Yɛhega 8

1Te Na'ayenɛ yele Moses yeti, Keŋɛ Faro zen'an ta yele en yeti, Na'ayenɛ yeti, Bahɛ te n nɛreba la keŋɛ ta po'ohɛ mam. 2Ho han ka sakɛ ho bahɛ te ba keŋɛ, n wan bahɛ te lono to'e ho teŋa wa. 3Lono wan perɛ Nile Kolaa la, dooe na perɛ ho yire poan, kɛn' ho bɔ'gan'aregɔ poan, zom ho gɔrɔgɔ zuo, ge kɛn' ho kpɛ'ɛndoma la, la yiya woo n boe ho teŋa wa poan deto poan, perɛ boroboro sɛn'an deto woo n boe ho teŋa wa poan la, la boroboro laahe woo poan. 4Lono wa wan ɛngera go'ora hom, la ho kpɛ'ɛndoma la, la ho teŋa wa nɛreba zan'an. 5Te Na'ayenɛ yele Moses yeti, Yele Aron te a zɛnkɛ ho doore la tɔ kolehe la mɔga la bɔgɔhe la bulehe woo n boe zen'an woo, te lono ze'ele ba poan dooe na pere Mizraim teŋa wa zan'an. 6Bala te Aron zɛnkɛ doore la tɔ Mizraim teŋa ko'om zen'enhe la woo, te lono ze'ele ko'om la woo poan dooe na perɛ Mizraim teŋa me'en. 7Te tiimdoma la me wa'ana dekɛ ba lika tooma la eŋɛ bala mea, me bahɛ te lono dooe na bɔna Mizraim teŋa la poan. 8Te Faro yi Moses la Aron na yele ba yeti, Sohɛ ya Na'ayenɛ la, te a bahɛ te lono la keŋɛ ge bahɛ mam, la n nɛreba wa, ge te n bahɛ te a nɛreba la keŋɛ ta kaanbɛ kaanbegɔ bo Na'ayenɛ la. 9Bala te Moses yele en yeti, Hom mɛŋa pa'alɛ mam saŋsɛka te ho bɔta te n sohɛ bo hom, la ho kpɛ'ɛndoma, la ho nɛreba wa zan'an, te lono wa bahɛ teŋa wa, ge bɔna Nile Kolaa la ma'an poan. 10Te Faro la yeti, Sohɛ bo mam beere wa. Te Moses yeti, N wan eŋɛ hom yele se'em la, bala te ho wan baŋɛ te bagarɛ ka boe ana wo Na'ayenɛ te Yene wa. 11Lono wa wan bahɛ hom, la ya yiya la, la ho kpɛ'ɛndoma la, la ho teŋa wa nɛreba zan'an, ge bɔna Nile Kolaa la ma'an poan. 12Te Moses la Aron ze'ele Faro zen'an yehe, te Moses ta kaahɛ bo Na'ayenɛ, lono la te a tare wa'an naba Faro zuo na la. 13Te Na'ayenɛ lebehe Moses n soke en se'ere la bo en, bahɛ te lono seto n boe yiya poan, la teŋa la samana zuto la zan'an ki. 14Te Mizraim teŋa nɛreba la doohe zen'an woo kan'ahɛ lono la biŋe kura kura, te teŋa la fɛn'ɛra. 15Faro n nyɛ te fagafaga boe la, te a le kanbɛ a suunre ka kɛleha ba, wo Na'ayenɛ n pon yele se'em la. 16Te Na'ayenɛ yele Moses yeti, Yele Aron te a zɛnkɛ ho doore la ŋmɛ' teŋa, te puuhugo ihege, lebege bonɛngela, to'e Mizraim teŋa zan'an. 17Te ba eŋɛ bala, te Aron zɛnkɛ doore la ŋmɛ' teŋa la, te bonɛngela yehe na bibige nɛresaaleba