Yɛhega 4

1Te Moses soke yeti, Ge Israeldoma la han ka ta sakɛ bo mam, ka kelehe mam, ge yele mam yeti, Na'ayenɛ ka nɛɛ a mɛŋa pa'alɛ ho, n wan eŋɛ la wane? 2Te Na'ayenɛ soke en yeti, Bene te ho zanla wa? Te a yeti, Doore. 3Te Na'ayenɛ yele en yeti, Dekɛ doore la bahɛ teŋa. Te a dekɛ doore la bahɛ teŋa, te doore la lebege bonsɛla, te Moses zɔ la dabeem lebe pooren. 4Te Na'ayenɛ yele en yeti, Gin' bonsɛla la zoorɛ. Te a gin' bonsɛla la, te ka le lebege a doore la. 5Te Na'ayenɛ yele en yeti, Bala pa'alɛ Israeldoma la te ba sakɛ te Na'ayenɛ n de ba sɔyaabdoma Yenɛ la, Abraham, Isaak, la Yakob Yenɛ, la n seren nɛɛ a mɛŋa pa'alɛ hɔ. 6Te Na'ayenɛ le yele Moses yeti, Dekɛ ho nu'o tom ho fuo la poan ha. Te Moses dekɛ a nu'o tom a fuo la poan ha, foe ko na, te nu'o la ŋma konkom, tɛn'ɛhɛ peela peela, pelege woo saakuga la. 7Te Na'ayenɛ yele en yeti, Le dekɛ ho nu'o la tom ho fuo la poan ha, te a eŋɛ bala, ge foe ko, te konkom la bahɛ ya, te nu'o la le ana wo kon ne pon ana se'em la. 8Te a nya yele Moses yeti, Ba han ka ta sakɛ bo ho yia yelekerega la, ba wan sakɛ bo ho kerega sɛka n tagele la. 9Ba han ka ta sakɛ bo ho yelekerehe ana ayi' wa, ge zagahɛ te ba kan kelehe ho, ho keŋɛ Nile Kolaa la poan, ta kabegɛ ka ko'om tare na ka'ɛ biŋe teŋa, ge ko'om sebo te ho ka'ɛ biŋe teŋa la wan lebege ziim gan'an. 10Te Moses yele Na'ayenɛ yeti, N Daana, mam dela birigo n bonbilomen ha, ta paɛ zina, te ho tona mam ho yameŋa wa. N zɛleŋa ka ta'an lɛbegera kalam kalam. 11Te Na'ayenɛ yele Moses yeti, Ane n bahere te nɛresaala tana tɔgɔra, bii dɛna gɔɔnɔ bii wahe? Ane n bahɛ te nɛra nini nyɛta bii fɔ? Dagɛ mam Na'ayenɛ? 12Kena, ge n wan soŋɛ hɔ, te ho ta ta'an tɔgɛ, ge pa'alɛ hɔ hom wan ta tɔgɛ se'em. 13Te Moses yeti, N Daana, tom nɛra se'em ha. 14Te Na'ayenɛ suunre nyie la Moses, te a yele en yeti, Ge ho keema Aron la n de Levi buuri la, mam mi' te enŋa ta'an tɔgɔra soŋa soŋa, a pon bɔna sore zuo to'oha ho na, a han nyɛ hɔ, la wan dɛna nyeema bo en. 15Tɔgɛ, ge dekɛ sɛla woo te n yele ho la eŋɛ a nɔɔrɛn, n wan soŋɛ ya ya nɔya yetɔgom poan, ge pa'ala ya, ya wan eta se'em. 16Aron wan dɛna ho nɔtɔgɔha, tɔ'ɔha ho yetɔgom bɔ'ɔra nɛreba la, te hom me tona wo Yenɛ la, a nɛŋan. 17Dekɛ doore wa tara, denɛ te ho wan dekɛ tom kerehe la. 18Te Moses lebe a dɛɛma Yetro zen'an ta yele en yeti, Bo' mam sore te n lebe Mizraim teŋa ta behɛ n nɛreba wa zan'an kelom vɔna, te a dɛɛma la sakɛ, ge keehe en. 19Moses boe la Midian teŋa wa poan, te Na'ayenɛ yele en yeti, Ihege lebe Mizraim teŋa, ge sɛba woo n mɔ'ɛ nini ɛɛra ba ko ho la zan'an ki ya. 20Bala te Moses vaɛ a pɔga, la a kɔma, te ba ban' boŋa, te Moses dɔla ge zanla Yenɛ doore la te ba lɛbera Mizraim teŋa poan. 21Te Na'ayenɛ yele Moses yeti, Ho han lebe Mizraim teŋa wa, ta tom toonkerehe la woo te n yeti ho ta tom la Faro nɛŋan, ge n wan kanbɛ a suunre, te a kan bahɛ te nɛreba la keŋɛ. 22Te ho yele Faro yeti, Na'ayenɛ yeti, Israel dela mam dayɔkeema. 23Te mam yele ho te, bahɛ te n dayɔa wa keŋɛ ta po'ohɛ mam te ho ka sakɛ la, n wan ko ho dayɔkeema. 24Moses n boe sore zuo yɛ'a lɛbera Mizraim la, ta kɛn' zen'an kayema yu'uŋɔ te ba gan'arɛ, te Na'ayenɛ wa'ana te a ko' Moses, 25te Zipora dekɛ so'a ŋmaɛ a bia bodibila yo'gɔŋɔ dekɛ kalom Moses na'ma ge yeti, Ho seren dela ziim sera bo mam. 26Te Na'ayenɛ bahɛ en. Zipora n yele en saŋkaŋa yeti, Ho de ziim sera bo mam doohe la ŋmaa poan. 27Te Na'ayenɛ tɔgɛ bo Aron yeti, Kɛn' mɔen ha to'ohɛ Moses. Te a ihege to'oha Moses, ta paɛ en Yenɛ zoore la zuo, te ba kɔkɛ taaba. 28Te Moses tɔgɛ yelese'a woo te Na'ayenɛ dekɛ tom en na la, pa'alɛ Aron, ge yele en, yelekerehe se'a woo te a yeti a wa'ana tom la. 29Bala te Moses, la Aron lagahɛ Israel keendoma la zan'an na, 30te Aron yele ba Na'ayenɛ n yele Moses se'em la zan'an, ge te Moses me tom kerehe la zan'an Israeldoma la zan'an nɛŋan. 31Te nɛreba la sakɛ. Israeldoma wa n wom te Na'ayenɛ wom ba fabelegɔ la, ge nyɛ ban namehe se'em la, ba pɔnrɛ la na'ma po'ohɛ Na'ayenɛ.

will be added

X\