Ezekiel 3

1A yele mam yeti, Asaala dayɔa wa, obe sɛla te ho nyɛta wa, obe ganɛ la, ge la ho keŋɛ ta tɔgɛ bo Israeldoma wa. 2Te mam ya'ɛ n nɔɔrɛ te a bo mam ganɛ la te n obe. 3A yele mam yeti, Asaala dayɔa wa, obe ganɛ seko te n dekɛ bo ho wa perɛ ho poorɛ. Te mam obe ganɛ la te ko zan'anhom wo seerom lam mam nɔɔrɛn. 4A yele mam yeti, Asaala dayɔa wa, keŋɛ Israeldoma wa zen'an, la ho nya ta tɔgɛ mam yetɔgom wa bo ba. 5N ka tone ho nɛresɛba yetɔgom n tɔe, bii nɛresɛba n de geto zen'an, ge n tone ho la Israeldoma la. 6Ba dagɛ nɛresɛba te ba yetɔgom tɔna te ho kan wom ba zen'an. N han tom ne ho la teŋkaŋa doma zen'an, bama wan kelehe ne hɔ. 7Ge Israeldoma wa ka bote te ba kelehe ho, ba pon ka kɛleha mam mɛŋa la zuo. Se'ere n sɔe la Israeldoma la zan'an sunya n ba kaanbɛ gaŋɛ. 8Ge n me eŋɛ ho mɛ te ho me dɛna sunkanberɛ daana wo ban, ane se'em la. 9N wan bahɛ te ho gbe'ere wa ku'e wo taŋa n ko'e se'em la, n bahɛ te ho ku'e gana dayɔa. Da zɔta dabeem la ba bii ho paleŋa ɛngera la ba, la ban poan dɛna pobiregadoma la zuo. 10A me yele mam yeti, Asaala dayɔa wa, kɛleha mam soŋa soŋa, ge dekɛ yelese'a te n tɔgɔra bo'ora ho wa eŋɛ ho suunre poan. 11Keŋɛ ho teŋa nɛreba sɛba n lagom zɔ loŋe teŋa wa na la zen'an nananawa, la ho ta tɔgɛ yetɔgom bo ba, ge ba han kelehe bii ba han kan le kelehe, yele ba yeti, Daana Na'ayenɛ la n yele se'em n wana. 12Te Sea la daa zɛnkɛ mam, ge te mam wom te koŋkokantɛ yoone mam pooren ha tii, Pɛnka paara Na'ayenɛ soŋa la n boe zen'an la! 13Bondoma la kelompagehe n daa ŋmɛ'ɛre taaba la, la yiile me n daa boe ba sakpeko woo poan zɔta dɔla ba la, daa voole la voole kantɛ. 14Sea la nya daa zɛnkɛ mam saazuo, tare mam keŋɛ. Te mam yɛre daa yɛ'a la sunsagaŋɔ la sunsunyiim n sea poan, ge te Na'ayenɛ nu'o paŋa la paga n zuo. 15Mam daa wa'ana paɛ n taaba n zɔ loŋe teŋa na bɔna la Tel Abib teŋa la n lɛm Kebar Kolaa la zen'an. Bilam me te ba daa kɛn'ɛra, te mam zin'ire la ba dabeha ayopɔe la sunsagaŋɔ. 16Dabeha ayopɔe la ba'ahegɔ daarɛ te Na'ayenɛ yetɔgom daa wa'an mam zen'an tii, 17Asaala dayɔa wa, mam eŋɛ hɔ te ho dɛna la teŋa wa gura. Kelehe yetɔgom sebo te mam wan tɔgɛ bo ho, la ho dekɛ kan'am ba bo ma. 18Mam han yele potɔya yeti, Ho wan ki', ge te hom ka nyaŋɛ tɔgɛ kan'am en te yehe a pototooma la poan la a fan' a vom bahɛ, potɔya la seren wan ki a be'em la poan, ge a taala wan dɔla la hom. 19Ge ho han tɔgɛ kan'am potɔya la, ge te a ka bahɛ potɔɔ la, bii a ka ŋmɛregɛ a mɛŋa yehe a be'emtooma la poan, a wan seren ki a be'em la poan, ge te hom nyɛ faanrɛ. 20Tontɔɔdaana han ta bahɛ a tontɔɔ bɔŋa la, ge ŋmɛregɛ bɔna be'em poan, te mam dekɛ sɛla beŋe en bahɛ, a wan ki. Hom ka kan'am la zuo, a wan ki a be'em la poan. N kan le tɛnra toonsoma se'a te a tom la ge a taala me wan dɔla la hom. 21Le yɛ'ɛha, ho han te'ele kan'am tontɔɔdaana la te a da tom be'em, te a se'ere sakɛ ka tom be'em la, a wan vɔna. Se'ere zuo, a wom kan'aŋɔ la, ge te hom me fan' ho mɛŋa me bahɛ. 22Na'ayenɛ nu'o daa page n zuo bilam me, a daa yele mam yeti, Ihege la ho yehe sige bɔn'en ha te a ta yele ho se'ere bilam ha. 23Te mam daa ihege sige bɔn'en ha, bilam te a daa ta nyɛ te Na'ayenɛ soŋa nɛɛ zɛ'a bilam wɔna la a soŋa sɛka te n daa zɛ'a lɛm Kebar Kolaa la zen'an ge nyɛ la, te n lu aliko. 24Te Sea la wa'ana nyɔkɛ mam te mam ihege ze'ele n na'ma zuo, ge tɔgɛ bo mam yeti, Keŋɛ la ho kule, ta kɛn' bɔ'en la ho yu' ho mɛŋa bahɛ ho bɔ'ɔ la poan. 25Ge hom, asaala dayɔa wa, ba wan ta nyɔkɛ hɔ, lo la mi'inhe te ho da nyaŋɛ dɔla la ho nɛreba ɛɛra. 26N me wan bahɛ te ho zɛleŋa tabɛ la ho nɔɔrɛ te ho da ta'an tɔgɛ la ba, la ban pon dɛna pobiregadoma la zan'an. 27Ge mam ne han tɔgɛ sɛla bo ho te ho dekɛ yele ba, n ne wan ya'ɛ ho nɔɔrɛ la te ho ta'an tɔgɛ bo ba yeti, Daana Na'ayenɛ la n yele se'em n wana. Se'em woo n zagahɛ, bahɛ en te a zagahɛ. Se'ere n sɔe la ba pon dɛna la pobiregadoma.

will be added

X\