Yɛhega 5

1Pooren te Moses la Aron keŋɛ Faro zen'an, ta yele en yeti, Na'ayenɛ Israel Yenɛ la yeti, Bahɛ te n nɛreba wa keŋɛ, ta de'em de'eŋɔ mɔen ha bo mam. 2Te Faro yele ba yeti, Ane n de Na'ayenɛ, te mam wa wan kelehe en, la n bahɛ te Israeldoma wa yehe? Mam ka mi' Na'ayenɛ n de se'em, n me kan bahɛ te Israeldoma wa yehe. 3Te ba yele en yeti, Hebru buuri wa Yenɛ la nɛɛ la de mɛŋa pa'alɛ tɔ, bala, bo to sore te to keŋɛ dabeha atan' kɛn' mɔen ha, ta kaanbɛ kaanbegɔ bo Na'ayenɛ to Yenɛ la, han dagana bala, too wan sige to zuo, bii a ko tɔ. 4Te Faro la soke yeti, Moses la Aron, bene zuo te ya zegera te ya gu' nɛreba wa tooma bahɛ wa? Lebe ya ya toonse'a te ba bo ya la poan. 5Behɛ, Israel nɛreba n nya ton zo'e gana teŋanbiihe la, te yamam ton ka bɔta te ba tona? 6Daanden daarɛ mea te Faro la bo sɛba n bo'ore Israeldoma wa tooma la, la sɛba n behere ba te ba tona la nɔɔrɛ yeti, 7Da le bo'ore ya Israeldoma wa mɔɔ te ba tara pa'aha ŋmɛ'ɛra birikihe la wo yan ne pon eta se'em la, ba mɛhe ne keŋɛ ta kɛ mɔɔ na ŋmɛ'. 8Ge la bala zan'an, kelom bahɛ ya te ba ŋmɛ'ɛra paara ban ne pon ŋmɛ'ɛra kanlɛ se'ere la, da yehe ya kanlɛ la poan la fiin me bahɛ, ba dela zenyange doma zuo te ba wa'ana yɛta te, bo to sore te to keŋɛ ta kaanbɛ to Yenɛ la. 9Bo' ya ba toonkanra, te ba unhura a poan da nyɛ fole zɛ'a kɛleha pan'ahegɔ yɛla. 10Bala, te sɛba n bo'ore Israeldoma tooma la, la sɛba n behere ba la nya wa'ana mɔɔlɛ bo nɛreba la yeti, Naba yeti n kan le bɔ'ɔra ya mɔɔ te ya tara pa'aha ŋmɛ'ɛra birikihe la, 11ya mɛhe keŋɛ zen'an ta ɛ mɔɔ wa'ana ŋmɛ, ya ŋmɛ' te la zuna wo yan ne pon ŋmɛ'ɛra se'em daarɛ woo la. 12Bala te nɛreba wa yeregɛ Mizraim teŋa wa zen'an woo ɛɛra mɔɔ. 13Te sɛba n behere ba la mɔ'ɛ nini tanhera ba yeti, Nɛra woo ŋmɛ' a birikihe te la zona wo daarɛ woo te to ne bo ya mɔɔ te ya ne ŋmɛ' se'em la. 14Te sɛba n bo'ore Israeldoma tooma la ne wa'ana nyɔkɛ Israeldoma sɛba te ba loe ba te ba beha ba Israel taaba la ŋmɛ', ge soke ba yeti, Bene te zam, la zina ya ka ŋmɛ' birikihe la paɛ tomam ne bɔ'ɔra ya mɔɔ te ya ne ŋmɛ'ɛra se'em la? 15Te sɛba n behere ba Israel taaba wa wa'an Faro zen'an na kaahɛ yeti, Bene te ho eta to bala? 16Behɛ, ba ka bo tomam ho yamehe wa mɔɔ, ge yeti to ŋmɛ' birikihe la te la paɛ, behɛ ban ŋmɛ' ho yamehe wa pɔgɔlom se'em ge te la me dɛna ho nɛreba la mɛŋa yele. 17Te Faro lebehe yele ba yeti, Zenyange doma wa, ya zenyangerɛ la zuo te ya yele mam yeti, N bo ya sore te ya keŋɛ ta kaanbɛ ya Na'ayenɛ la. 18Lebe ya ta tom tooma la, ba kan bo ya mɔɔ, ge la dela pɛnregerɛ te ya ne ŋmɛ' paɛ yan ne pon ŋmɛ'ɛra se'em daarɛ woo la. 19Te Israel nɛŋadoma la behɛ te ba boe la yele poan, la naba la n yele ba yeti ba da yehe birikihe ban ne pon ŋmɛ'ɛra daarɛ woo se'em la poan bahɛ la. 20Te ba yehe naba la zen'an, wa'an Moses la Aron en pon zɛ'a gura ba la zen'an na, 21paana yele ba yeti, Na'ayenɛ wan gankɛ ya, la yamam en tare yele na biŋe tomam, la Faro wa, la a kpɛ'ɛndoma teŋasoka, nya dekɛ so'a zanlɛ ba nu'uhen te ba kɔrom to wa. 22Te Moses lebe ta lu Na'ayenɛ nɛŋan yeti, N daana, bene te ho eta nɛreba wa wana? Bene zuo te ho pon tona mam na? 23Pɔhera daanse'ere daarɛ te mam dekɛ ho yu'urɛ ze'ele naba Faro wa nɛŋan tɔgɛ la, a kɔ'ɔn nameha nɛreba wa la bala, ge te ho me ka eta se'ere te ho fan' ho nɛreba wa.

will be added

X\