Yɛhega 28

1Yehe ho keema Aron la a dayɔɔhe la Israeldoma wa poan lɛm ho mea na, te ba dena sogorɛ la poan malemadoma tona bɔ'ɔra mam: Aron la a dayɔɔhe Nadab la Abihu la Eleazar la Itamar. 2Dekɛ tan soma kpa' toolom fusonɔ bagɛ ho keema Aron. 3Yele nɛresɛba woo te mam bo ba futo tooma bo'olom la te ba dekɛ ba bo'olom la kpa' toolom futo bagɛ Aron te a dɛna malemadaana. 4Fuseto te ba wan pɛ' bo en dela funiho eŋɛ tanɛ peka la a yɛɛra baha nyɔn'ɔn zuo la fugiriga n yɛɛre baha duma zuo la fuwoko te ba wogɛ ko la nu'uhe la zuvɔnka la sɛganɛ. 5Ba wan bo ba sanlema guno la gun sɔbele pɔɔnhegɔ la gun mɔlɔgɔ la gun mɔle mɛŋka la tanɛ peelega. 6Te bama te n bo ba futotooma bo'olom wan dekɛ sanlema guno la gun sɔbele pɔɔnhegɔ la gun mɔlɔgɔ la gun mɔle mɛŋka la tanɛ peelega zan'an pɛ' fugiriga. 7pɛ' tama pagelɛ bɔgɔrɔ la zuo te ko nu'uhe tama la tana ga'ara taaba bilam. 8Guno seto kpa' golɛ enŋa ko zuo wan dela sanlema guno mea la guno sɔbele pɔɔnhegɔ la gun mɔlega la gun mɔle mɛŋka la tanpeelega mea la. 9Dekɛ kugu ponpɔnrɔsabelega kerehɛ kugulama ayi', golehɛ Israel dayɔɔhe la yu'ura eŋɛ a zuo. 10Golehɛ a dayɔɔhe seyoobe yu'ura eŋɛ kugure deyema zuo, ge golehɛ seyoobe la me yu'ura eŋɛ gugure deyema la me zuo, golehɛ doohe ban dɔgɛ ba tagalɛ taaba se'em la. 11Golehɛ Israel dayɔɔhe la yu'ura eŋɛ kugulama ayi' wa zuo, ge dekɛ sanlema kure banhe, dekɛ kuga wa ferɛ se poan, 12dekɛ a kɛn'ɛhɛ fuo la bɔgɔrɔ zuo tanɛ la poan, te a paga bilam tɛɛnha en, te Aron ziira kena Na'ayenɛ nɛŋa na, tɛɛnha Na'ayenɛ Israel kɔma wa yele. 13Dekɛ sanlema kure ga'arehe, 14ge dekɛ sanlema kure zotɔ toyi', dekɛ zotɔ la toŋe ga'arehe la. 15Ge bama te n bo ba futo tooma bo'olom wan pɛ' gankerɛ nyɔn'ɔn funiho eŋɛ tanɛ peka la n ne yɛ bahɛ nyɔn'ɔn zuo wo ba maalɛ fugiriga n yɛɛre baha duma zuo la se'em la. Dekɛ sanlema guno, gun sɔbele pɔɔnhegɔ, la gun mɔlɔgɔ, la gun mɔle mɛŋka, tanɛ peelega finfiinhe lagom taaba pɛ' funiho wa. 16Yunre tanɛ la boyi', pɛ' funiho la, te bo dɛna mɔkɔ, te bo yaleŋa dɛna tabatɛ, te bo woko me dɛna tabatɛ. 17Te ba nya dekɛ sanlenkuga la tagalɛ taaba sugumnɔɔren bonaahe tanɛ la zuo sige na, kuga atan' se'a n tagalɛ taaba yia la dela mɔlebagenɛ tagala mɔlɔdɔɔnrɔ nya tagala zenzagemɔlegɔ. 18Kugu se'a atan' n tagalɛ taaba sugumnɔɔren boyi' la me dela kugu dɛnlemadɛntɔ tagala poonhogɔ tagela beheŋa kugure. 19Kugu se'a atan' n tagalɛ taaba sugumnɔɔren botan' la dela kugu dɛnlemadɛnpoohogɔ tagela kugu ponpɔnra nya tagala kugumɔlɔgɔ. 20Kugu se'a atan' n tagalɛ taaba sugumnɔɔren bonaahe la dela kugu peele tagela ponpɔnrɔsabelega nya tagala am kugure. Ge dekɛ sanlema kure banhe dekɛ kuga wa ferɛ se poan. 21Kuga la zan'an dela kugu pia la ayi', ŋma lama lama, te ba golehɛ Israel dayɔɔhe pia la seyi' la la yu'ura eŋɛ a zuo. 22Kure sanlema zɔntɔ te to ane baanlehe baanlehe wo guno la nyɛɛre baha nyɔn'ɔn funiho zuo la. 23Ge dekɛ sanlema kure banhe seyi' ga' nyɔn'ɔn funiho la poan. 24Nya dekɛ sanlema zɔntɔ la n ane wo guno la tuhe sanlema banhe seyi' la nɔya ayi' la poan funiho la zuo, 25te zɔntɔ toyi' la nɔya wan dekɛ tuhe banhe seyi' la nɔya la poan, gi de tara te de paga fugiriga zuo la kaŋkaŋe. 