la dunhe zan'an. Puuhugo n boe Mizraim teŋa la woo lebege la bonɛngela, to'e Mizraim teŋa zan'an. 18Te tiimdoma la me wa'ana zegera la ba lika poan paŋa, te ba me bahɛ te bonɛngela wa'ana koŋɛ, ge te bonɛngela wa bibige nɛreba, la dunhe zan'an. 19Te tiimdoma wa yele Faro yeti, Yenɛ n ete dena wa, te Faro kelom kanbɛ a suunre, kan kelehe, wo Na'ayenɛ n yele se'em la. 20Te Na'ayenɛ yele Moses yeti, Deŋɛ bolika man'aherɛ man'aherɛ, keŋɛ ta gura Faro, te a han ta yɛ'a ko'omen la na, ho paɛ en, la ho yele en yeti, Na'ayenɛ yeti, Bahɛ te n nɛreba wa keŋɛ ta po'ohɛ mam. 21Ho han kan bo sore te ba keŋɛ, n wan bahɛ te zun'uhe wa'ana mi' hom, la ho kpɛ'ɛndoma, la ho nɛreba la zan'an, se wan perɛ ho yire, te Mizraimdoma wa yiya woo perɛ la zun'uhe, te teŋa la zan'an perɛ la zun'uhe zen'an woo. 22Ge de daarɛ, n wan lɔkɛ Gosen teŋa la te n nɛreba bɔna la bahɛ, te zun'uhe la kan bɔna bilam, te ho baŋɛ te mam n Na'ayenɛ, boe zen'kaŋa poan. 23N wan yelege n nɛreba, la ho nɛreba la yema yema. Yele kerega kana wa wan tom beere wa. 24Te Na'ayenɛ tom dɛ, te zun'uhe bibige Faro yire, la a kpɛ'ɛndoma la yiya, mike Mizraim teŋa zan'an, teŋa la sagom mɛ. 25Te Faro yi Moses la Aron na, yele ba yeti, Behɛ ya zen'an Mizraim teŋa wa poan, keŋɛ ta kaanbɛ ya Yenɛ la. 26Te Moses yele en yeti, La kan dɛna ma'an bo to te to eŋɛ bala ka'lam. Se'ere n sɔe la, tomam yeti to kaanbɛ kaanbegɔ seko taaba bo Na'ayenɛ to Yenɛ la wan dɛna kɛhega bo Mizraimdoma wa, tomam han ze'ele Mizraimdoma wa nɛŋan kaanbɛ kaanbe seko n wan kɛhɛ ba, ba kan lobe to la kuga? 27La dela to keŋɛ dabeha atan' kɛn' mɔen ha, ta kaanbɛ Na'ayenɛ to Yenɛ la, wo n pon bo to nɔɔrɛ se'em la. 28Te Faro yeti, N wan bahɛ te ya kɛn' mɔen ha ta kaanbɛ Na'ayenɛ ya Yenɛ la, ge da keŋɛ ya zaan. Ge sohɛ ya bo ya mam. 29Te Moses lebehe yeti, Mam ye' yɛhera wa, n wan sohɛ Na'ayenɛ, te beere, zun'uhe la keŋɛ ge bahɛ hom, ho kpɛ'ɛndoma, la ho nɛreba zan'an, ge da le pan'ahɛ tɔ, ge ka le ta sakɛ bo nɛreba la te ba keŋɛ ta kaanbɛ ba Na'ayenɛ la. 30Te Moses ze'ele Faro zen'an yehe, keŋɛ ta sohɛ Na'ayenɛ. 31Te Na'ayenɛ eŋɛ Moses n soke sɛla yele la. Te zun'uhe la bahɛ Faro, a kpɛ'ɛndoma la, la Mizraim teŋa nɛreba la woo, te zun'an la kayena me ka yee. 32Ge saŋkana me, Faro kanbɛ a suunre mɛ, kan bahɛ te nɛreba la yehe.

will be added

X\