Ezekiel 23

1Na'ayenɛ tɔgɛ bo mam yeti, 2Asaala dayɔa wa, pɔgɔhe seyi' n boe, dɛna pɔgɔyeŋa kɔma. 3Te ba yuun lebege yiyɛɛhe Mizraim teŋa poan, ba yuun pɔhɛ ba yiyɛɛnɛ la la ba bonbilomen ha. Teŋkaŋa poan te ba nyɔn'ɔnrɔ yuun pire te ba pɔgɔsa'arɛ la nɛɛ. 4Keema la yu'urɛ dela Ohola, ge te be'a la me yu'urɛ dɛna Oholiba. Ba yuun dela mam kɔma, dɔgɛ bodibinto la pugunto. Ohala dela Samaria teŋa, ge te Oholiba me dɛna Yerusalem teŋa. 5Ohola n daa ta pɔhɛ a yiyɛɛnɛ tooma la, te a nan bo la mam nu'uhen, ge daa kɔ'ɔn dɔla a zabadoma la finfin, a zabadoma la dela Asiria pɛɛntɛɛnreba 6nɛŋadoma la teŋbeheradoma se'em n bagɛ ba mɛhe la lɔgɔsɔbele pɔɔnhegɔ. Ho han nyɛ ba, ba zan'an dela bon sonhe zaŋa yaga yiri zuto. 7Te a dekɛ a mɛŋa lebege yiyɛa bo Asiriadoma wa, nya ganlom a mɛŋa la ba baga la. 8A ka bahɛ a yiyɛɛnɛ se'ere te a pɔhɛ dɛ a bonbilomen Mizraim teŋa poan, te boraahe yuun kiira a zuo kɔ'ɔn tara ba koŋkoma'ahom kena ka'aha baha a zuo la. 9Bala zuo, te mam me dekɛ en eŋɛ a zabadoma la n de Asiria teŋadoma, sɛba te a dɔla ba finfin la nu'uhen. 10Te ba nya segehe en beele, ge fan' a dayɔɔhe, la a pɔyɔɔhe tare keŋɛ, ge kɔrɔgɛ a mɛŋa la so'a. Te a nya lebege tɔgom bonɔ bo pɔgɔhe, te namehegɔ malom sigera a zuo. 11Te a yebega Oholiba nini nyɛ bala, ge me sina ge bɔna a koŋkoma'ahom, la a yiyɛɛnɛ la poan me sige teŋa gana a keema la. 12Enŋa me dole Asiria teŋbeheradoma wa la ba nɛŋadoma la ba pɛɛntɛɛnreba la n yɛ lɔgɔrɔ, yaga yiri zuto, nan dɛna bonbilipaalehe, ana soŋa la poore la bala finfin. 13Mam nyɛ te enŋa me ganlom a mɛŋa la bala mea. Bama bayi' la dela wanɛ la de bɔka. 14Ge enŋa daa zagahɛ me ge kɔ'ɔn tona a yiyɛɛnɛ la, a han nyɛ te ba ŋmɛ bɔrombɔrehe lamenɛ dangoone te ba dɛna boraahe, dɛna Kaldeadoma, te ba dekɛ bon mɔlɔgɔ golɛ ba, 15ge golɛ sɛgana eŋɛ ba sɛɛhe, ge golɛ fuwogorɔ pin' ba zuto te ba zan'an ana wo Babilon teŋa yiri toroto doma sɛba n de Kaldea teŋa nɛra. 16A han ne nyɛ bala, a koŋkoma'ahom n ne bɔna ba poan, te a tona nɛreba te ba keŋɛ Kaldea teŋa poan ta yi a zabɛ doma sɛba n boe bini la na bo en. 17Te Babilon teŋadoma wa me, ne wa'ana gan'arɛ la en. Ba ne han ta ganlom en ba'ahɛ, a nya ne bire la poore bahɛ ba, la balom. 18N nya daa tone a yiyɛɛnɛ wa peelome, peelome la, tara a beele pa'ala yeŋa la, mam daa bire la poore bahɛ en la valom, wo mam n daa bire poore bahɛ a keema la se'em la. 19Ge la bala zan'an a daa tom malom kɛn'ɛra la poan, malom tɛn'ɛha enŋa n yuun ete se'em a bonbilomen Mizraim teŋa poan ha. 20Bilam te a yuun dɔla a zabadoma sɛba n yuun ane wo bonhe la, ge te ba tooma tona wo yiri la poore. 