Ezekiel 16

1Na'ayenɛ tɔgɛ bo mam yeti, 2Asaala dayɔa wa, kɔ'ɔn bahɛ te Yerusalem teŋa wa baŋɛ ka toonfɛn'ɛha la te a tona la, 3yele ba yeti, Daana Na'ayenɛ la n yele se'em bo Yerusalem teŋa n wana: Ya yaaba la ya dɔgom yuun boe la Kanaan teŋai. Ya sɔ yuun dela Amori nɛra, te ya ma me dɛna Hiti nɛra. 4Daanse'ere daarɛ te ba yuun dɔgɔ ho la, ba yuun ka ŋmaɛ ho yun'an, bii ba sɔ hɔ, bii ba son hɔ la yaarom, bii ba dekɛ futo pin ho. 5Nɛnɛra yuun ka be'e behɛ hɔ te ho tara en ninbɔn'ɔn te a tom toondena wa la deyena me bo ho. Ge ba yuun ton dekɛ hɔ ta lobe bahɛ la mɔɔ poan. Se'ere n sɔe la, daanse'ere daarɛ te ba dɔgɛ ho la, ba yuun ka bote ho. 6Te mam dɔla tɔla, ge nyɛ te ho gan ho ziim la poan tɛnbera, te mam yele ho yeti, Ho wan vɔna! 7Mam tare ho la bala te ho zɔ'ɔra wo mɔɔ poan tia la. Te ho nyɔn'ɔn nya dooe na, te ho zonto wɔgɛ, hom se'em n yuun gan beele la n nya bala. 8Te n le ta dɔla tɔla saŋa kayema ge nyɛ hɔ te ho zo'e seke nɛre bɔta ho la, te n dekɛ n fuo kenkɛleŋa pin' ho beele la. Ge pɔ' n nɔɔrɛ bo ho, ge kɛn' nɔbiŋere deyena poan la hɔ. Daana Na'ayenɛ la yele. Saŋkaŋa poan la ho daa dela mam bonɔ. 9Mam n sɔ hɔ la ko'om, pee ho ziim la bahɛ, ge son hɔ la kaam. 10N dekɛ fuseto te ba kpa' tɔ soŋa yɛɛlɛ hɔ, ge dekɛ tagara se'a n ane soŋa piri ho. Mam n dekɛ tan peelega n ane soŋa pɛ lɔgɔrɔ yɛɛlɛ hɔ, ge bagɛ hɔ la lɔgɔseto da'a n kpe'em. 11N dekɛ sanlema banhe yɛ hɔ, ge degehe banhe pire ho nu'uhe ge yɛɛlɛ ho nyugela, 12ge dekɛ baŋa tuhe ho nyonrɛ poan, ge dekɛ tobekayulehe yule ho toba poan, ge dekɛ muŋa n ane soŋa vuge ho zuo. 13Bala, ho iŋa zan'an daa dela sanlema, la sanlenpeelega zaŋa, ge te ho futo la me kɔ'ɔn dɛna tan peelega n ane soŋa, la tana te ba wogɛ te a ana soŋa te ba kpa a poan. Ho dia yuun dela ki soma ma'an zom, la seerom, la kaam. Te ho ana soŋa, yankera, nya lebege pɔgɔnaba. 14Te ho yu'urɛ kae teŋhe wa zan'an, la ho soŋa la ma'an. Se'ere n sɔe la, mam daa ba' bahɛ te ho soŋa la nɛɛ gaŋɛ mɛ. Daana Na'ayenɛ la n yele. 15Ge ho daa ba' behɛ nyɛ la soŋa la, la ho yu'urɛ la n yehe se'em la, nya kɛn' yiyɛɛnɛ poan. Ho tare ho mɛŋa me bɔ'ɔra se'em woo n dole tɔla, te ho soŋa la dɛna a daana denɛ. 16Ho daa dekɛ la ho futo la toseto pin zen'enhe poan tona yi yɛɛnɛ se poan. Yele aŋa ka sone te a tona, bii a pon ta tona. 17Ho