N wan sagom baga la, ge gu baga se'a me n boe Mempis teŋa poan la me. Nabia kan le bɔna Mizraim teŋa poan n me wan bahɛ te dabeem sige teŋa la zuo na. 14N wan bahɛ te Patros teŋa lebege daboo ge nyɔn' Zoan teŋa la bugum, ge kɛn'ɛhɛ Tebes teŋa me la too. 15N wan ka'ɛ n sunsunyiim bahɛ Sin teŋa zuo na, teŋsɛka te Mizraim teŋa dekɛ ka mɛŋa delom ba la, ge me ŋma' Tebes teŋa lɔgɔrɔ la te ba sogɛ la me bahɛ. 16N wan laŋɛ Mizraim teŋa la bugum. Sunsagaŋɔ ma'an n wan perɛ Sin teŋa. Sɛla wan sagom Tebes teŋa. Ge Mempis teŋa wan nyɛ daaŋo daare woo. 17So'a n wan kɔrom On la Pi Beset teŋa bora paalehe la zan'an, ge te ba fan' ba teŋkanra la sɔe sɔna. 18N han ta kɔ Mizraim teŋa paŋa la, a pa'ale mea la, la a paŋa la kan le bɔna, dabeha aŋa ta yeti a dɛna la paleŋ'ɛnka dabeha bo Tapanhes teŋa. Dabeem ma'an n yeti la pin en, ge te ba fan' a teŋkanra la sɔe sɔna se. 19Mam yeti n dekɛ too kɛn'ɛhɛ Mizraim teŋa se'em n bala. Bala te ba wan baŋɛ te mam n seren de Na'ayenɛ. 20Yuum pia la deyema pɔhega ŋmarega dabeha ayopɔe daarɛ, te Na'ayenɛ tɔgɛ bo mam yeti, 21Asaala dayɔa wa, Mam kɔ' Mizraim teŋa naba Faro nu'o mɛ. Ba ka pɔnbɛ kɔ bii ba bobe ko te ko naɛ wan ta'an gin' so'a zabɛ. 22Bala zuo la, Daana Na'ayenɛ la n yele se'em n wana: Mam zaberɛ me la Mizraim teŋa naba Faro wa. N wan kɔ' a nu'uhe la zan'an, n wan kɔ a nu'soŋɔ la, la a nu'o seko n pon kɔ la zan'an. 23N wan yeregɛ Mizraim teŋa nɛreba wa, bahɛ teŋhe poan. 24N wan bo Babilon teŋa naba wa paŋa, te n dekɛ so'a zanle a nu'uhen, ge kɔ Mizraim teŋa naba Faro nu'uhe, te a mɛla woo baa la Babilon teŋa naba wa nɛŋan. 25N wan bo Babilon teŋa naba wa paŋa, ge kɔ Mizraim teŋa naba Faro nu'uhe. Bala te ba wan baŋɛ te mam n de Na'ayenɛ. N han dekɛ n so'a la zanlɛ Babilon teŋa naba wa nu'uhen, te a zɛnkɛ ka tɔgelɛ Mizraim teŋa wa. 26N wan yeregɛ Mizraim teŋa nɛreba wa bahɛ saama teŋhe la teŋhe woo. Bala te ba wan baŋɛ te mam n de Na'ayenɛ.

will be added

X\