21Bala, te a yuun nɔŋɛ, ge tɛɛha enŋa n yuun pire, ge te a pɔgɔsa'arɛ nɛɛ, te a zabadoma la koŋkoma'ahom yuun bɔna a poan la yɛla. 22Bala zuo la, hom Oholiba, Daana Na'ayenɛ la n yele ho yele se'em n wana: N dekɛ hom, la ho zabadoma la tugule taaba, ho zabadoma sɛba te ho bire poore bo la, la valom la, n wan kan'ahɛ ba logere woo na dekɛ ba tugule la hɔ. 23N wan kan'ahɛ ho zabadoma sɛba n de Babilon teŋadoma la Kaldeadoma, la sɛba n de Pekod, la Soa, Koa teŋadoma la, la Asiria teŋa bora sonhe la n de nadoma, la kpɛ'ɛndoma, la yiri toroto doma la, dɛna nɛrekanreba zaŋa, yaga ba yire poan la na. 24Ba wan tare ba lɔrɔgɔ wa'ana zabɛ la hɔ, ba wan tare yiri toroto la lɔya, la nɛreba kekeko te ba wa'ana yɔgɛ ho loga woo, zanla ba zaba tɛ'ɛlega, ge vige ba zaba sapiba ti ba zabɛ la hɔ. N wan dekɛ hɔ eŋɛ ba nu'uhen te ba namehɛ hɔ, ba wan namehe hɔ ba paŋa tɛka. 25N wan dekɛ n nyuunre sunsunya la tɔ hɔ na, te ba dogɛ hɔ, la ba sunsunyiim. Ba wan ŋma ho nyɔya, la ho toba, ge ko ya sɛba n gee la la so'a. Ba wan tare ho dayɔɔhe la ho pɔyɔɔhe keŋɛ, ge nyɔn' sɛba n gee teŋa la poan la bugum bahɛ. 26Ba wan segehe ho lɔgɔrɔ la, la ho banhe la te ho yɛ, ge pire la, ge gee ho beele. 27Wana te ho toonbe'ero la, la ho yiyɛɛnɛ la te ho pɔhɛ dɛ Mizraim teŋa poan la wan ba'ahɛ. Ho kan le beha lɔgɔtona wa bɔta tɔ, bii ho le tɛɛn Mizraim teŋa yele. 28Daana Na'ayenɛ la n yele se'em n wana: N maahene te n dekɛ ho eŋɛ la nɛresɛba te ho yaɛ la nu'uhe, nɛresɛba te ho bire poore bahɛ ba la falam la nu'uhen. 29Ba wan dogɛ hɔ la sunsunyiim ge fan' sɛla woo te ho wobege murugere ge nyɛ la keŋɛ. Ba wan fan' hɔ, ge gee ho ze'ele beele, ho yiyɛɛnɛ la yanɛ nya wan nɛɛ na. Ho toon pon'oha la, la ho toonfɛn'ɛha la, 30n tare yele dena wa sige ho zuo na wa ho dela se'em n daa dole teŋhe la poore finfin, ge dekɛ ba baga la ganlom ho mɛŋa. 31Ho nɛ la ho keema la na'taka, bala zuo la, n wan dekɛ a namehegɔ ko' wanɛ la eŋɛ ho nu'uhen. 32Daana Na'ayenɛ n yele se'em n wana: Ho wan nyu ho keema ko'wanɛ la poan, ko'wanɛ se'ere n kanregɛ ge ko'olom, ho han nyu de poan, de wan tare lɔ'ɔrɔ, la kɛɛrigɔ wa'an ho zuo na se'ere sɔe la, de ba perɛ mɛ. 33Lika la ninbɔn'ɔn wan perɛ ho me'en ko'wanɛ denɛ dela sagaŋɔ la daboo ko'wanɛ, ho keema Samaria ko'wanɛ la n bala. 34Ho wan nyu defɛn'ɛhe dɛ te de ku'e te ho dekɛ ne nɛ wɔnrɛ, aanhom hɔ, darɛ ho bin'iha tonhe. Daana Na'ayenɛ la n yele. 35Bala zuo la, Daana Na'ayenɛ la yeti, Hom n deŋɛ zagahɛ mam, ge zan'an mam bahɛ pooren la, ho di ho toonbe'ero, la ho toon yiyɛɛnɛ la yɔɔrɛ. 