Ezekiel 13

1Na'ayenɛ tɔgɛ bo mam yeti, 2Asaala dayɔa wa, porɛ bahɛ Israel teŋa nɔtɔgɔheba sɛba n pote nananawa zuo. Yele sɛba n tare ba mɛŋa potɛn'ɛra pota la yeti, Kelehe ya Na'ayenɛ n yele se'em! 3Daana Na'ayenɛ la n yele se'em n wana: Yele boe yamam sɛba n de nɔtɔgɔha geto, ka nyɛta sɛla, ge tara ya mɛhe potɛn'ɛra pota la zuo! 4Israel, ho nɔtɔgɔheba la ane me wo boyooro n boe daboto poan ha la. 5Ho ka keŋɛ ta mɛ' Israel dangɔɔma se'a n aanhom, te Na'ayenɛ zaberɛ daarɛ la han ta paɛ na, dangooma la wan ta'an ze'ele kaŋkaŋe. 6Ge liligere se'ere te ba nyɛta la, la behega sɛka te ba behera la, dela ponpɔrɔŋɔ. Ba ne yeti, Na'ayenɛ la yele, ge te Na'ayenɛ me ka tom ba. Ge te ba ne sina ge bɔta te bama n yelese'ere la seren wa'ana tom. 7Dagɛ liligere yooro la behe yooro te ya ne nyɛ ge parom te Na'ayenɛ yeti ge te mam ne ka yelese'ere la? 8Bala zuo, Daana Na'ayenɛ la n yele se'em n wana: Ya ponpɔrɔŋɔ liligere la ponpɔrɔŋɔ behega la zuo, mam zaberɛ me la ya. Daana Na'ayenɛ la n yele. 9Mam nu'o kɔ'ɔn zabera me la nɔtɔgɔha sɛba n nyɛte liligere yooro ge behera ponpɔrɔŋɔ behega pota bɔ'ɔra la. Bamadoma kan pa'ahɛ mam nɛreba lagona la poan, bii ba golehe ba mam nɛreba Israel yiya poan, bii ba kɛn'ɛra Israel teŋa la poan. Bala te ya wan baŋɛ te mam n de Daana Na'ayenɛ la. 10Se'ere n sɔe, ba tare mam nɛreba la te ba te bɔregɛ la, doohe la ba ne yeti sunma'ahom boe, ge te sunma'ahom ka bɔna la. Ban ne mɛ dangoone se'ere n ka tare paŋa, te ba ne zɔ ta dekɛ bonpeelega takɛ dela. 11Yele sɛba n ta dekɛ bonpeelega takɛ dangoone la yeti de wan lu. Saakanra wan ni te n wan zan saakuga bahɛ na, ge yu'ɛ saabeeokeŋɔ te ko wa'ana. 12Dangoone la han lu, nɛreba la kan soke ya yeti, ban peelega te ya dekɛ takɛ dangoone la bɛɛ? 13Bala zuo, Daana Na'ayenɛ la n yele se'em n wana: N wan ze'ele n sunsunyiim wa poan la n yu'ɛ sabeeo keŋɔ, la saakuga, la saakeŋɔ, te la sagaŋɔ suunre te la sagom sɛla woo. 14N wan aanhom dangoone se'ere te ya dekɛ bonpeelega takɛ dela bahɛ. N wan saalom de ta paɛ de ɛnberɛ la te sɛsɛla pon da nyɛta. De han lu, la wan sagom ya mɛnhɛ n boe de poan. Bala te ya wan baŋɛ te mam dela Na'ayenɛ. 15N wan dekɛ n sunsunyiim la bahɛ dangoone la sɛba n dekɛ bonpeelega takɛ dela se'em n bala. N nya wan yele ya yeti, Dangoone la sɛba n dekɛ bonpeelega takɛ dela zan'an tole ya 16la Israel nɔtɔgɔheba sɛba n daa pote bɔ'ɔra Yerusalem teŋadoma, ge nyɛta sunma'ahom liligere ge te sunma'ahom ka bɔna la zan'an. Daana Na'ayenɛ la n yele. 17La han de hom, Asaala dayɔa, ŋmɛregɛ ho nɛŋa tɔ ho nɛreba wa pɔyɔɔhe se'ehe n tare ba mɛŋa potɛn'ɛra pota la. Porɛ bahɛ ba zuo 18yeti, Daana Na'ayenɛ la n yele se'em n wana: Yele boe la yamam pɔgɔsɛka n pɛ yooŋɔ sanba segilɛ, ge maalɛ tama yema yema vugera ya zuto te ya bɛnrɛ nɛreba la. Ya han yeti ya bɛnrɛ mam nɛreba, ya mɛnhe wan peɛn mɛ? 19Ya sagom mam yu'urɛ mɛ nɛreba wa teŋasoka, la ya mui la boroboro fiin wa la. Doohe la ya n parone bɔ'ɔra mam nɛresɛba n bote ponpɔrɔŋɔ kelehego la, ya ko' la sɛba n kan ki ne la, ge ton bahɛ sɛba n de ne ba ki la. 20Bala zuo, Daana Na'ayenɛ la n yele se'em n wana: Mam zaberɛ me la ya yooŋɔ tiim la te ya dekɛ bɛnrɛ mam nɛreba la wo niihe te ba bɛnrɛ la. N wan darɛ ba tonhɛ ya nu'uhe la poan bahɛ. N wan fan' nɛresɛba te ya bɛnrɛ ba wo niihe yongɛ la ho nu'uhen bahɛ, te ba sɔna ba mɛhe. 21N wan aanhom bɔbɔhe la ya zuin bahɛ, te ya paŋa kan le tana ba. Bala te yamam wan baŋɛ te mam n de Na'ayenɛ la. 22Yan sagom mam nɛresɛba n de tontɔɔ nɛreba, ge te la dagana mam mɛŋa n sagom ba sunya la zuo, la yan le po'e potɔpa te ba ka nyaŋɛ ŋmɛregɛ ba be'em la poan la, te ba kan nyɛ vom faanrɛ. 23Bala zuo la, ya kan le nyɛ ponpɔrɔŋɔ liligere la bakolo boka ya teŋasoka. N wan fan' n nɛreba yehe ya nu'uhen bahɛ. Bala te yamam wan baŋɛ te mam n de Na'ayenɛ la.

will be added

X\