Ezekiel 24

1Yuuma awae' la poan, ŋmarehe pia poan dabeha pia daarɛ, te Na'ayenɛ tɔgɛ bo mam yeti, 2Asaala dayɔa wa, golehɛ zina dabaherɛ biŋe la ho tɛnra dɛ. Se'ere n sɔe la, zina dabaherɛ wa te Babilon teŋa naba wa'ana gan'arɛ kae Yerusalem te a zabɛ la ka. 3Makɛ makerɛ bo pobirega teŋadoma wa yeti, Daana Na'ayenɛ la n yele se'em n wana: Dekɛ ya dokɔ la dogelɛ, dekɛ ya dokɔ la dogelɛ, la ya ka'ɛ ko'om eŋɛ ko poan. 4Dekɛ ya nɛndaahe la eŋɛ ko poan bɔgɔrɔ la gbɛya la eŋɛ bini. Bahɛ ya te nɛnɔ sonɔ tona wa perɛ dokɔ la. 5Ganhɛ ya piihe se'ehe n ane soŋa la ge la ya ɛ dɔɔrɔ gbi'ile dokɔ la fehegan, te la kɔrɛ, te konba la bi'e. 6Daana Na'ayenɛ la n yele se'em n wana: Yele boe teŋsɛka n ka'ahe ziim wa zuo! Yele boe dokɔ wa n doge bugum poan wa zuo! Sɛla te a biŋe la, kan malom bɔregɛ loohɛ nɛnɔ la koyena koyena ta ba'ahɛ. Da zɛ'a te ho loohe to la narehom, hom n paɛ nɛŋɔ seko woo ho loe. 7Se'ere zuo la, teŋa wa n ka'ahɛ ziim sebo la gan me la en. A ka'ahɛ ziim la bahɛ la teŋpɔgɔtia zuo, a ka ka'ahɛ bo bahɛ tentɔnɔ poan te tentɔnɔ la pin bo. 8Mam bote tii n gbirige n sunsunya la en la, ge la n lerege en la zuo, n ka'ɛ a ziim la me bahɛ la teŋa zuo, te sɛla ka bɔna wan pin bo. 9Bala zuo, Daana Na'ayenɛ la n yele se'em n wana: Yele boe teŋsɛka n ka'ahe ziim wa zuo! Mam me wan tiihom dɔɔrɔ ho teŋa. 10Tiiho dɔɔrɔ la a teŋa la ho mɔ'ɛ bugum eŋɛ bini te dɔɔrɔ la taɛ te ho dogɛ nɛnɔ la te to bi'e soŋa. Ka'ahɛ nyɛga sɛba te ba tara lagom dogera la eŋɛ bini, ge la ho kɛ' konba la woo. 11La ho nan dekɛ dokɔ la dogelɛ, la ho bahɛ te ko tulugɛ ta mɔ'ɛ, bɔta te ko nyɛlegɛ bahɛ woo n boe ka poan la nyɛlegɛ bahɛ yoo. 12Ko ba' sagom la yɛla zo'e zo'e, bugum pon ka nyaŋɛ kaanbɛ sɛla n tabɛ ko poan la bahɛ bii nɛresaala konrehɛ. 13Ho dɛngerɔ tooma la nya lebege la yelekantɛ bo ho. Se'ere n sɔe la, mam ne zegera ti n duuhe ho, ho dɛngerɔ tooma la poan bahɛ te ho zagahɛ mɛ. Ho pon kan le malom nyɛ duuhego la, han dagana mam n ka'ɛ sunsun se'a bahɛ ho zuo na wa n ta man'ɛn. 14Mam, Na'ayenɛ n yele. Saŋa la paɛ ya tii n tom. N kan bahɛ. N kan zɔ ninbɔn'ɔn bii n tee n potɛn'ɛrɛ. Ho wan nyɛ gankerɛ wo ho etegɔ la te ho eta se'em la. Daana Na'ayenɛ la n yele. 15Na'ayenɛ tɔgɛ bo mam yeti, 16Asaala dayɔa wa, n yeti n ŋmɛ ho sure nɔŋerɛ pɔga wa la boyena tare keŋɛ. Ge la han eŋɛ bala, da fabelɛ, bii ho kele nintam ka zuo, 17Unha digi digi, da kɛla kum. Kɔ'ɔn kelom vuge ho zuo tanɛ la bala, ge la ho pire ho tagara, da dekɛ sɛla pin ho nɔɔrɛ bɔba, bii ho di koorɛ dia. 18Te mam da tɔgɛ bo nɛreba la bolika, te la yɛ'a zanɔɔrɛ, te mam pɔga la ki. Yiimbeere bolika la, mam daa doohe la nɔse'ere n daa pon dekɛ bo mam la. 19Bala te nɛreba la nya soke mam yeti, Ho kan pa'alɛ tɔ yele ana wa vɔnrɛ? 20Te mam yele ba yeti, Na'ayenɛ tɔgɛ bo mam mɛ yeti, 21Yele Israeldoma wa yeti, Daana Na'ayenɛ la n yele se'em n wana: N boe bini te n sagom mam toolom zen'an n de paŋa zen'an te ya tara ŋmɛ'ɛra ya nyɔn'ɔn la zen'sɛka te ya nini tegɛ la ka la, zen'sɛka te ya sea kɛn' la ka la. So'a wan kɔrom ya dayɔɔhe la ya pɔyɔɔhe se'ehe woo te ya bahɛ pooren la. 22Ya me wan ta eŋɛ wo mam n eŋɛ se'em wa. Ya kan ta dekɛ tanɛ pin ya nɔɔrɛ bɔba, bii ya di pɔkɔtɔ dia wo mam n ka di se'em wa. 23Ya wan kelom vuga tama se'a n vuge ya zutin wa, ge kelom pire ya tagara. Ya kan ta ta'an fabelɛ, bii ya kele, ge ya yeti ya ta mɛlom mɛ, la ya toonbe'ero la zuo, ge unhura ya ma'an pooren ha. 24Ezekiel dela makerɛ bo ya, ya wan ta eŋɛ wo enŋa n eŋɛ se'em wa. Wana wa han ta wa'ana eŋɛ, ya wan baŋɛ ti mam n de Na'ayenɛ. 25Ge hom, asaala dayɔa wa, daanse'ere daarɛ te n wan to'e ba paŋa zen'an la, ba popeelom, ba soŋa zen'an la, zen'sɛka te ba nini tegɛ la ka la, ge to'e ba dayɔɔhe la ba pɔyɔɔhe la sɛba te ba suunre kɛn' la, 26de daarɛ la, nɛra wan peɛn zɔ wa'ana yele ho sɛla n ete la. 27Enŋadaana han ta wa'ana yele ho ba'ahɛ, ho nɔɔrɛ wa nya wan ta'an ya'ɛ, te ho tɔgɛ la en, te gɔɔrɛ la bahɛ hɔ. Bala ho yeti ho dɛna la makerɛ bo Israeldoma, te ba baŋɛ te mam n de Na'ayenɛ.

will be added

X\