Yɛhega 33

1Te Na'ayenɛ yele Moses yeti, Hom, la nɛresɛba te ho tare ba ze'ele Mizraim teŋa na wa, bahɛ te ya ihege, ge keŋɛ teŋsɛka te mam pɔ' nɔɔrɛ la Abraham, Isaak, la Yakob yeti, N wan dekɛ ka bo ba yaahe la poan. 2Ge n wan tom n soŋora te a bɔna ho nɛŋa, dige Kanaandoma, la Amoridoma, la Hitidoma, la Perizidoma, la Hivdoma, la Yebusdoma la woo bahɛ. 3Keŋɛ ya zom teŋsoŋa la te iilom la seerom zɔta ka poan wo ko'om la poan, ge mam kan doohe ya zom, mam han yeti n doohe ya, mam sunsunyiim wan taɛ bahɛ ya zuo. Se'ere n sɔe la, ya dela akanbike nɛreba. 4Nɛreba la n wom sunsunyiim yetɔgɔbɔna wa la, ba woo nyɔgɛ la koonɔ, kele, te nɛnɛra ka yɛ sanlema lɔkɔ. 5Se'ere n sɔe la, Na'ayenɛ n yele Moses yeti, Yele Israeldoma wa yeti, ba dela akanbike nɛreba, bala zuo, mam han yeti n doohe la ba keŋɛ fiin wa, mam sunsunyiim wan taɛ bahɛ ba zuo di ba. Bala zuo la yɛɛhɛ ya ya sanlema lɔgɔrɔ la, ge te n behɛ mam n wan eŋɛ ya se'em. 6Bala te Israeldoma wa pɔhɛ Horeb Zoore la zuo, yɛɛhɛ ba sanlema lɔgɔrɔ la. 7Ge Moses dekɛ la sogorɛ tare lebe kenkɛleŋa ha, zaan la tiiheŋɔ zen'an la, ta tin', ge yi'ira bilam te de dɛna lagaŋɔ zen'an. Te se'em woo n po'ohere Na'ayenɛ, ne yehe keŋɛ la lagaŋɔ zen'an wa n boe tiiheŋɔ la kenkɛleŋa la poan. 8Moses ne han yɛ'a lagaŋɔ zen'an wa poan, nɛreba la woo ne ihege mɛ zɛ'a ba sogorɛ nɔyan, ge beha Moses, te a ta kɛn' sogorɛ la poan. 9Te Moses han ne kɛn' ba'ahɛ, saŋgbanɛ n ne wa'ana yula lagaŋɔ zen'an nɔɔrɛ la, ge te Na'ayenɛ ne tɔgɔra bɔ'ɔra Moses na. 10Nɛreba la zan'an ne han nyɛ te saŋgbanɛ la yuli lagaŋɔ zen'an la nɔɔrɛn la, ba zan'an vaɛ ihege na'aha Na'ayenɛ ba sogorɛ la nɔyan. 11Na'ayenɛ n dole sɔrɔɔ seko tɔgɔra la Moses, wo nɛra n ze' la a zɔ sonhera se'em la n bala. Te bala ne ta ba'ahɛ te Moses ne lebe tiiheŋɔ zen'an la na, ge a yameŋa, Nun dayɔa Yosua la n nan de bonbilipaalega la, ka malom bahera lagaŋɔ zen'an la. 12Te Moses yele Na'ayenɛ yeti, Behɛ, hom n yele mam te n tare nɛreba wa zom na, ge ho ka pa'alɛ mam se'em n wan doohe mam zom na. Ge me yeti, Ho mi' mam yu'ura mɛ, te ho nini tegɛ la mam. 13La han dɛna te ho nini tegɛ mɛ la mam, ye pa'alɛ mam ho sɔya la, te n mina hɔ, te ho nini tegɛ la mam, ge te ho mina te nɛrebana wa dela hom mɛŋa nɛreba. 14Te Na'ayenɛ yele en yeti, N wan bɔna la ya, la n bo ya vo'ohogo. 15Te Moses lebehe yeti, Na'ayenɛ, ho han kan doohe to keŋɛ, ye da bahɛ te to zom bini ha. 16La wan eŋɛ la wane nɛɛ na te ho nini tegɛ me la mam la ho nɛreba wa, han dagana ho dole to poore? La han ana to bala, mam la ho nɛreba wa wan bɔna toyema teŋa wa zuo nɛreba zan'an poan. 17Te Na'ayenɛ yele Moses yeti, N wan eŋɛ hom n soke mam se'ere la, se'ere zuo, ho dela se'em te mam nini tegɛ la hɔ, n me seren mi' ho yu'urɛ. 18Te Moses yeti, Pa'alɛ mam ho na'ahegɔ. 19Te Na'ayenɛ yele Moses yeti, N wan bahɛ te ho nyɛ n som, ge mɔɔlɛ mam yu'urɛ la n de Na'ayenɛ la yele. Mam zo'ohore la se'em te n bɔta te n zo'ohɛ, ge tara ninbɔn'zɔrɛ bɔ'ɔra se'em te n bɔta te n zɔ a ninbɔn'ɔn, 20ge le yeti, Ho ton kan nyɛ la mam nɛŋa. Se'ere n sɔe la, nɛra ka boe wan nyɛ mam nɛŋa ge vɔna. 21Te Na'ayenɛ tɔgɛ pa'ahɛ yeti, Behɛ, ta ze'ele taŋa sɛnka wa poan ha, 22te n soŋa la han ta dɔla tɔla, n wan zan'ɛn ho kɛn'ɛhɛ taŋa la sɛka la poan, pin' ho la n nu'o, ge tole ba'ahɛ, 23ge dekɛ n nu'o la, te ho nyɛ n poore ma'an, ge mam nɛŋa ka nyɛte.

will be added

X\