Yɛhega 32

1Nɛreba la n ta behɛ te Moses yuure mɛ zoore la zuo ka kena la, te ba lagahɛ taaba Aron zen'an na, yele en yeti, Maalɛ yena bo to, te ba bɔna to nɛŋa, ge han dɛna Moses wa, n tare to ze'ele Mizraim teŋa poan yehe na wa, te pon ka le mina sɛla n daane en. 2Te Aron yele ba yeti, Yulehe ya sanlema tobekayulehe la n yule ya pɔgɔba toban la, la ya dayɔɔhe, la ya pɔyɔɔhe zen'an la tare na bo mam. 3Te nɛreba la zan'an yulehe ba tobekayulehe la tare na bo Aron. 4Te a to'e ba sanlema la, nyɛlegɛ ba lagom taaba, dekɛ maalɛ nagabila bagarɛ. Ge ba yeti, Ya yena la n wana tare ya ze'ele Mizraim teŋa poan yehe na la. 5Aron n nyɛ wana la, a mɛ' la bimbine bo bagarɛ la nɛŋan, ge yeti te beere dela Na'ayenɛ de'eŋɔ la. 6Te yiimbeere, te ba ihege bolika yu'uŋyu'uŋɔ tare nyɔ'an bo'olom, la popeelom kaanbegɔ bo'olom na kaanbɛ, nya nɛreba dita gee bugura gee wa'ara de'eŋɔ la poan. 7Te Na'ayenɛ yele Moses yeti, Sige kalam, ho nɛreba la te ho tare ba ze'ele Mizraim teŋa na la ganlom mɛ, 8ba pilom ŋmɛregɛ ba mɛhe yehe mam bo ba nɔse'ere la poan mɛ wana kalam, ba maalɛ la nagabila bo ba mɛŋa, nya po'oha, ge kaanbera ka, ge yɛta te, Israel, ho yena la n wana tare ho ze'ele Mizraim teŋa poan yehe na la. 9Te Na'ayenɛ yele Moses yeti, Mam mi' nɛreba wa n de akanbikedoma se'em. 10Bala, bahɛ te n sagom ba bahɛ, ge eŋɛ hom te ho lebege teŋkantɛ. 11Te Moses belom Na'ayenɛ la n de a Yenɛ la yeti, Na'ayenɛ, bene n sɔe te hom sunsunya nyie la ho nɛreba wa te hom tare ba ze'ele Mizraim teŋa poan yehe na la ho mɛŋa nu'o paŋa wa? 12Wane te Mizraimdoma wa wan ta'an ya'ɛ ba nɔya yeti, Potɛn'be'o kona wa zuo te Na'ayenɛ la tare ba yehe kɛn' mɔen ha te a ta ko ba zoore la zuo ha, te ba di wo bugum la, piie ba teŋa wa zuo bahɛ? Na'ayenɛ, bahɛ suunre la nɛreba wa, tee ho potɛn'ɛrɛ, da tare sagaŋɔ wa'an ho mɛŋa nɛreba wa zuo na. 13Tɛnra Abraham la Isaak la Israel n de ho yamehe, te ho pɔ' ho mɛŋa yu'urɛ bo ba yeti, N wan bahɛ te ya yaahe ye'ɛ wo ŋmarebibihe n zo'e se'em saŋgbanɛ zuo la, ge te n dekɛ teŋsɛka te n biŋe nɔɔrɛ la ya wa, bo ya yaahe, te ba sɔe ka sɔna la. 14Te Na'ayenɛ tee a potɛn'ɛrɛ yehe en yele ne te a bahɛ te sagaŋɔ sige a nɛreba la zuo na la. 15Te Moses ŋmɛregɛ ze'ele zoore la zuo sigera na, ge zanla nɔze'elego kugulama ayi' la a nu'uhen, te golehegɔ bɔna kuga la loga a yi la woo poan, golehegɔ boe kugulama la nɛŋa mɛ, la a pooren zan'an. 16Yenɛ mɛŋa n kerehɛ kugulama a yi la, Yenɛ mɛŋa n golehɛ eŋɛ kugulama a yi la zuo. 17Yosua n wom nɛreba la n voole se'em la, te a yele Moses yeti, Zaberɛ voole n boe tiiheŋɔ zen'an wa poan. 18Te a me lebehe yeti, De me dagɛ nyaŋerɛ sakerɛ, bii koŋere fabelegɔ, mam wone la popeere voole. 