Yɛhega 3

1Te Moses dɔla a dɛɛma Yetro n de Midian teŋa tendaana la piihe, nya gu'ura piihe la mɔen ha, ta paɛ Horeb Zoore la n de Yenɛ zoore la. 2Bilam te Na'ayenɛ soŋora nɛɛ a mɛŋa dɛna bugum peelomen bɔna tia poan dita. Te Moses nyɛ te bugum la diti tia la mɛ ge ka tara kɔ. 3Te Moses yele a mɛŋa yeti, N wan vuruge paɛ mɛ baŋɛ yele nyanlenɛ dena wa, n baŋɛ sɛla n sɔe te bugum la ka tara tia la. 4Na'ayenɛ n nyɛ te Moses paɛ te a behɛ bugum la, te Yenɛ yi' en tia la poan na yeti, Moses, Moses, te Moses sakɛ yeti, Mam n wana. 5Te Yenɛ yele en yeti, Da keŋɛ lɛm na, pirihe ho tagara la. Se'ere n sɔe la, zen'sɛka te ho zɛ'a la dela toolom zen'an. 6Yenɛ le yele en yeti, Mam n de ho sɔ Yenɛ la Abraham Yenɛ la Isaak Yenɛ la Yakob Yenɛ la. Te Moses pin' a nɛŋa. Se'ere n sɔe la, dabeem en tare en te a behɛ Yenɛ. 7Te Na'ayenɛ yele en yeti, Mam nyɛ muguhego seko en muguhere mam nɛreba wa Mizraim teŋa poan la. N wom yamehe kpɛ'ɛndoma la en namehere ba te ba kahere se'em, yelemɛŋɛrɛ, ba namehegɔ la yele pakɛ mam mɛ. 8Bala zuo te n sige na te n fan' ba Mizraimdoma wa nu'uhen bahɛ, ge tare ba yehe na, tare ba keŋɛ teŋsɛka en ane soŋa ge kanregɛ, teŋsɛka te iilom la seerom zɔta ka poan wo ko'om la, teŋse'ehe n de Kanaandoma la Hitidoma la Amoridoma la Perizidoma la Hivdoma la Yebusdoma teŋhe la poan. 9Israeldoma kaahega la paɛ mam mɛ na, n nyɛ Mizraimdoma la en ba' mɛlehera ba se'em. 10Bala, wa'ana te n tom hɔ, te ho keŋɛ Mizraim teŋa naba Faro zen'an ta tare n nɛreba Israeldoma wa Mizraim teŋan yehe na. 11Te Moses yele Yenɛ yeti, Mam me dela ane wan ta'an keŋɛ ta ze'ele Faro nɛŋan tare Israeldoma Mizraim teŋa poan yehe na? 12Te Yenɛ yele en yeti, N wan bɔna la hɔ, yele dena n wan dɛna danlehom bo ho, te mam n tom hɔ. Ho han ta tare Israeldoma ze'ele Mizraim teŋa wa poan yehe na, ya po'oha Yenɛ zoore dena wa zuo. 13Te Moses le soke Yenɛ yeti, Ge n han keŋɛ Israeldoma wa zen'an ta yele ba te ya sɔyaabdoma Yenɛ la en tom mam ya zen'an na, te ba soke a yu'urɛ, n wan yeti bo? 14Te Yenɛ yele Moses yeti, Mam de Mam. Yele ba te Mam de Mam en tom ho na, 15ge le yele Moses yeti, Ta yele ba, te mam Na'ayenɛ la, ya sɔyaabdoma Yenɛ la, Abraham Yenɛ, Isaak Yenɛ, la Yakob Yenɛ la en tom ho ba zen'an na. N yu'urɛ en bala yɛ'ɛha. Mam n de se'em n bala, te buuri woo n boe saŋa woo poan wan tɛnra. 16Keŋɛ ta lagahɛ Israel keendoma la yele ba yeti, Na'ayenɛ n de ya sɔyaabdoma Yenɛ la, Abraham, Isaak, la Yakob Yenɛ la en nɛɛ a mɛŋa pa'alɛ ho ge yeti n wom ya fabelegɔ la, ge me nyɛta yelese'a woo n ete ya Mizraim teŋa la poan la. 17N yeti n wan tare ya ze'ele Mizraim teŋa mɛlehegɔ la poan yehe na, tare ya keŋɛ teŋse'ehe n de Kanaandoma la Hitidoma la Amoridoma la Perizidoma la Hivdoma la Yebusdoma teŋhe la poan, teŋse'ehe te iilom la seerom zɔta ka poan wo ko'om la poan. 18Ho han ta tɔgɛ bala, ba wan kelehe ho, te hom la Israel keendoma la doohe taaba keŋɛ Mizraim teŋa naba la zen'an, te ho ta yele en yeti, Na'ayenɛ n de Hebrudoma Yenɛ la en nɛɛ a mɛŋa pa'alɛ tɔ, bala, bo to sore te to dekɛ dabeha atan' keŋɛ kɛn' mɔen ha, ta kaanbɛ to Na'ayenɛ to Yenɛ la. 19N mi' te Mizraim teŋa naba wa kan bo ya sore te ya keŋɛ, han dagana la nu'o seko en kpe'em en pɛnregɛ en. 20Bala, n wan damɛ Mizraim teŋa wa la n paŋa, la yele nyalema se'a te n wan tom la. Bala te a wan bahɛ te ya keŋɛ. 21N wan bahɛ te Mizraim nɛreba la nɔŋɛ ya, te ya han yɛhera Mizraim teŋa la, ya kan keŋɛ nu'beela. 22Israel pɔka woo wan sohɛ ka tadaana se'em n de Mizraim teŋa pɔka kɛn'ɛra la en, te a bo en sanlenpeelega, la sanlema nonɔm zotɔ, la futo, te ya yɛ ya kɔma. Yan wan doohe sose'ere fan' Mizraim teŋadoma wa lɔgɔrɔ n bala.

will be added

X\