Yɛhega 30

1Dekɛ zaaŋa dɔɔrɔ maalɛ daka sɛka n wan tara nyɔ'anra ko'ɛnka zun'uhe bɔ'ɔra mam la. 2Ka woko dɛna santire, te ka yaleŋa dɛna santire, te ka dɛna mɔkɔ, te ka saazuo woko dɛna santira ayi', te daka la, la ka iila la dɛna dɔyeŋɔ, 3te ho dekɛ sanlema takɛ ka yeŋa, la ka poan zan'an, kae, la ka iila la zan'an, ge kure sanlema forɛ ka. 4La ho kure sanlema banhe seyi' tuhe daka la loga a yi poan, sanlema la zuo, te dɔɔseto n wan tara ziira daka la tuhe se poan. 5Dekɛ zaaŋa dɔɔrɔ peehe dɔɔsaala toyi', dekɛ sanlema takɛ tɔ. 6Dekɛ daka wa ze'ele tanɛ se'ere n beŋe nɔbiŋere daka la bahɛ ha la nɛŋan na, tɔ la sugurom zin'ihego zen'an la n de liŋa la n vuge nɔbiŋere daka la, zen'an te n ne wan wa'an bini na tɔgɛ la ya la. 7Aron wan nyɔ'anra nyuŋo soŋɔ zun'uhe la bilam, bolika woo a han ne duuhe butoleladoma la ba'ahɛ, a ne nyɔ' nyuŋo soŋɔ zun'uhe wa bahɛ. 8A han ne ta laŋɛ butoleladoma wa zanɔɔrɛ, a ne laŋɛ nyuŋo soŋɔ zun'uhe wa bahɛ, nyɔ'anre ya nyuŋo soŋɔ zun'uhe wa ya buuri wa poan saŋa woo bɔ'ɔra Na'ayenɛ. 9Da tara sɛla nyuŋo te mam ka bɔta nyɔ'anra nyuŋo soŋɔ daka wa poan, bii nyɔ'an bo'olom, bii ki bo'olom, bii daam bo'olom kaanbera ka poan. 10Boyena yuunɛ woo poan, te Aron ne wan malom be'em duuhego malema la ka iila la zuo. Ya buuri wa poan saŋa woo, boyena yuunɛ woo poan, te a ne wan tare be'em duuhego kaanbegɔ duŋa la ziim na kaanbɛ daka wa. Kaŋa n ba' dɛna Na'ayenɛ toolom lɔkɔ ninmɔ'ɔrɛ. 11Te Na'ayenɛ yele Moses yeti, 12Ho han ta lagahɛ Israeldoma wa te ho baŋɛ ba kanlɛ, ba kanlɛ la poan la, nɛra woo bo Na'ayenɛ sɛla, ge sɔna a vom, te too da lu ba zuo na, la ban kaanlɛ ba la. 13Se'em woo te ba kaanlɛ en n wan bo sɛla dela, sanlema peka, te ka zuna la toolom yire poan n magare tebehom se'em la te la dɛna bo'olom bo Na'ayenɛ. 14Se'em woo n paɛ yuum pihiyi' beene yɛ'ɛha te ba kaanlɛ hɔ, ho bo bo'olom sebo n de Na'ayenɛ bo'olom la. 15Ya han ne bo Na'ayenɛ ya be'em duuhego bo'olom ya vom zuo, dakanpa la da bo gana kpile girigo, ge taromdoma me da bo te la pɔ'ɛ. 16To'ohe Israeldoma be'em duuhego ligiri la tara tona Sogorɛ la tooma. Ligi'ena wa wan tɛɛnha Na'ayenɛ te a duuhe nɛra woo be'em ge bahɛ te ya voe. 17Te Na'ayenɛ yele Moses yeti, 18Dekɛ nyɔgom kure tanhelaa, ge dekɛ nyɔgom mea kure ze'ehega