Ezekiel 28

1Te Na'ayenɛ tɔgɛ bo mam yeti, 2Asaala dayɔa wa, yele Tire teŋa naba wa yeti, Daana Na'ayenɛ la n yele se'em n wana: Ho pa'alɛ ho mɛŋa gaŋɛ, nya tɛn'ɛhɛ yele ho sure poan ha te ho dela yenɛ, hom zin' la yenɛ koka zuo, ko'omen. Ge mam, Na'ayenɛ bote te ho baŋɛ te ho dela nɛresaala, ho dagɛ yenɛ, ho behere ho mɛŋa te ho yam zo'e me wo Na'ayenɛ yam la. 3Hom tare yam gana Daniel mɛ? Sɛba ka boe soŋɛ te hom wa ka mina? 4Ho dekɛ la ho yam la ho bɔkerɛ va sanlema la sanlenpeelega perɛ ho banya. 5Hom n min koohego la zuo te ho tarega la malom pa'ahera, ho tarega la me n pa'ahere la zuo te pa'ale n mea kɛn' ho suunre poan. 6Bala zuo la, Daana Na'ayenɛ la n yele se'em n wana: Hom n tɛn'ɛhere te ho tare la yam wo yenɛ yam la zuo. 7Se'ere n sɔe n bahɛ te saama n wa'ana zabɛ la hɔ, nɛresɛba n ba' dɛna potɔpa teŋa wa woo buuri poan la. Ba wan fɔ ba so'ahe zabɛ la ho soŋa sɛka, la ho yam sebo te ho tara la ba wan sagom ho soŋa la zan'an bahɛ. 8Ba wan kpilom ho na bahɛ boko poan, ba wan dekɛ ho bahɛ ko'om la teŋa teŋa ha te ho tɛnbɛ ta ki ha. 9Ba han ta koora hɔ, ho wan le ze'ele sɛba n koore ho la nɛŋan yeti, mam dela yenɛ? Sɛba n ta yeti ba gin' ho kɔrɔgɛ la, ho ta dɛna la nɛresaala ba ninin, ge dagɛ te ho wan ta dɛna la yenɛ. 10Saama wan gin' ho kɔrɔgɛ ho wo nɛre zaŋa la. Mam Daana Na'ayenɛ yele se'em n bala. 11Te Na'ayenɛ tɔgɛ bo mam yeti, 12Asaala dayɔa wa, dekɛ fabelegɔ la ho fabelɛ bo Tire teŋa naba wa yeti, Daana Na'ayenɛ la n yele se'em n wana: Ho daa dela sɛla n ane soŋa, perɛ la yam la soŋa. 13Ho daa ze' la Eden va'am la n de Na'ayenɛ va'am la. Sanlenkuga la woo daa boe la hom: mɔlebagenɛ la mɔlɔdɔɔnrɔ la beheŋa la peele la ponpɔnrɔsabelega la am la poonhogɔ la dɛnlemadɛntɔ la zenzengemɔlɔgɔ. Ho yiya zan'an daa dela sanlema. Ho dɔgom daarɛ la, te lɔgɔtona wa woo yuun pon maahom mɛ gan'an ge gura hɔ. 14Mam yuun sɔ' ho me te ho dɛna kelompagehedaana se'ehe n behere Na'ayenɛ lɔgɔrɔ la. Ho yuun boe la Na'ayenɛ zoore la zuo, kena bugum kuga la zuo. 15Ban yuun maalɛ ho la, ho yuun ka tare dɛnkɔ te ko lama hɔ, han dagana saŋsɛka te be'em wa kɛn' ho wa ma'an. 16Koohe kantɛ n boe ho poan la zuo, te ho gbita gbiri gbiri nya tom be'em wa. Bala zuo te mam dige hom, kelompagehedaana n beha Na'ayenɛ lɔgɔrɔ, te n sa'ɛ ho n bugum kuga wa poan bahɛ wa. 17Pa'alom n mea ma'an n perɛ ho poan, la hom n ane soŋa la zuo, ge le sagom ho potɛn'ɛrɛ la ho soŋa la. Bala zuo te mam dekɛ ho lobe bahɛ teŋa wa poan. Mam eŋɛ ho te ho dɛna la sɔkɔ nadoma woo nɛŋan. 18Ho dekɛ la toonbe'ero, la piŋa lɔgɔrɔ ganlom ho toolom zen'enhe la. Bala zuo te mam bahɛ te bugum ze'ele saazuo lu ho zuo na, te bo di ho te ho lebege tampegelom gan'an te nɛresɛba woo n daa behere ho la nini daa nyɛ ho yanɛ. 19Teŋse'ehe woo n daa min ho la yare behera ho la yɛle, ho kɔ'ɔn lu la lu kantɛ pon kan le ta'an ihege. 20Na'ayenɛ tɔgɛ bo mam yeti, 21Asaala dayɔa wa, ŋmɛregɛ ho nɛŋa tɔ Sidon teŋa wa, la ho porɛ bahɛ ka zuo, 22yeti, Daana Na'ayenɛ la n yele se'em n wana: Mam zaberɛ me la ho Sidon teŋa wa, n yu'urɛ me wan nyɛ pɛnka ho poan. N han dekɛ namehegɔ kɛn'ɛhɛ ho, ge nɛɛ n ma'an bɔŋa la ho poan, ba wan baŋɛ te mam n seren de Na'ayenɛ. 23N wan bahɛ te mɛlehegɔ sige ho zuo na, ge te ziim ka'ahɛ ho sɔya la zuo, zɔta wo ko'om la. So'a sɛka n zaberɛ la ho la wan kɔrom nɛreba ho poan zen'an woo bahɛ te ba lu gan'an vɛnrema. Ba nya wan baŋɛ te mam n de Na'ayenɛ. 24Israel nɛreba kan le tara nɛresɛba n ka bote ba yele, bii nɛresɛba n de gɔn'an lota ba, bii nɛresɛba n de genra konrina ba. Bala te ba wan baŋɛ te mam n de Daana Na'ayenɛ. 25Daana Na'ayenɛ la n yele se'em n wana: N han ta gan'ahɛ Israel nɛreba la n yeregɛ bɔna teŋse'ehe woo poan la lagahɛ na, n wan nɛɛ n ma'an bɔŋa la bo ba te teŋhe woo nyɛ. Ba wan bɔna ba mɛŋa teŋa la te mam yuun dekɛ bo n tontona Yakob la poan. 26Ba wan bɔna ka poan te sɛla kan daam ba, ba wan mɛ yiya, ge kɔ vatɔ. N han dekɛ mɛlehegɔ kɛn'ɛhɛ nɛresɛba woo n daa daane ba la poan ba'ahɛ, Israel nɛreba wa nya wan bɔna la iŋma'ahom te sɛla ka bɔna wan daam ba. Bala te ba wan baŋɛ te mam n de ba Na'ayenɛ ba Yenɛ la.

will be added

X\