Yɛhega 35

1Te Moses kan'ahɛ Israel buuri la woo na, yele ba yeti, Yelese'a te Na'ayenɛ bo nɔɔrɛ te to eta n wana. 2Dabeha ayoobe te ya wan tara tona ya tooma, ge ayopɔe daarɛ la, vo'ohe ya, de dela Na'ayenɛ ma'an dabaherɛ, se'emdaana woo n tom toonɛ de daarɛ, ko' ya en. 3Da toore ya bugum ya bɔŋa zen'an Vo'ohogo Daarɛ la. 4Te Moses yele Israel buuri la zan'an yeti, Na'ayenɛ n bo nɔse'ere dela, 5Lagahɛ bo'olom na bo Na'ayenɛ. Se'em woo suunre n bote bɔ'a, a daana tare sanlema la sanlenpeelega la nyɔgom la 6guno n de sɔbele pɔɔnhegɔ la mɔlɔgɔ la mɔle mɛŋka la tan' peele soma la boohe konberɔ la 7peraahe gana n vɛɛn la gana n ane soŋa la zaaŋa dɔɔrɔ la 8kaam n wan tara lameha butoleladoma la nyɛga se'a n wan tara soa kaam la ko'ɛnka n wan tara nyuŋo soŋɔ la 9kuga ponpɔnrɔsabelega la kugusoma te ye kerehɛ a, te ya lamenɛ fugiriga la nyɔn'ɔn zuo funiho la. 10Sɛba woo me n boe ya poan mina lɔgɔrɔ maalegɔ la me lagahɛ taaba na, la ba maalɛ Sogorɛ la, la ko sɛla woo te Na'ayenɛ bo nɔɔrɛ te ba maalɛ la: 11Sogorɛ la sɛla n wan pile ko la ko kpa'ahe la dɔɔrɔ la ko dɔɔsaala la ko la ko dɔɔrɔ ze'elehe la woo la 12nɔbiŋere daka la ka dɔɔsaala la n wan tara ziira ka la be'em duuhego liŋa la n wan vuga ka la tanɛ se'ere n wan dekɛ beŋe la 13tebole la de dɔɔsaala seto n wan tara ziira dɛ la lɔgɔseto woo n wan tara tona de zuo la boroboro se'ere n wan gan'an mam nɛŋan daarɛ woo la 14butolela zɛ'ɛlega n bo'ore bugum la butolehe bibihe la kaam sebo n wan tara lameha butoleladoma la 15ko'ɛnka daka la ka dɔɔsaala se'a n wan tara ziira ka la toolom soa kaam la ko'ɛnka n wan tara nyuŋo soŋɔ la tanɛ se'ere n wan lo' yule Sogorɛ la nɔɔrɛ la 16nyɔ'an kaanbegɔ daka la ka nyɔgom fotega la dɔɔsaala se'a n wan tara ziira ka la a lɔgɔrɔ la laapɛrega la ka zɛ'ɛlega la 17tana se'a n wan dekɛ lo' yule kae yeŋa na la zenzaka la dɔɔseto la to ze'elehe la sɛla n wan lo' yule zenzaka la nayaŋa nɔɔrɛ la 18kpa' se'ehe n wan dekɛ lo' kpa' Sogorɛ la zenzaka dɔɔrɔ la se mi'inhe la zan'an la 19Aron la a dayɔɔhe toolom malema futo te ba tona ba tooma toolom zen'an la poan la. 20Te Israel buuri la zan'an kelehe ba'ahɛ ge yeregɛ Moses nɛŋan, 21ba woo n lebe ba gan'an zen'enhe la, te sɛba sunya keta, te sɛba potɛn'ya bɔta ba bo, te ba tare ba bo'olom la yema yema na bo Na'ayenɛ, te ba dekɛ maalɛ Sogorɛ la, la ko poan tooma lɔgɔrɔ la, la toolom futo la. 22Te borase'ehe la pɔgɔse'ehe woo suunre n bote ba bo la: boraahe la pirihe ba sanlema banhe te ba pire, te pɔgɔhe la me yulihe ba sanlema tobekayulehe la ba nu'toohe, la ba sanlema banhe te ba yɛ, la sanlema lɔgɔrɔ yema yema, te nɛra woo zanla sanlema lɔkɔ a nu'uhen wa'ana bo Na'ayenɛ. 23Te se'em woo me n tare guno sɔbele pɔɔnhegɔ, bii gun mɔlɔ, bii tan peele n ane soŋa, bii boohe konberɔ, bii peraahe gana n vɛɛn, bii gana soma n kpe'em, tare mɛ wa'ana. 24Se'em woo me n tare sanlenpeelega, la nyɔgom, me tare wa'an me na bo Na'ayenɛ, te sɛba me tare zaaŋa dɔɔrɔ seto n wan dekɛ tom Sogorɛ la zen'sɛka toonɛ, wa'ana. 25Pɔgɔse'ehe woo n mi' guno miia la zin'ire la ba nu'uhe mi guno sɔbele pɔɔnhegɔ, gun mɔle mɛŋka, la tan peela n ane soŋa tare na, 26te pɔgɔse'ehe n mi' pan'aŋɔ, ge te la kalom ba suunre la, zin'ire pan'am boohe konberɔ la. 27Te sɛba n de nɛŋadoma la me tare kuga ponpɔnrɔsabelega la sanlenkuga te ba pɛ' eŋɛ fugiriga la nyɔn'ɔn zuo funiho la poan la 28nyɛga la kaam lameha butolela la toolom soa kaam la ko'ɛnka la. 29Israeldoma la zan'an, borase'ehe la pɔgɔse'ehe woo suunre n kalom ba te ba bo sɛla n wan dekɛ maalɛ Sogorɛ la wo Na'ayenɛ n bo Moses a nɔɔrɛ se'em la, tare la popeelom bo'olom na bo Na'ayenɛ. 30Te Moses yele Israeldoma wa yeti, Ya Na'ayenɛ la mɛŋa n yi Uri dayɔa Hur n de Yuda buuri la poan la me dayɔa Bezalel yu'urɛ, 31perɛ en la sea, te a tara lɔgɔmaalegɔ mi'ilom, la yam, 32enŋa n wan pa'ala, ge magaha lɔgɔseto n wan dekɛ sanlema, la sanlenpeelega, la nyɔgom maalɛ la, 33la kuga ŋmaa, la dɔɔrɔ lɔgɔrɔ maalegɔ. 34Ge me bo paŋa te a ta'an zamehɛ a mɛŋa, la Ahisamak, se'em n yehe Dan buuri poan na la dayɔa Oholiab. 35Na'ayenɛ perɛ bana wa mɛ la a sea, te ba ta'an maalɛ lɔgɔseko woo, bii ba ta'an dekɛ gun sɔbele pɔɔnhegɔ, la gun mɔlɔ, la gun mɔle mɛŋka, la tan peelega n ane soŋa kpa' golɛ sɛla woo, bii woka, bii sɛla woo te se'em n mi' woka, bii golega eŋɛ, ba ta'an eŋɛ.

will be added

X\