Yɛhega 36

1Bezalel la Oholiab, se'em woo te Na'ayenɛ bo en mi'ilom la bɔkerɛ doohe Sogorɛ wa maalegɔ poan, maalɛ doohe Na'ayenɛ n pa'alɛ se'em la. 2Te Moses nya yi Bezalel la Oholiab, la se'em woo te Na'ayenɛ bo en lɔgɔrɔ maalegɔ bo'olom, la se'em woo suunre n kalom en te a wa'ana lagom soŋɛ tooma la na, 3nya dekɛ popeelom bo'olom la te Israeldoma la tare na bo te ba dekɛ tom Sogorɛ la tooma la bo ba, ge te Israeldoma wa kelom tara ba bo'olom bolika woo kena na. 4Te sɛba woo n mi' lɔgɔrɔ maalegɔ la, maala Sogorɛ la lɔgɔrɔ la, nɛra woo la a lɔkɔ maalegɔ, te ba ta tom toonɛ woo ba'ahɛ, 5ge yele Moses yeti, nɛreba la n tare lɔgɔrɔ la se'em kena na la, la zo'e gaŋɛ Na'ayenɛ n bo to nɔɔrɛ te to tom sɛla la mɛ. 6Te Moses bo nɔɔrɛ te ba dekɛ mɔɔlegɔ kae yeti, Nɛra woo, boraa bii pɔka, da le tare bo'olom sebo wa'ana te a bo Sogorɛ la maalegɔ zuo. Bilam n de nɛreba la nya bahɛ, ka le tara lɔgɔrɔ kena na. 7Se'ere n sɔe la, sɛla te ba tare na la, pon wan seke toonɛ la zan'an mɛ. 8Te sɛba n boe tontoneba la poan tara maalegɔ bo'olom la maalɛ Sogorɛ la ko pɔgomfuto pia la n wan lo' yule pin' ko la. Ba dekɛ la tanɛ peelega la guno sɔbele pɔɔnhegɔ la guno mɔlega la guno mɔle mɛŋka wogɛ tama la, ge gole kelompagehedoma eŋɛ a poan. 9Tama la, deyena woo woko dɛna santira pihiyi' la anii, te deyena woo yaleŋa dɛna santira anaahe, te tama la woo zona taaba. 10Ge ba dekɛ tama anuu pɛ' ta' taaba, ge dekɛ tama anuu la n gee la me pɛ' ta' taaba, 11ge benhe tan sɔbele pɔɔnhegɔ, yunre ba pɛ' lamenɛ tama anuu la n pɛ' ta' taaba la, tanɛ se'ere n boe kenkɛleŋa na la, ge le benhe tama mea bala pɛ' lamenɛ tama se'a anuu me n gee pɛ' ta' taaba la kenkɛleŋa bala mea, 12ge benhe tanbaanlehe wa la pihinuu, yunre ba pɛ' lamenɛ tama anuu la n pɛ' ta' taaba la, ge le benhe tanbaanlehe mea pihinuu yunre ba pɛ' lamenɛ tama se'a anuu n me pɛ' ta' taaba la me. Pɛ' ba tagalɛ taaba. 13Ge ba kure sanlema ga'arehe pihinuu, ga' tama la lagom taaba te la ve'e Sogorɛ la naɛ taaba, te ko ana munɛ munɛ. 14Ge te ba dekɛ boohe konberɔ la pan'am, tanyalema pia la deyena, te bama dɛna Sogorɛ la piliga bonɔ. 15Boohe konberɔ tama wa pia la deyena woko woo dɛna santira pihitan', te to yaleŋa dɛna santira anaahe, te a zan'an zona taaba. 16Ge ba dekɛ konberɔ tama la anuu pɛ' ta' taaba ge dekɛ ayoobe la n gee la me pɛ' ta' taaba, 17ge benhe tanbaanlehe pihinuu, nyure ba pɛ' lamenɛ konberɔ tama la n pɛ' ta' taaba la kenkɛleŋa, ge le benhe tanbaanlehe mea pihinuu, nyure ba pɛ' lamenɛ konberɔ tama la n pɛ' ta' taaba la me kenkɛleŋa. 