26Te ba wan kure sanlema banhe seyi', dekɛ ba gorɛ funiho la kenkɛlehe n boe fugiriga la. 27Kure sanlema banhe seyi', dekɛ se ga' fuo la bɔgɔrɔ tana la teŋa bɔba na, 28nya dekɛ funiho la banhe la, ta ga' la fugiriga la banhe la n ga' ko bɔgɔrɔ tana la poan la banhe la, te la gin' funiho la tara te de da ka lɔrɔgera. 29Saŋa woo, Aron n wan ziira Israel dayɔɔhe wa gankerɛ funiho la poan a nyɔn'ɔn zuo kɛn'ɛra Saraa la poan na tɛɛnha Na'ayenɛ se'em n bala. 30Dekɛ Urim la Tumim n wone taaba eŋɛ bini, te a bɔna Aron nyɔn'ɔn zuo, saŋsɛka woo te a yɛ'a Na'ayenɛ zen'an na. Saŋa woo, Aron n wan ziira Israel buuri wa gankerɛ a nyɔn'ɔn zuo kena Na'ayenɛ nɛŋan na se'em n bala. 31Dekɛ guno n de sɔbele pɔɔnhegɔ wogɛ pɛ' fuwoko seko n de sɔbele pɔɔnhegɔ la. 32De wan ŋmaɛ zuo tuhega zen'an la wo fukanra zuo tuhega zen'an n ne ŋmaɛ se'em la, nya kpa' zuo tuhega zen'an la kae, te la da ta'an aanhegɛ. 33Fukona mea teŋa na kpamehegɔ zen'an la, dekɛ guno n de sɔbele pɔɔnhegɔ la gun mɔlɔ la gun mɔle mɛŋka pɛ' *pomegranate yule, ge dekɛ sanlema loma la me pɛ' yule mu'uro la teŋasoka kae fuo la. 34Pɛ' loma la yule lɛm guno *pomegranate woo kae fuo la teŋa kpamehegɔ zen'an la zan'an. 35Aron han ne bɔna mam sogorɛ la poan, tona bɔ'ɔra mam, a ne yɛ fukoŋɔ, a han kɛn' mam Saraa la poan ha tona, loma wan ŋmɛ'ɛra baha na, a han le yehe yia bɔ'ɔ la poan na, loma la wan ŋmɛ'ɛra la bala mea pa'ala te a ka ki. 36Dekɛ sanlema kure bonlamehega, te ho golɛ ka te Na'ayenɛ Ma'an Denɛ, 37ge dekɛ guŋo n de sɔbele pɔɔnhegɔ pɛ' ka lamenɛ zuvɔnka la nɛŋa tontɔɔ. 38Aron ne vuge zuvɔnka wa, te golehegɔ wa bɔna a nɛŋa tontɔɔ, Israel buuri wa han ta tue la se'ere ba kaanbegɔ bo'olom la poan, Aron n wan zi tuudenɛ. Aron ne vuge golehegɔ wa a gbe'ere zuo, te la bahɛ te Na'ayenɛ zɔta ba ninbɔn'ɔn. 39Dekɛ tanɛ n de peelega pɛ' fuseko n ne yɛ tagalɛ yia fuo la, ge dekɛ peelega bala mea zuvɔnka la, ge dekɛ fupinho kpa' golɛ tan peelega deyema poan, te denɛ dɛna sɛganɛ. 40Pɛ' fupeelo la sɛgana la zuvɔngɔhe, yɛɛlɛ Aron dayɔɔhe la me. Pɛ' lɔgɔtona wa te to dɛna na'ahegɔ la soŋa bo ba. 41To han pɛ' ba'ahɛ, ho dekɛ to bagɛ Aron, la a dayɔɔhe wa, sɔ' ba la kaam, te ba dɛna malemadoma tona bɔ'ɔra mam. 42Dekɛ tan peelega pɛ' kuregerehe te ba segelɛ poan, te ba iŋa zen'an da nyɛta, se ze'ele ba sea zuo wa'ana paɛ ba duma beene. 43Aron la a dayɔɔhe wa han ne yɛ'a kɛn'ɛra Sogorɛ la poan na, bii kaanbegɔ daka la Saraa la poan ha te ba kaanbɛ mam, ba sɛnga kurehe sena wa poan ha, han dagana bala ba wan tare ganleŋɔ wa'an ba mɛhe zuo na, te ko ko' ba. Toondena wa wan dɛna la Aron, la a yaahe buuri se'a n wan wa'an pooren na la, wan yɛɛra tona bɔ'ɔra mam yɛ'ɛha.

will be added

X\