Ezekiel 27

1Na'ayenɛ tɔgɛ bo mam yeti, 2Asaala dayɔa wa, fabelɛ bo Tire teŋa wa: 3Yele Tire teŋa wa n boe mɔgɔrɛ nɔɔrɛn te teŋse'ehe woo n boe ko'om nɔɔrɛn kena a poan kɔɔhera la yeti, Daana Na'ayenɛ la n yele se'em n wana: Hom Tire teŋa wa ŋmɛ'ɛre la ho nyɔn'ɔn te ho ane la soŋa. 4Hom n daa sɔe ko'om wa zuo zan'an beha. Ge te ho mɛteba me mɛ ho te ho ana soŋa. 5Ho dɔɔ peelesomɔ woo ze'ele la Senir teŋa poan na. Ge te ba dekɛ Lebanon teŋa mɔlɔsomɔ tia maalɛ dɔɔseto sɛ ho teŋa la kae. 6Ge ba dekɛ tikantɛ dɔɔrɔ ze'ele Basan teŋa poan na maalɛ dɔɔseto te ba tara mɔna ɔɔnrɔŋɔ la. Ge ba tare dɔɔsonɔ maalɛ ho zenzagehe, dekɛ wɔbɔgɔ nyɛna ze'ele Kitim teŋa na maalɛ de zuo. 7Ge ba dekɛ tan soma se'a n ze'ele Mizraim teŋa poan na, te ba kpa' soŋa soŋa la, yule ho ɔɔnrɔnɔ la zan'an. Ge te ho le dekɛ tan aŋa mea lu yule te ba dɛna ho danlehom. Ge tan mɔle mɛŋka la tan mɔlɔgɔ n ze'ele Elisa teŋa poan na pagelɛ dɔɔrɔ la zuo. 8Sidon teŋa la Arvad teŋa boraahe n daa mɔne bo ɔɔnrɔnɔ. Boraahe n tare yam tona hom Tire teŋa wa ko'om tooma bɔ'ɔra hɔ. 9Gebal keendoma sɛba n min ɔɔnrɔŋɔ tooma tona ho ɔɔnrɔŋɔ tooma bɔ'ɔra hɔ. Nɛreba ne perɛ me la ɔɔnrɔnɔ me'en me'en kena ho poan na kɔɔha. 10Persia la Lidia la Put teŋhe bom kpɛ'ɛma la daa boe la hom nu'uhen dɛna ho pɛɛntɛɛnreba. Ba zaba sapiba la ba zaba lɔgɔrɔ zan'an ne vugehe yagelɛ la hom Tire teŋa wa dangɔɔma poan. Bɔ'ɔra ho soŋa te la ka tara makerɛ. 11Arvad la Helek teŋhe bora kpɛ'ɛma n da ze'ele kae ho diŋdoma, ge te Gamad teŋa bora kpɛ'ɛma me zom ho de wogoro la zuo ta yaga ge limiha ho diŋdoma. Ba zaba lɔgɔrɔ zan'an ne yɛɛhe yagelɛ la hom dangɔɔma poan. Bama n bahɛ te ho soŋa la ba' nɛɛ. 12Hom n tare lɔgɔsonɔ zo'e la zuo te Tarsis teŋa nɛreba dita da'a ho zen'an la. Ba ne tare la sanlenpeelega la kuto la kurumaana wa'ana tɛɛhena la ho lɔgɔrɔ la. 13Yavan la Tubal teŋa la Mesek teŋa me lagom kena la hom poan dit da'a. Ba me ne tare la da'aba la lɔgɔrɔ la nyɔgom wa'ana tɛɛhena ho lɔgɔrɔ la. 14Ge te Bet Togarma teŋa boraahe ne tare yiri se'e n tone la yiri se'e n min zabega la yiribonhe wa'ana tɛɛhena ho lɔgɔrɔ la. 15Dedan teŋa nɛreba la nɛresɛba n boe ko'om nɔɔrɛn n de ho da' ken'ereba. Ba ne tare la wɔbegɔ nyɛna la dɔsɔbɔlɔ na tɛɛhena ho lɔgɔrɔ la. 16Ho lɔgɔkanra la zuo te Aram teŋa kena ho zen'an na kɔɔha. Ba me ne tare la kuga dɛnlemadɛntɔ la la tama te ba dekɛ guno mɔlɔ wogɛ tɔ la tama te ba kpa' tɔ zuo soŋa la tana se'a te ba dekɛ guno peelega wogɛ la kuga mɔlebagenɛ la lɔgɔrɔ yema yema na tɛɛhena ho lɔgɔrɔ la. 17Yuda teŋa la Israel teŋa nɛreba me kene la hom poan dita da'a. Ba ne tare la ki' la seerom la kaam sebo