me dekɛ ho banhe soma la te n dekɛ bo ho la, banhe se'ehe te ba dekɛ sanlema la sanlenpeelega maalɛ la, maalɛ la baga n de boraahe, nya tona yiiyɛɛnɛ la ba. 18Ho dekɛ ho fusonɔ la te ba kpa to poan la, yɛɛlɛ ba, ge ka'aha ka somɔ la, yɛɛla ba, ge nyɔ'anra n ko'ɛnka bɔ'ɔra ba. 19Ge ho tara ki soma ma'an zom la kaam la seerom la te mam bo ho te ho tara dita la, nyɔ'anra zun'uhe nyuŋo n ane soŋa bɔ'ɔra baga. Sɛla n ete n bala, Daana Na'ayenɛ la n yele. 20Ge le nyɔgɛ ho dayɔɔhe, la pɔyɔɔhe se'ehe te ho dɔgɛ bo mam la kaanbera baga. Ho yalomtooma la ka seke ho? 21Ge te ho nya nyɔgera mam kɔma kaanbera bɔ'ɔra baga. 22Hom n tone ho toonfɛn'ɛha la woo la, ho ka tɛnre beha ho n yuun de bia te ba nan dɔgɛ hɔ gan'an ziim la poan tenbera se'em la, ka seke sɛsɛla la. 23Wae! Yele paɛ hɔ. Daana Na'ayenɛ la n yele. Sɛla te ho le eta pa'aha ho pototooma la poan dela, 24ho kan'ahɛ la kuga biŋe bo ho mɛŋa, ge doohe mɛ kaanbeŋɔ zen'enhe da'ahe poan, 25nya sagom ho soŋa la, tara ho mea eta yiyɛɛnɛ bɔ'ɔra se'em woo n dole tɔla. 26Ho tare ho mɛŋa tona la yiyɛɛnɛ la Mizraimdoma wa, la sɛba woo n de koŋkoma'ahom doma la, ge nyiiha mam sunsunya la ho yiyɛɛnɛ la. 27Bala te mam tɛɛn n nu'o zabɛ la hɔ, te ho teŋa la malom lebege teŋbila, mam dekɛ ho eŋɛ la ho diŋdoma sɛba n yigiri la nu'uhen, ho diŋdoma sɛba n de Pilistidoma pɔyɔɔhe, sɛba n ya' nɔɔrɛ la ho yalomtooma la zuo la. 28Ho le kɛn' la ganleŋɔ poan la Asiriadoma me. Se'ere n sɔe la, ho ka nyaŋɛ nyɔkɛ ho mɛŋa, hom n pon ta ganlom ba'ahɛ la, la kelom ka seke ho. 29Te ho le malom togohɛ paɛ Kaldea teŋa la n de kɔɔhereba teŋa la poan, ge la bala me zan'an ha, la kelom ka seke ho. 30Ho potɛn'ɛre seren ki mɛ. Daana Na'ayenɛ la n yele. Ho potɛn'ɛre la seren ki me doohe la hom n eŋɛ ho mɛŋa dɔla tona ganlehe toonse'a wa. 31Hom n kan'ahɛ kuga biŋe bo ho mɛŋa, ge doohe mɛ lagaŋɔ zen'enhe yooro nɛreba teŋasoka la, ho daa ka ane wo yiyɛa, doohe la ho daa to'ohere la yɔɔrɛ ge ganlona. 32Kabonhe pɔka wa! Hom ton bɔta la saama gana ho mɛŋa sera! 33Yiyɛa woo tone a yiyɛɛnɛ tɔ'ɔha la yɔɔrɛ, ge hom mɛŋa n ton tara pan'ahegɔ bo'olom bɛlɛna ho bɔteba, n boe zen'an woo te ba kena ho zen'an na. 34Hom yiyɛɛnɛ la poan, hom boe la ho tɔka, nɛra ka dole ho poore. Hom kɔ'ɔn bɔna la ho tɔka, doohe la hom ton yɔɔra, ge te se'em ka malom