18Ge ba dekɛ nyɔgom kure ga'arehe pihinuu, ga' konberɔ tama la, ve'e ba naɛ taaba pile Sogorɛ la. 19Ge a maalɛ peraahe gana n vɛɛn pile taɛ Sogorɛ la, ge maalɛ gana n kpe'em, te aŋa denɛ dɛna sɛla n wan pile Sogorɛ la yeŋa na. 20Ge te ba dekɛ zaaŋa dɔɔrɔ ŋma, te dɔɔ tonɔ dɛna Sogorɛ la dɔɔrɔ, 21te dɔɔ woo woko dɛna santira pia, te to kantɛ dɛna santire la girigo, 22Ge a tara yagoma ayi' n wan tuhe dɔɔ woo ze'elehe la poan, te dɔɔrɔ seto woo n sɛ ze'ele la n yagom se'em n bala. 23Sogorɛ la dɔɔseto la n ze'ele se'em dela dɔɔseto pihiyi', n maalɛ bo gɔbega nu'o bɔba la, 24dekɛ sanlenpeelega kure ze'elehe pihinaahe bo dɔɔrɔ pihiyi' la, ze'elehe seyi' yia dɔɔ la yagoma ayi' la poan, ze'elehe seyi' dɔɔseko n tagalɛ la me yagoma ayi' la poan yɛ'ɛha. 25Zuɔ bɔba la me, dɔɔrɔ seto n wan sɛ la la pihiyi' te a maalɛ bo bilam bɔba, 26la to sanlema peelega ze'elehe pihinaahe, te yia dɔɔ dekera ze'elehe seyi', le tagela dɔɔ me dekera ze'elehe seyi'. 27Yɛ'a Sogorɛ nɛŋa tontɔɔ bɔba na la, la dɔɔseto toyoobe n bo bilam, 28ge ba maalɛ dɔɔseto toyi' bo Sogorɛ bilam bɔba sengehe la poan. 29Te to sɛ zɛ'a yema yema teŋa na, ge to zuin ha ta' taaba yia baŋa la, te a maalɛ dɔɔrɔ toyi' se'em n bala, te to sɛ sengehe seyi' la poan. 30To dela dɔɔseto tonii la to sanlenpeelega ze'elehe pia la seyoobe, dɔɔ woo, ze'elehe seyi'. 31Ge te ba dekɛ zaaŋa dɔɔrɔ peehe dɔɔsaala tonuu bo Sogorɛ la logerɛ deyema la n gee la, 32ge ba le peehe dɔɔrɔ tonuu bo logerɛ deyema la me, ge tonuu me bo nɛŋa tontɔɔ bɔba la me ha, 33ge teŋasoka dɔɔ la doohe yeŋa kɛn'ɛhɛ na, te ka porogerɛ pagelɛ dɔɔseto la zuo ta yehe. 34Te a takɛ tɔ la sanlema, ge kure sanlema kure banhe tuhe to poan, te se gorɛ dɔɔsaala la n wan pu to tole la. Ge te a takɛ dɔɔ tonɔ me la sanlema. 35Ge ba dekɛ guno sɔbele pɔɔnhegɔ, la gun mɔlɔ, la gun mɔle mɛŋka, la tan peelega n ane soŋa, wogɛ tan se'a n wan lo' yula la, ge kpa' golɛ kelompagehedoma eŋɛ tana la zuo, 36ge dekɛ zaaŋa dɔɔrɔ maalɛ dɔɔseto tonaahe, takɛ tɔ la sanlema, te to ga'arehe la dɛna sanlema, ge dekɛ sanlenpeelega kure ze'elehe senaahe bo dɔɔ tonɔ, 37ge me dekɛ guno sɔbele pɔɔnhegɔ, guno mɔlɔgɔ, la guno mɔle mɛŋka, la tan peelega n ane soŋa, te ba kpa' golɛ kelompagehedoma eŋɛ bini maalɛ tana n wan lo' Sogorɛ yule la, 38la dɔɔseto tonuu, la to banhe la, takɛ tɔ, la to teŋa la woo la sanlema, ge dɔɔseto la ze'elehe senuu la dela nyɔgom.

will be added

X\