n sonre iŋa kena na tɛɛhena ho lɔgɔrɔ la. 18Hom n tare lɔgɔsoma zo'e la zuo te Damaskus teŋa kena dita da'a ho poan. Ba ne tare la Helbon daam la Zahar konberɔ na tɛɛhena ho lɔgɔrɔ la. 19Uzal teŋhe Vedan la Yavan me ne tare la kuto la zaaŋa la kinkanya wa'ana tɛɛhena ho lɔgɔrɔ la. 20Dedan teŋa dita da'a la ho la ba ne tare la tankpɛ'ɛma na tɛɛhena ho lɔrɔgɔ la. 21Arabia la Kedar tehe nabiihe la zan'an daa dela hom da' diteba, bama daa ne tare la pebibihe la pesa'ara la boohe kena na tɛɛhena ho lɔgɔrɔ la. 22Sheba la Araama teŋhe da diteba la me daa kene la hom zen'an na dita da'a, ba ne tara nyɛga la salenkuga la sanlema kena na tɛɛhena ho lɔgɔrɔ la. 23Haran la Kane la Eden teŋa nɛreba, la Sheba la Assur la Kilmad teŋa koohedoma la zan'an kene la hom zen'an dita da'a la hɔ. 24Bama ne tare la futo n ane soŋa la tam te ba dekɛ gunsɔbele wɔgɛ tɔ la sonponpɔntɔ n ane soŋa te ba pan'am guno soŋa tuhe a poan. 25Tarsis teŋa ɔɔnrɔnɔ n daa ziire ho lɔgɔrɔ mea. Ho perɛ me la zeero ko'om mea poan. 26Nɛresɛba n mɔne ho ɔɔnrɔnɔ mɔm zoohe ko'mi'inhe la mɛ. Ge sabeeo wan ze'ele dapɔya bɔba wana wɔnregɛ ho bahɛ te ho muhe ko'om la poan ha sige teŋa teŋa. 27Ho lɔgɔrɔ la ho koohego la ho koohego lɔgɔrɔ la nɛresɛba n yakere la nɛresɛba n behere ɔɔnrɔnɔ la ho da' diteba la ho pɛɛntɛɛnreba la sɛba woo n boe ɔɔnrɔnɔ zuo ko'om la poan la zan'an wan muhe sige ko'om la poan teŋa teŋa ha, daanse'ere daarɛ te ko'om la wan damɛ la. 28Ko'om la nɔgbenɛ wan miim, sɛba n behere ho ɔɔnrɔnɔ la wan kaahɛ. 29Se'em woo n zanle dɔɔ mɔna ɔɔnrɔŋɔ, wan zɔ ge bahɛ ɔɔnrɔŋɔ la sɛba woo n boe ko'om la poan yakera na la sɛba woo n tone ko'om poan tooma la wan zɛ'a doone na. 30Ba wan zɛnkɛ ba konkɔya saazuo kaahɛ bahɛ ho zuo. Ba wan va tentɔnɔ yeele ba mɛŋa, ge gan'arɛ tampegelom poan bilom. 31Ba wan siie ba zuto hom zuo, ge yɛ sunsagaŋɔ futo. Ba wan kele te ba nini mɔ'ɛ hom zuo. 32Ban voole, ge kaaha ho zuo la, ba wan fabelɛ ho zuo me. Ba wan fabela yeti, Zen'kaŋa daa boe la bɛ, te ko'om kae ka bahɛ teŋasoka te ka ana baanlam wo Tire taŋa wa? 33Ho lɔgɔrɔ ne han zom ko'om wa zuo, ho ne bahɛ te teŋa woo tegɛ me teŋa wa zuo nakanreba wa woo gba' la hom lɔgɔsonɔ wa poan. 34Nananawa, hom n bala n muhe ko'omen wa, la ho lɔgɔrɔ la, la zen'se'ehe woo n daa maale ho lɔgɔrɔ la, la zen'se'ehe woo n daa maale ho lɔgɔrɔ la, ya zan'an lagom muhe mɛ ta paɛ ko'om la teŋa. 35Sɛba woo n kɛn'ɛre ko'om nɔgbɛma poan la suunre sagom me la hɔ, dabeem n kɛn' ba nadoma, te ba zuto sura teŋa. 36Da'ditiba n boe teŋhe woo poan giinla kɔ'ɔhe me la hɔ. Ho lebege la dabeem lɔkɔ, ho kan le malom bɔna la fiin me.

will be added

X\