bo ka, te kaŋa dɛna peere laa, te ho dekɛ ka ze'ele zenzaka, Sogorɛ la kaanbegɔ daka la teŋasoka, ge eŋɛ ko'om eŋɛ ka poan. 19Ko' bomɔ te Aron, la a dayɔɔhe la wan tara pɛɛra ba nu'uhe la ba na'ma. 20Ba han ne kɛn' Sogorɛ la poan na, ba pee ba mɛhe la ko'om wa, la ba da ki. Ba han ne paɛ ko'ɛnka daka wa poan te ba nyɔ' ko'ɛnka bo Na'ayenɛ, 21ba ne pee ba nu'uhe, la ba na'ma, la ba da ki. Toondena wa wan dɛna la toolom toonɛ, bo Aron, la a yaahe, saŋa woo poan. 22Te Na'ayenɛ yele Moses yeti, 23Dekɛ nyɛga n tare nyuŋo soŋɔ te *muur wa tebehom dɛna kpila kɔbehe senuu, te to pɔgɔrɔ la me tebehom dɛna kpila kɔbehe seyi' la pihinuu, te kinkanya tebehom la me dɛna kɔbehe seyi' la pihinuu, 24la zaaŋa dɔɔrɔ tebehom la dɛna kɔbehe senuu, la kaam dugula. 25Dekɛ ba zan'an lagom taaba, maalɛ kaam, te bo dɛna toolom soa kaam. 26Bomɔ te ho wan ne sɔ' Sogorɛ wa la nɔbiŋere daka la kaam. 27la tebole la, la de lɔgɔrɔ la zan'an, la butolela la, la ka lɔgɔrɔ la zan'an, la ko'ɛnka daka la, la ka lɔgɔrɔ la zan'an, 28la nyɔ'an kaanbegɔ daka la, la ka lɔgɔrɔ la zan'an, la tanhelaa la, la ka zɛ'ɛlega la. 29Miihe ba te ba dɛna toolom lɔgɔrɔ, te se'em woo n kalom tɔ wan dɛna fa'a nɛra. 30Sɔ' Aron, la a dayɔɔhe la, ge sɔ' ba la kaam te ba dɛna malemadoma tona bɔ'ɔra. 31Yele Israeldoma wa yeti, Kaam bona wa dela toolom soa kaam ya buuri wa poan saŋa woo yɛ'ɛha. 32Da tare ya bɔ sonra iŋa, da maalɛ bo taaba, bo dela soa kaam, bala ya buuri la mina bɔ, te bo dela soa kaam. 33Se'emdaana n maalɛ bo taaba, bii ba dekɛ bo son la nɛra se'em n dagɛ a son bɔ, ŋmaɛ ya enŋa daana ya buuri la poan bahɛ. 34Te Na'ayenɛ yele Moses yeti, Dekɛ nyɛga la digilom, la ho magahɛ ba te ba zan'an zona, 35te ho dekɛ ba maalɛ sɛla n wan tara ko'ɛnka nyuŋo soŋɔ la, te yaarom bɔna bini, te bo ana soŋa, ge dɛna toolom bonɔ. 36Tɔ basɛba te ba lebege zom, ge aan basɛba ze'ele lɛm nɔbiŋere daka la, Sogorɛ la poan ha, zen'sɛka te n ne wan wa'ana tɔgɛ la ya la poan, te bo dɛna ya toolom lɔkɔ. 37Ya han dekɛ lɔgɔtona wa maalɛ sɛla n tare nyɔ'anra nyuŋo soŋɔ zun'uhe wa, ya da maalɛ bo taaba bo ya mɛhe, dekɛ ya bɔ, te bo dɛna Na'ayenɛ ma'an denɛ. 38Se'emdaana woo n boe ya poan maalɛ lɔgɔtona taaba bo a mɛŋa, ba wan ŋmaɛ en Israel buuri la poan bahɛ.

will be added

X\