36Na'ayenɛ soke mam yeti, Asaala dayɔa wa, ho bote ho gankɛ Ohola la Oholiba? La han dɛna bala, ye pa'ale ba ba toonfɛn'ɛha la te ba tona la. 37Ba dela sɛba n tom kabonhe tooma, ge te ba nu'uhe le tara ziim. Ba kabonhe tooma la dela ba baga la, ge tara ba kɔma sɛba te ba dɔgɛ bo mam la, te ba dɛna dia te ba tara kaanbera bɔ'ɔra ba baga la. 38Ban le tom toonbe'ero seko bo mam n wana, saŋkaŋa mea poan te ba ganlom mam pu'uhegɔ zen'an la, ge zagahɛ mam Vo'ohogo Dabeha la la bo ba baga la. 39Daan denɛ mea te kaanbɛ ba kɔma bo baga, ge ganlom mam yire la. Ban ete sɛla mam yire la poan n bala. 40Ba ne pon tom me yi ba boraahe n boe zen'an n zaan ha, te se han ta paɛ na. Te ya ihege sɔ ya iŋhe, nya dekɛ sɛla takɛ ya nini ge behɛ ya sanlema yɛ. 41Te ya nya kɛn' ta zin'an ho kogedɛleŋa poan, te ya dekɛ tebole ze'ele bini, te dekɛ mam ko'ɛnka la mam kaam ze'ele la zuo. 42Ge te nɛresɛba n ete ban bote se'em nya taa ho poore vɔɔla. Sheba teŋadoma la ze'ele la pɔgɔtia teŋa poan na, la nɛreyooro basɛba, te ba tare sanlema nu'uhe banhe na pire pɔka la ka yebega la nu'uhe, ge dekɛ sanlema sapiba vuge ba zuto. 43Te mam tɔgɛ se'em te kabonhe tooma la sagom en ba'ahɛ la yeti, Ɛnhɛɛn, bahɛ te ba eŋɛ en wo yiyɛa la. 44Te ba nyɔkɛ en, gan'arɛ la en. Ba daa gan'arɛ la en me wo nɛreba n gan'ate yiyɛa se'em la, ban daa gan'arɛ la toonbe'ero pɔgɔba wa Ohola la Oholiba se'em n bala. 45Ge nɛre tontɔɔdoma wan bo ba pɔgɔse'ehe n tone kabonhe tooma, ge ka'aha nɛreba ziim yɔɔrɛ n de se'em, se'ere zuo, ba dela kabonhe doma, ge te ba nu'uhe poan me lerom la ziim. 46Daana Na'ayenɛ la n yele se'em n wana: Bahɛ te pɛɛntɛɛnreba gilige ba bahɛ teŋasoka, la ba aanhom ba. 47Pɛɛntɛɛnreba la wan lobe ba la kuga, ge kɛ'ba la so'ahe ko. Ba wan ko ba dayɔɔhe la ba pɔyɔɔhe, ge nyɔn' ba yiya la bahɛ la bugum. 48Wana te n wan doohe gu' tooma n boe teŋa la poan la bahɛ, pɔka woo n boe ka poan nini han nyɛ, ba kan sakɛ tɔgɔhɛ pɔgɔsena wa tooma wa. 49Ho wan namehɛ ho toonbe'ero la zuo, ge di ho bagakaanbegɔ be'em la yɔɔrɛ. Bala te ho wan baŋɛ te mam n de Daana Na'ayenɛ la.

will be added

X\