Ezekiel 29

1Yuum pia poan, ka ŋmarehe pia poan dabeha pia la ayi' daarɛ, te Na'ayenɛ tɔgɛ bo mam yeti, 2Asaala dayɔa wa, ŋmɛregɛ ho nɛŋa tɔ Mizraim naba Faro, la ho porɛ bahɛ teŋa la la ka naba la zuo, 3Tɔgɛ bo naba la yeti, Daana Na'ayenɛ la n yele se'em n wana: Mam Na'ayenɛ n zaberɛ me la hom Mizraim teŋa naba wa. Ho dela bon sɛla gan'an kolega la poan ge ton ŋmɛ'ɛra nyɔn'ɔn te Nile dela hom mɛŋa kolega te ho gaaɛ bo ho mɛŋa. 4Ge n wan dekɛ zim baŋa tuhe ho nɔɔrɛn ge bahɛ te zim se'e woo n boe ho kolehe la poan la go hɔ. N wan ve'e hom, la zim se'e woo n go' ho la kolega la woo poan bahɛ doone na. 5N wan tare hom la zim se'e woo n boe ho kolehe la poan la ta bahɛ pɔgɔtia teŋa poan. N wan ka'ɛ ya bahɛ te ya gan'an bala ka sogɛ, ho kan malom nyɛ kan'ahegɔ bii ba gin' te ho ihege saazuo. Ho wan lebege dia bo ya dunhe la niihe n ɛngere saazuo. 6Bala te sɛba woo n kɛn'ɛre Mizraim teŋa poan wan baŋɛ te mam n de Na'ayenɛ. Ho dela mɔŋmategɔ bo Israel nɛreba wa. 7Ba han ne ta pigehe pigehe gin' ho, ho ne yirige mɛ ŋma ba bɔgɔrɔ tole. Ba han ne le dekɛ ba mɛhe delom ho, ho ne mina me ge bahɛ ba te ba lu damɛ ba sehe. 8Bala zuo la, Daana Na'ayenɛ la n yele se'em n wana: N wan bahɛ te so'a zabɛ la ho, te ka kɔrom ho nɛreba la ba dunhe zan'an bahɛ. 9Mizraim teŋa wa wan lebege daboo. Bala te ba wan baŋɛ te mam n de Na'ayenɛ. En yeti Nile la dela hom mɛŋa bonɔ te hom mɛŋa tun bo ho mɛŋa la zuo. 10Bala zuo, mam zaberɛ me la ho mɛŋa la kole se'ehe woo n boe ho teŋa la sɔ'ɔlom poan la. N wan bahɛ te Mizraim teŋa wa lebege daboo ze'ele Migdol teŋa ta paɛ Siene teŋa ta paɛ Kus teŋa beene la. 11Nɛra bii duŋa na'arɛ pon kan doohe bini tole, nɛra kan kɛn' ka poan gura yuum pihinaahe. 12N wan bahɛ te Mizraim teŋa wa lebege daboo pa'ahɛ teŋse'ehe n nyɛ namehegɔ la poan. A teŋkanra la wan lebege daboto pa'ahɛ teŋse'ehe n nyɛ namehegɔ la poan gan'an bala gura yuum pihinaahe. N wan yeregɛ Mizraim teŋa nɛreba wa te ba zɔ lomehe teŋhe sese'ehe poan ta kɛn'ɛra. 13Daana Na'ayenɛ la n kelom yele se'em n wana: Bala zan'an yuum pihinaahe la ha ta wa'ana tole, n wan kelom lagahɛ Mizraim nɛreba wa ban yeregɛ bɔna teŋse'ehe woo poan la, lebe na. 14N wan tare ba da'aba la poan yehe na, te ba lebe zin'ire ba sɔyaabdoma teŋa la n de Patros la. Bilam te ba nya wan lebege teŋbila. 15Teŋkaŋa n wan ta dɛna teŋbila teŋhe woo poan, kan le tana pa'ala ba mɛhe. N wan kɔ'ɔhɛ ka giinla gaŋɛ te ka kan le ta'an sɔna teŋhe behera. 16Mizraim teŋa wa kan le dɛna teŋsɛka te Israel teŋa nɛreba dekɛ ba mɛhe delom. Ka ton wan dɛna la teŋsɛka n tɛɛhere ba ba toonbe'o doohe la ban yuun ŋmɛregɛ lebe ka poan ta ɛɛra soŋorɛ la. Bala te ba wan baŋɛ te mam n de Daana Na'ayenɛ. 17Yuum pihiyi' la ayopɔe la poan ŋmarega kayena pɔhega daarɛ, te Na'ayenɛ tɔgɛ bo mam yeti, 18Asaala dayɔa wa, Babilon teŋa Naba Nebukadnezar n vaɛ a pɛɛntɛɛnreba saa Tire teŋa, te nɛreba zuto fige, te bɔgɔrɔ aanhom. Ge la bala zan'an, enŋa la a pɛɛntɛɛnreba la ka to'e yɔɔrɛ la ban zabɛ la Tire teŋa wa. 19Daana Na'ayenɛ la n kelom yele se'em n wana: Bala zuo la n wan dekɛ Mizraim teŋa eŋɛ Babilon teŋa Naba Nebukadnezar nu'uhen, te a zi ba lɔgɔrɔ la zan'an yehe. A wan fan' teŋa la, ge zi ka lɔgɔrɔ la zan'an yehe te la dɛna a yɔɔrɛ bo a pɛɛntɛɛnreba la. 20Mam dekere la Mizraim teŋa wa bɔ'ɔra en, en daa tom se'em la yɔɔrɛ. Se'ere n sɔ'e la enŋa daa tom bo la mam. Daana Na'ayenɛ la yele. 21De daarɛ, n wan bo Israel teŋa wa paŋa, ge ya'ɛ hom me nɔɔrɛ te ho tɔgɛ. Bala te ba wan baŋɛ te mam n de Na'ayenɛ.

will be added

X\