yɔɔra hom la. 35Bala zuo la, yaloma wa, wom Na'ayenɛ n yeti se'em! 36Daana Na'ayenɛ la n yele se'em n wana: Doohe la hom n ka'ɛ ho nu'taton la, ge pilige ho mea beele bo ho zabadoma ho yalomtooma la poan la, la ho baga la te ho tara la, la hom n ka'ahɛ ho kɔma ziim kaanbɛ baga la zuo la, 37n yeti n kan'ahɛ ho zabadoma sɛba woo te ho dita nyɛlom la ba la, sɛba te ho nɔŋɛ, la sɛba te ho ka nɔŋɛ la zan'an te ba nyɛ ho nyanɛ. 38N wan kan'ahɛ ba na te ba gilige ho bahɛ teŋasoka te n sigehe ho beele, te ba nyɛ ho yanɛ, ge zabɛ la hɔ. 39N wan dekɛ ho eŋɛ ho zabadoma la nu'uhen te ba aanhom ho kuga la, la ho lagaŋɔ zen'yooro la te ho mɛ la bahɛ. Ba wan aanhom ho lɔgɔrɔ la te ho yɛ la, gee yɛɛhɛ ho sanlema banhe la te ho yɛ la, ge bahɛ ho beele. 40Ba wan tare potɔpa wa'ana te ba lobe ho ko, ge dekɛ ba so'ahe aanhom hɔ zɔnra zɔnra. 41Ba wan nyɔn' ho yiya bahɛ, ge dekɛ too kɛn'ɛhɛ hɔ ho pɔgɔhe taaba ninin. N wan eŋɛ ho te ho kan le ta'an tom ho ganlehe la, ge me kan le tana yɔɔrɔ ho bɔteba la. 42Bala te sunsunyiim sebo te mam tara la ho la wan ma'ɛn, ge te n nyuunre la me bahɛ, n suunre nya wan ma'ɛn la hɔ. 43Hom n ka tɛre ho bonbilome te ho yuun ana se'em la, ge dekɛ yele ana wa woo eŋɛ mam la. N wan seren bahɛ te ho toonfɛn'ɛha la yɔɔrɛ sige ho zuo na. Daana Na'ayenɛ la n yele. Ho ka dekɛ la yalomtooma potɛn'ɛre pa'ahɛ ho toonfɛn'ɛha mea poan? 44Nɛre woo ne han yeti a tɔgɛ yetɔgɔbiŋire, a ne tɔge yeti, A ma n ane se'em la a pɔyɔa me ane la bala. 45Ho kɔ'ɔn seren dɛna la ho ma se'em n zagahɛ a sera, la a kɔma la pɔyɔa ge me seren dɛna ho keendoma sɛba n zagahɛ ba sereba, la ba kɔma la me yebega. Ho ma la dela Hiti teŋa nɛra, ge te ho sɔ me dɛna Amori teŋa nɛra. 46Se'em n de ho keema la dela Samaria, se'em n kɛn'ɛre ho zuɔ bɔba teŋhe la poan la a pɔyɔɔhe la, ge te ho keen se'em me n tagalɛ la me Sodom, se'em n kɛn'ɛre ho gɔbega nu'o bɔba teŋhe la poan la a pɔyɔɔhe la. 47Ho kɔ'ɔn ka tɔgehɛ ma, ana wo bama n ane se'em la ma'an, ge ho sɛla woo poan, ho gaŋɛ bama n ane se'em la mɛ. 48Mam n kɔ'ɔn bɔna wa, Daana Na'ayenɛ n yele, la dela yelemɛŋɛrɛ te ho keema Sodom, la a pɔyɔɔhe la ka tabelɛ tom toonse'a taaba te hom la ho pɔyɔɔhe wa tona wa. 49Ho keema Sodom be'em n wana te a tona, enŋa la a pɔyɔɔhe la yuun dela sɛba n ka nane nɛra le pa'ahɛ ba mɛhe poan, ge dita tegera, ge ka fabela sɛsɛla yele, ba ka soŋorɛ taromdoma, la nahadoma. 