Yɛhega 40

1Te Na'ayenɛ yele Moses yeti, 2Ŋmarepaalega pɔhega daarɛ, sɛ' Sogorɛ wa. 3La ho dekɛ nɔbiŋere daka la ze'ele ko poan, yule tanɛ la beŋe ka bahɛ Saraa la poan ha. 4Ge tare tebole la kɛn' na, maahom de zuo lɔgɔrɔ la woo, ge tare butolela zɛ'ɛlega la kɛn' na, degehe ka butoleladoma la sugule ka zuo. 5Dekɛ sanlema ko'ɛnka daka la ze'ele nɔbiŋere daka pooren la na, ge yule tanɛ se'ere n yule nɔɔrɛ sɛka n dole kɛn'ɛra Sogorɛ la poan na la. 6Dekɛ nyɔ'an kaanbegɔ daka la ze'ele la Sogorɛ la nɔɔrɛn na, 7ge dekɛ peere laa la, ze'ele nyɔgom daka la Sogorɛ la teŋasoka, eŋɛ ko'om eŋɛ ka poan. 8Ge sɛ zenzaka la kae, lo' ka zanɔɔrɛ tanɛ la yule. 9Ge dekɛ toolom soa kaam la sɔ' Sogorɛ la kaam la sɛla woo n boe ko poan, te ko dɛna fa'a. 10Sɔ' nyɔ'an kaanbegɔ daka la la kaam, la lɔgɔseto woo n wan tara tona nyɔ'an daka tooma la, te ko dɛna fa'a. 11Sɔ' laapɛrega la ka zɛ'ɛlega la kaam te ka dɛna fa'a. 12Tare Aron, la a dayɔɔhe la wa'ana ze'ele Sogorɛ la nɔɔrɛn, sɔ ba ko'om bilam, 13dekɛ toolom futo la yɛɛlɛ Aron, ge sɔ' en la kaam, te a dɛna malemadaana tona bɔ'ɔra mam. 14Tare a dayɔɔhe la me na, degehɛ toolom fupeela la yɛɛlɛ ba, 15ge sɔ' ba la kaam wo hom sɔ' ba sɔ la se'em la, te ba dɛna malemadoma tona bɔ'ɔra mam. Kaam soa wa n wan bahɛ te ba dɛna malemadoma buuri se'ehe woo n kene la poan. 16Te Moses eŋɛ sɛla woo wo Na'ayenɛ n bo en nɔɔrɛ se'em la. 17Yuuma ayi' ŋmarepaalega pɔhega daarɛ, te Sogorɛ la tin'. 18Moses n yeti a tin' Sogorɛ la, a biŋe la ze'elehe la yia, sɛ kolehe la, sɛ dɔɔseto la, te to zɛ'a saazuo, 19yeregɛ fuo la pin' Sogorɛ la, ge dekɛ sɛla n wan pile la, pile taɛ fuo la, wo Na'ayenɛ n bo en a nɔɔrɛ se'em la. 20A nya dekɛ nɔze'elego kugulama a la eŋɛ nɔbiŋere daka la poan, dekɛ dɔɔseto n wan tara ziira ka la tuhe to tuhega zen'an daka loga a yi la poan, dekɛ be'em duuhego liŋa la, vugule daka la, 21tare nɔbiŋere daka la kɛn' Sogorɛ la poan, dekɛ tanɛ yule pin' daka la lebehe ha, wo Na'ayenɛ n bo en a nɔɔrɛ se'em la. 22Ge a dekɛ tebole la ze'ele Sogorɛ la bɔ' pooren na, tanɛ la n yuli beŋe la nɛŋan na, lebehe zuɔ nu'o bɔba, 23degehɛ boroboro la biŋe a tagalɛ taaba Na'ayenɛ nɛŋan, wo Na'ayenɛ n bo en a nɔɔrɛ se'em la. 24A dekɛ bugum zɛ'ɛlega la me ze'ele Sogorɛ la bɔ' pooren mea na gɔbega nu'o bɔba, tɔ tebole la na, 25degehɛ ka butoleladoma la sugule ka zuo Na'ayenɛ nɛŋan wo Na'ayenɛ n bo en a nɔɔrɛ se'em la. 26Ge a dekɛ sanlema ko'ɛnka daka la ze'ele sogorɛ la bɔ' pooren mea na, tanɛ la n beŋe la nɛŋan na, 27nyɔ' ko'ɛnka la bini, wo Na'ayenɛ n bo en a nɔɔrɛ se'em la. 28A dekɛ tanɛ se'ere n wan lo' yule Sogorɛ la nɔɔrɛn, 29ge dekɛ nyɔ'an kaanbegɔ daka la ze'ele Sogorɛ la nɔɔrɛ la, kaanbɛ nyɔ'an bo'olom la boom bo'olom kaanbegɔ bine, wo Na'ayenɛ n bo en a nɔɔrɛ se'em la. 30A dekɛ peere laa la ze'ele bɔ' pooren la, la nyɔ'an kaanbegɔ daka la teŋasoka, eŋɛ ko'om eŋɛ ka poan te ba tara pɛɛra, 31ko' bomɔ te enŋa la Aron la a dayɔɔhe la tara pɛɛra ba nu'uhe, la ba na'ma. 32Ba han ne yɛ'a kɛn'ɛra Sogorɛ la poan na, bii ba paare la daka la, ba ne pee ba mɛhe mɛ wo Na'ayenɛ n bo en a nɔɔrɛ se'em la. 33Te Moses tin' zenzaka la kae Sogorɛ la, la kaanbegɔ daka la, ge lo' tanɛ yule zenzaka nɔɔrɛ. Moses n tom toonɛ la se'em ba'ahɛ n bala. 34Te saŋgbanɛ pin' Sogorɛ la, te Na'ayenɛ na'ahegɔ perɛ ko poan. 35Te Moses koŋe a kɛn' ko poan. Se'ere n sɔe la Na'ayenɛ na'ahegɔ n perɛ ko poan. 36Saŋgbanɛ la ne han ta zɛnkɛ de mɛŋa ge bahɛ Sogorɛ wa, Israeldoma ne pɔhɛ la kenɛ, kena yɛ'a, 37ge de han ka zɛnkɛ de mɛŋa ge bahɛ Sogorɛ la, ba boe bilam la bala, gura daanse'ere daarɛ te de wan zɛnkɛ de mea la. 38Na'ayenɛ n bahɛ te saŋgbanɛ wa pin' Sogorɛ wa la bala wontɛɛŋa, te bugum bɔna de poan nɛɛ bo Israel nɛreba wa ba yu'uŋɔ kenɛ woo poan.

will be added

X\