19N keŋɛ na pɔnra tiiheŋɔ zen'an la, te a niho tɔ nagabila bagarɛ la, la nɛreba la wa'a la te ba wa'ara la, te Moses sunsunya taɛ wo bugum la, te a lobe kugulama la te a zanla a nu'uhen la bahɛ teŋa, wɔnrɛ a zoore la tilin, 20ge dekɛ nagabila bagarɛ la te ba maalɛ la, nyɔ' dɛ bugum poan, bagahɛ dɛ te de bagɛ wo tampegelom la, te a tare ba ta ka'ɛ bahɛ kolaa ko'om poan, bahɛ te Israeldoma la nyuura bɔ. 21Te Moses soke Aron yeti, Nɛreba wa eŋɛ ho la bem te ho tare nɔpɔtɛ dena wa'an ba zuo na wa? 22Te Aron yeti, N daana, da bahɛ te suunre ihege la mam, ho mi' nɛreba wa n ane se'em, ba kɔ'ɔn bɔta la ba tom be'em. 23Ba wa'an me na yele mam yeti, maalɛ baga bo to, te a bɔna to nɛŋa, han dɛna Moses wa n tare to ze'ele Mizraim teŋa poan yehe na wa, to ka mi' sɛla n tare en. 24Bala te mam me yele ba yeti, se'em woo n tare sanlema a iŋai, a tare na, te ba tare na, te mam to'ohe ba lobe bahɛ bugumen, te nagabila wa ɛnkɛ yehe na. 25Moses n behɛ te nɛreba la nya pon yaalɛ paɛ zen'an tole mɛ, Aron bahɛ te nɛreba la bɔrɔgerɛ la pon ta dɛna yelɔ'ɔrɔ bo ba diŋdoma. 26Te Moses ze'ele tiiheŋɔ zen'an la nɔɔrɛn soke yeti, Ane n boe Na'ayenɛ bɔba? Wa'an n zen'an kalam na. Te Levi dayɔɔhe la ma'an zan'an lagahe taaba wa'ana kae Moses bahɛ teŋasoka. 27Te a yele ba yeti, Na'ayenɛ se'em n de Israel Yenɛ la yeti ya, nɛra woo dekɛ a so'ahe, kɛn' ko ho sɔɔn, ho zɔ, la hom paɛ ho ma bia sɛka woo. 28Te Levi dayɔɔhe wa eŋɛ wo Moses n bo ba nɔɔrɛ se'em la, te nɛreba n paɛ wo tuha atan' ki de daarɛ. 29Te Moses yele ba yeti, Zina, ya mɛhe n maahom ya mea te ya tom Na'ayenɛ tooma, ya woo ayena ayena yɔ la dayɔa, bii sɔɔn, nya tare kan' somɔ bona wa'an ya mɛhe zuo na wa. 30Yiimbeere, te Moses yele nɛreba la yeti, Ya tom la be'em kantɛ, ge n wan lebe zom Na'ayenɛ zen'an, daanse'ere n wan ta ta'an sohɛ ya be'em duuhego la. 31Te Moses lebe Na'ayenɛ zen'an, ta yele Na'ayenɛ yeti, Nɛreba wa tom la toonbe'o n kanregɛ, ba dekɛ la sanlema maalɛ bagarɛ bo ba mɛhe. 32Bala, di sugurom bo ba be'em la, han dagana bala, ye kɔ'ɔn saalom mam yu'urɛ ho vom gɔŋɔ la poan bahɛ. 33Te Na'ayenɛ yele Moses yeti, Se'emdaana n tom be'em, enŋa daana yu'urɛ te n wan saalom n gɔŋɔ la poan bahɛ. 34Ge nananawa, lɛbera, ta bɔna nɛreba la nɛŋa, tare ba keŋɛ zen'sɛka te mam tɔgɛ ka yele bo ho la, behɛ, mam soŋora wan bɔna ho nɛŋa. Ge de daarɛ han paɛ, n wan namehɛ ba ba be'em la zuo. 35Te Na'ayenɛ bahɛ te too sige nɛreba la zuo, la ban maalɛ nagabila la, nagabila sɛka te Aron maalɛ la.

will be added

X\