50Ba dela pa'alɛ n mea doma, ge tona toonfɛn'ɛha mam ninin. Bala zuo te mam sagom ba bahɛ wo ya nini n nyɛ se'em la. 51Samaria be'em la pon ka paɛ ho be'em sebo te ho tom la posoka. Ho tom toonfɛn'ɛha gana ba, bala la bahɛ te ho keema Samaria tɛn'ɛhe te enŋɛ dela tontɔɔ nɛra. Se'ere n sɔe la enŋa be'em la ka zo'e. 52Zi ho mɛŋa yanɛ. Se'ere n sɔe la, ho mɛŋa n bahɛ te ho keema wa behera te a nyane hɔ. Hom be'em la n fɛn'ɛ gana bama la zuo, ba behe te bama de nɛre tontɔɔdoma nyana hɔ. Bala fagehom n kɛn' hɔ ge te ho ma'an wan ziira ho mea yanɛ. Se'ere n sɔe la, hom mɛŋa n bahɛ te ho keendoma la behɛ te bama dela tontɔɔdoma. 53Ge lan ane se'em la, n wan lebehe dekɛ Sodom lɔgɔrɔ bo enŋa la a pɔyɔɔhe la, ge dekɛ Samaria lɔgɔrɔ lebehe bo enŋa la a pɔyɔɔhe me, la hom mɛŋa lɔgɔrɔ la zan'an bo hom me. 54Bala te hom wan zi' ho fagehom la, la ho yanɛ la toonfɛn'ɛha se'a te ho tom la zuo, bala te ba nyɛta iŋma'ahom wa. 55Ho keendoma Sodom, la a pɔyɔɔhe, la Samaria la a pɔyɔɔhe wan lebe ana soŋa wo ban yuun pon ana se'em la, ge te hom me, la ho pɔyɔɔhe me lebe ana soŋa wo yan yuun pon ana se'em la. 56Se'em ma'an te ho daan nan ka lu la, ho keema Sodom daa dela be'em ho nɛŋan. 57Han dagana hom n nya lu wa? Nananawa, ho nya ane me wo enŋa n ane se'em la, te Edomdoma, la sɔɔnrɔ seto woo n lɛm ho la kɛhera hɔ, ge te Pilistidoma wa me kɔ'ɔn toora ho zen'an woo kaara. 58Ho wan zi ho yalomtooma potɛn'ɛre la, la ho ho toonfɛn'ɛha la te ho tom la zeero la. Na'ayenɛ la n yele. 59Daana Na'ayenɛ la n yele se'em n wana: Hom zagahɛ mam nɔɔrɛ la, ge ganlom mam nɔbiŋere la, n wan tulugɛ hɔ wo lan nare se'em la. 60Ge la bala zan'an, n wan kelom tɛnra nɔbiŋere se'ere te n yuun biŋe la hɔ ho bonbilome ha la, ge la n malom biŋe nɔbiŋere se'ere n ka tare ba'ahegɔ la hɔ. 61Ho keendoma, la ho yebehe ha nya ta lebe kena ho zen'an na, ho wan tɛnra ho toonfɛn'ɛha la, te nyanɛ kɛn' hɔ. N wan dekɛ ba eŋɛ ho nu'uhen te ba dɛna ho tɔgɔra wa poan. 62N wan eŋɛ n nɔbiŋere la hɔ, te ho baŋɛ te mam n de Na'ayenɛ la. 63N han kaanbɛ yelebe'ero sugure kaanbegɔ la bo ho ba'ahɛ, ho wan tɛnra ho nyanɛ tooma la kan le tara nɔɔrɛ ya'ara doohe la hom de tɔrɔgɔdaana la zuo. Daana Na'ayenɛ la n yele.

will be added

X\