Yɛhega 27

1Dekɛ zaaŋa dɔɔrɔ maalɛ kaanbegɔ daka, te ka woko dɛna santira anuu, te ka yaleŋa dɛna santira anuu, te ka dɛna daka mɔkɔ, te ka saazuo woko dɛna satira atan'. 2Dekɛ dɔɔ tonɔ mea peehe iila ferɛ daka la zuin na, ka kenkɛlehe senaahe la woo poan, dekɛ nyɔgom takɛ ka zan'an. 3Dekɛ nyɔgom kure dogorɔ tara vaara nyɔ'an tampegelom la, daka wa poan, la vaahe la laahe la bugum kuto la dia dogorɔ. 4Dekɛ nyɔgom kure ze'ehega kantɛ, la banhe senaahe kɛn'ɛhɛ ze'ehega la loga anaahe la poan. 5Te ka kɛn' daka la teŋa fiin ha, 6te ho maalɛ zaaŋa dɔɔsaala, takɛ to la nyɔgom, te dɔɔ tonɔ tara ziira daka la. 7Dekɛ dɔɔsaala wa tuhe banhe la te ho kure tuhe daka la loga anaahe la poan la, te koyema bɔna loge dena, te koyema me bɔna loge dena, te daka la bɔna teŋasoka te ne gorɛ dɔɔrɔ la ziira ka. 8Bɔgɛ dɔɔrɔ la lama lama, maalɛ daka la te ka tara loga, ge kɔ'. Maalɛ sɛla woo wo mam pa'alɛ ho se'em zoore wa zuo wa. 9Hom n wan maalɛ Sogorɛ la yeŋa zenzaka, la se'em dela, gɔbega bɔba la, dekɛ tan peela, te a woko dɛna santira kɔbega, yule yeŋa dɔɔrɔ la zuo, pin' zenzaka la bilam bɔba. 10Dekɛ nyɔgom takɛ dɔɔseto pihiyi' la, ge dekɛ nyɔgom kure ze'elehe pihiyi' sɛ bilam bɔba ha, ge dekɛ sanlenpeelega maalɛ banhe se'ehe, n wan bɔna bilam bɔba la. 11Zuɔ nu'o bɔba yeŋa la me na, eŋɛ bala mea. Dekɛ tan aŋa mea, te a woko dɛna santira kɔbega, te ho dekɛ a lo yule bilam bɔba yeŋa dɔɔrɔ la zuo, pin' zenzaka la bilam bɔba, te dɔɔseto la me dɛna pihiyi', te nyɔgom takɛ tɔ, ge dekɛ nyɔgom kure to ze'elehe me pihiyi', dekɛ sanlenpeelega maalɛ banhe se'ehe n wan bɔna bilam bɔba la. 12Nɛŋa bɔba na yeŋa zenzaka la me, tan se'a n wan lo yule pin' bilam la woko dɛna santira pihinuu, te dɔɔseto la me dɛna pia, te to ze'elehe dɛna pia. 13Pooren bɔba zenzaka la me yaleŋa dɛna santira pia la pihinuu. 14Tama la woko wan dɛna la santira pia la anuu, lo' yula dɔɔseto totan' n yage to ze'elehe zuo la, pin' zenzaka la logerɛ deyema. 15Tama a se'a me te a woko dɛna santira pia la anuu me, wan lo' yula dɔɔseto totan' n yage to ze'elehe zuo, pin' zenzaka la logerɛ deyema la me. 16Han dɛna nayaŋa sɛka n dole kɛn'ɛra yeŋa zenzaka la poan na la, dekɛ tanɛ n de sɔbele pɔɔnhegɔ, la tam mɔlɔgɔ, la gum mɔlɔgɔ, la tam peelega, te ba woko dɛna santira pihiyi', te se'em n mi' futo kpa'a kpa' tama la soŋa, lo yule dɔɔrɔ tonaahe la, n wan sɛ to ze'elehe senaahe poan dɛna nayaŋa la zuo, te la yula pin' nayaŋa la. 17Dekɛ sanlenpeelega takɛ dɔɔseto seto woo n wan dekɛ sɛ kae zenzaka la zan'an la, ge dekɛ sanlenpeelega kure banhe tuhe to poan, dekɛ nyɔgom kure ze'elehe. 18Zenzaka la woko wan dɛna la santira kɔbega, te ka yaleŋa dɛna santira pihinuu, te ka saazuo woko dɛna santira anuu, te se'em n mi futo kpa'a kpa' tanpeelehe la soŋa, te bama yule pin' zenzaka la kae ge dekɛ nyɔgom kure ze'elehe bo dɔɔseto la. 19Dekɛ nyɔgom kure lɔgɔseto woo n wan tara tona Sogorɛ wa tooma la, la zenzaka kpa'ahe la woo. 20Bo' Israeldoma wa nɔɔrɛ te ba ŋmɛkɛ kaam somɔ tare na, tara lameha butoleladoma la saŋa woo. 21Sogorɛ la poan, tanɛ la n beŋe de seko bahɛ pooren na la, bilam te Aron, la a dayɔɔhe wan bɔna mam nɛŋan, tona kaanbegɔ tooma la zanɔɔrɛ, yelegera beere. De dela toolom toonɛ, te bama n wan tona dɛ saŋa woo, Israeldoma wa poan.

will be added

X\