Ezekiel 1

1Yuun pihitan' poan, ŋmarehe senaahe dabeha anuu daarɛ, te mam Ezekiel n naɛ la n taaba sɛba te ba pɛnregɛ to loŋe teŋa kayema poan la lagom zɛ'a la taaba lɛm Kebar Kolaa la, te mam nyɛ te saazuo yu'ɛ te Na'ayenɛ nɛɛ a mɛŋa pa'ale mam na. 2La dela yuuma anuu te ba daa pɛnregɛ Naba Yehoiakin tare loŋe teŋa kayema poan, ŋmarekana wa dabeha anuu daarɛ. 3De daarɛ mea te Na'ayenɛ tɔgɛ bo Buzi dayɔa malemadaana Ezekiel, Kaldeadoma teŋa la poan lɛm la Kebar Kolaa la. Yehe bilam, te Na'ayenɛ paŋa kɔ'ɔn perɛ en. 4Mam behɛ me, nyɛ te sabeeo kantɛ ze'ele zanɔya bɔba wa ha vukura kena na, ge te saŋgbanɛ sɔbelegɔ me ana bala kena na ge nyagera la bugum ma'an, ge te bugum bosebo me kɔ'ɔn nɛɛ pem kae saŋgbanɛ la bahɛ teŋasoka. Te sɛla bɔna bugum la teŋasoka wo kurugo te bugum taɛ te ko mɔ'ɛ la. 5Te bondoma banaahe dɛna bonvɔɔhe bɔna bugum la poan. Ba ane wo nɛresaaleba la. 6Ba zan'an tare la nɛhe senaahe senaahe, la kelom pagahe senaahe senaahe. 7Ba na'ma daa kɔ'ɔn zɛ'a la tontɔɔ, ge te ba na'tala la ana wo duŋa ta fiina la, ge ba ane wo nyɔgɔm. 8Ba kelompagehe senaahe senaahe poan la, nɛresaaleba nu'o n boe bini te kelompagehe la nya go'. Ba banaahe la zan'an daa tare la nɛhe la kelompagehe, 9te ba kelompagehe la kalena taaba. Ba woo daa kɔ tɔla ba nɛŋa tontɔɔ ba nɛŋatontɔɔ kena. 10Ba nɛhe la n ane se'em n wana. Ba woo daa tare la nɛresaala nɛŋa, ge te ba zuɔ nu'o bɔba la ba tara gbegenɛ nɛŋa, ge te ba gɔbega nu'o bɔba la me dɛna lɔlega nɛŋa, ge te ba zan'an me le kelom tara selega nɛŋa me pa'ahɛ. 11Ba nɛhe la n ane se'em n bala. Ba kelompagehe la daa zɛnkɛ la saazuo. Ba woo daa tare la kelompagehe seyi' seyi' te ena kelompaka kalena ena, te ena me kelompaka kalena ena, ge te ba kelompagehe seyi' seyi' la n yee la, nya pin' ba iŋa la. 12Ba woo daa kɔ'ɔn tɔ la ba nɛŋa tontɔɔ, ba nɛŋa tontɔɔ kena sea la n ye'ehe zen'an woo la. Ba me ne kɔ'ɔn tɔ la bilam mea tontɔɔ yɛ'a ge ka ŋmɛregera. 13Ho han beha bondoma la, ba ane me wo bugum saanɛ n taɛ bugum mɔ'ɛ se'em la bii butolela bugum n ane se'em la. Bugum n daa nyagere ba zen'an pego pego nɛŋa la pooren zan'an. Bo daa kɔ'ɔn nɛɛ me pem, ge te saa bugum zɛ'ɛta bo poan nyagera na. 14Te bondoma wa ne zɔ keŋɛ nɛŋa na ge le zɔ lebe pooren wo saa bugum n nyagere kena nɛŋa ge lɛbera pooren se'em la. 15Mam n daa ze' behera bondoma wa la, mam daa nyɛ te yiile n gan teŋa kpɛ' bondoma la ayena woo logerɛ la n nɛhe senaahe la. 16Yiila n daa ane se'em n wana. Ba daa nyagere wo kuga peele me ge kɔ'ɔn wɔna taaba ba banaahe la zan'an. Yiila la woo daa ane me wo yiile deyema me n boe yiile woo poan ha la. 17Bondoma la banaahe la n daa dekɛ ba nɛŋa tɔgelɛ zen'an woo yɛ'a la, yiile la me ye' la bilam. Bondoma la han kena, na'ma la dole la ba poore, na'ma la ka gonlene, a ne kɔ'ɔn kena la tontɔɔ. 18Ba de na'ma n wɔgɛ tara dabeem, ge te na'ma anaahe la poan teŋasoka la kɔ'nɔn perɛ la nini kae. 19Bondoma la han kena, yiile n ze' ba woo sakpekɔ la me ne kena me dɔla ba. Bondoma la han le ɛnkera zɔna saazuo, yiile la me ne ɛnkɛ mɛ. 20Sea la n ye zen'an la, bondoma la dole mɛ, te yiile la me dɔla. Se'ere n sɔe la, bondoma la sehe boe la yiile la poan. 21Bondoma la han kena, na'ma la me kene mɛ. Bondoma la han ta ze'ele, yiile la me ne ze'ele mɛ. Bondoma la han ta ɛnkera, yiile la me ne lagom ɛnkɛ me la ba. Se'ere n sɔe la, bondoma la sehe boe la yiile la poan. 22Sɛla n daa ane woo pika la yula ba zuin, te la tara dabeem. 23Ban boe pika la teŋa la, ba nya zɛnkɛ ba kelompagehe la mɛ tɔ taaba kelompagehe, ge te ba woo tara kelompagehe seyi' seyi' te sena pin' ba iŋa. 24Bondoma la n kene la, mam wom te ba kelompagehe la dame na me wo ko'kantɛ n zote damena se'em la, damena wo Gaŋɛ Zan'an Yenɛ n ne tɔtɛ te la damena se'em la. Damena wo sogɛpa n zo'e sakɛ zaba sakerɛ te la ne damɛ se'em la. Ba han ne zɛ'a, ba ne sigehe ba kelompagehe la lɔbega me. 25Te se'em ma'an te ba zɛ'a ge sigehe ba kelompagehe la lɔbega la, te konkore ze'ele pika la n yuli ba zuin la na. 26Pika la n yule ba zuin la, sɛla n daa ze bini ha ana wo na'am koka la, nyagera wo kuga poonhogɔ la. Te sɛla ana wo nɛra zin'an koka la zuo. 27Mam n daa behere a sea beene zɔna a zuin la, a daa mɔ'ɛ me woo kurugo n boe kuto bugum poan mɔ'ɛ se'em la. A daa kɔ'ɔn ana me wo a dela bugum ma'an la, ge ze'ele a bilam ana me wo bugum peelom la. Ge te bugum bosebo me nyankera bala kae en bahɛ teŋasoka. 28Wo gumatia tanhɔ n ne gilige se'em saa dabeha la, bala mea te a soŋa daa ana, kae en bahɛ teŋasoka. Na'ayenɛ soŋa la n daa nyagere se'em n bala. Mam n daa nyɛ bala la mam daa lu la teŋa aliko ge daa wom te konkore deyema tɔgɔra.

will be added

X\