Yɛhega 6

1Te Na'ayenɛ yele Moses yeti, Nananawa, ho wan nyɛ mam wan eŋɛ Faro wa se'em. Mam wan pa'alɛ en n paŋa se'em la zuo, a wan bahɛ ba te ba keŋɛ, mam wan pa'alɛ en n paŋa se'em la zuo, a wan dige ba te ba yehe a teŋa la poan. 2Te Yenɛ tɔgɛ pa'ahɛ bo Moses yeti, Mam n de Na'ayenɛ. 3Mam nɛɛ n mɛŋa la n yu'urɛ se'ere n de Gaŋɛ Zan'an Yenɛ la poan pa'alɛ Abraham, Isaak la Yakob, ge mam ka nɛɛ n mɛŋa n yu'urɛ se'ere n de Na'ayenɛ wa pa'alɛ ba. 4N me biŋe n nɔɔrɛ la ba, te n dekɛ Kanaandoma teŋa la te ba dɛna saama ka poan la bo ba. 5N me wom Mizraimdoma wa n dekɛ Israeldoma wa eŋɛ ba yamehe, nameha ba te ba fabela se'em la, te la bahɛ te n tɛɛn n nɔbiŋere la. 6Bala, yele Israeldoma wa yeti, Mam n de Na'ayenɛ, n wan yehe ya Mizraimdoma zeero wa poan. N wan fan' ya ya yamenɛ wa ba nu'uhen bahɛ. N wan tɛɛn n nu'o, la paŋa gankerɛ tooma, yɔ to'e ya. 7N wan dekɛ ya, te ya dɛna n nɛreba, te mam dɛna ya Yenɛ. Ya wan baŋɛ te mam de Na'ayenɛ, ya Yenɛ se'ere en fan' ya Mizraimdoma zeero la poan bahɛ la. 8N wan dekɛ teŋsɛka te mam ŋmɛ' n nu'o teŋa ge pɔ' te n wan dekɛ ka bo Abraham, Isaak, la Yakob la, n wan dekɛ ka bo ya, te ka dɛna ya sɔ'ɔlom. Mam de Na'ayenɛ. 9Te Moses tɔgɛ yele ana wo bo Israeldoma, ge ba kan kelehe en. Se'ere n sɔe la, ba suunre en sagom, ge te ba le ba' bɔna muguhego poan. 10Te Na'ayenɛ tɔgɛ bo Moses yeti, 11Keŋɛ ta yele Mizraim teŋa naba Faro yeti, a bo Israeldoma la sore te ba yehe a teŋa wa poan. 12Te Moses lebehe tɔgɛ bo Na'ayenɛ yeti, Israeldoma la mɛŋa han ka kɛleha mam, Faro n wan kelehe mam se'em ka ta'an tɔgɔra wa? 13Te Na'ayenɛ tɔgɛ Israel la Mizraim teŋadoma, la Faro la yele bo Moses la Aron, ge bo ba nɔɔrɛ te ba fan' Israeldoma Mizraim nu'uhen bahɛ. 14Israeldoma yizuto yaabdoma yu'ura n wana. Israel dayɔkeema Areuben dayɔɔhe dela, Hanok, Palu, Hezron, la Karmi. Areuben buuri n bala. 15Simeon dayɔɔhe dela, Yemuel, Yamin, Ohad, Yakin, Zohar, Shaul, se'em ma'an de Kanaan teŋa pɔka la. Simeon buuri n bala. 16Levi dayɔɔhe, la se tuunhom dela Gerson la Kohat la Merari. Levi vom yuuma zan'an teŋa wa zuo dela, yuuma kɔbega, la yuum pihitan' la ayopɔe. 17Gerson dayɔɔhe dela Libni la Simei. 18Kohat dayɔɔhe dela Amram la Izhar la Hebron la Uziel. Kohat vom yuuma zan'an teŋa wa zuo dela, yuuma kɔbega, la yuum pihitan' la atan'. 19Merari dayɔɔhe dela Mali la Musi. Levi buuri la yizuto zan'an tuunhom en bala. 20Te Amram di a sɔ tanya, Yokebed, te a dɔgɛ Aron, la Moses. Amram vom yuuma zan'an teŋa wa zuo dela yuuma kɔbega, la yuum pihitan' la ayopɔe. 21Izhar dayɔɔhe dela Kora la Nepeg la Zikri. 22Uziel dayɔɔhe dela Misael la Elzapan la Sitri. 23Te Aron di Aminadab pɔyɔa te ka yu'urɛ dɛna Eliseba, te ka tanya yu'urɛ yi'ira Nason. Pɔgɔkaŋa la dɔgɛ en Nadab la Abihu la Eleazar la Itamar. 24Kora dayɔɔhe dela Asir la Elkana la Abiasap. Kora yizuo n bala. 25Te Aron dayɔa Eleazar di Putiel pɔyɔɔhe la kayema, te ka dɔgɛ Pinehas. Levidoma la yizuto yaabdoma n bala. 26Aron la Moses wa n bala te Na'ayenɛ tom te ba tare Israeldoma wa ba yizuo, ba yizuo, ze'ele Mizraim teŋa poan yehe na la. 27Moses la Aron mea n bala ze'ele Mizraim teŋa naba Faro nɛŋan tɔgɛ yelehom la bo en, te ba tare Israeldoma Mizraim teŋa poan yehe na la. 28Na'ayenɛ n tɔgɛ bo Moses Mizraim teŋa poan la, 29a tɔgɛ yeti, Mam de Na'ayenɛ, yele Mizraim teŋa naba Faro wa, mam yeti ho sɛla woo la. 30Te Moses ze'ele Na'ayenɛ nɛŋan yeti, Ge mam n de birigo wa, Faro wa wan kelehe mam?

will be added

X\