Yɛhega 26

1Dekɛ tanɛ peelega n paɛ pɔgomfuto pia, la guno sɔbele pɔɔnhegɔ la guno mɔlɔgɔ la guno mɔle mɛŋka wogɛ tama la, te se'em n mi' futo kpa'a, kpa' kelompagehedoma eŋɛ tama la poan te ho dekɛ pile Sogorɛ la. 2Tama la deyena woo woko dɛna santira pihiyi' la a nii, te tanɛ woo yaleŋa dɛna santira anaahe, tama la woo zona taaba. 3Dekɛ tama anuu pɛ' lagom taaba, ge dekɛ anuu me pɛ' lagom taaba. 4Dekɛ tanɛ n de sɔbele pɔɔnhegɔ, ŋma dɛ yure, pɛ' lamenɛ tama anuu la en pɛ' lagom taaba te se'ere bɔna kenkɛleŋa la, ge le eŋɛ tama anuu se'a n gee pɛ' lamenɛ taaba la me kenkɛleŋa bala. 5Ŋma tanɛ sɔbele pɔɔnhegɔ wa baanlehe baanlehe, bonɔ pihinuu, pɛ' lamenɛ tama anuu la te ho pɛ' lamenɛ taaba la, ge le ŋma tanbaanlehe mea pihinuu pɛ' lamenɛ tama anuu se'a n pɛ' ba lamenɛ taaba la me. Pɛ' ba tagalɛ taaba. 6Ge dekɛ sanlema kure ga'arehe pihinuu, dekɛ ga' tama la lagom taaba te la ve'e Sogorɛ la naɛ taaba, te ko ana munɛ munɛ. 7Dekɛ boohe konberɔ wogɛ tanɛ pile Sogorɛ la, te ba tanyalema pia la deyena. 8Boohe konberɔ tama la deyena woo woko dɛna santira pihitan', te to yaleŋa dɛna santira anaahe. Bahɛ te boohe konberɔ futo pia la koyena la zan'an zona. 9Dekɛ konberɔ tama la anuu pɛ' ta' taaba, ge dekɛ ayoobe la n gee la me pɛ' ta' taaba, te tamse'a n pa'ahere ayoobe la, ho nyunre koŋɔ pin' Sogorɛ la nɔɔrɛ la. 10Ŋma tanbaanlehe mea bala pihinuu, pɛ' lamenɛ konberɔ tama la te ho pɛ' ta' taaba la kenkɛleŋa, ge le ŋma tanbaanlehe mea bala pɛ' lamenɛ konberɔ tama na la me kenkɛleŋa. 11Ge dekɛ nyɔgom kure ga'arehe pihinuu, dekɛ ga' konberɔ tama la ta taaba te la ve'e sogorɛ la naɛ taaba. 12Tama la n pile ge gee yula se'em woo na, a yula bala pin' Sogorɛ la pooren na. 13Santire n wan gee yula zen'an kayema, te santire me gee yula zen'an kayema pin' Sogorɛ la. 14Dekɛ peraahe gana n vɛɛn maalɛ a, dekɛ aŋa pile taɛ sogorɛ la. Ge nya dekɛ gana n kpe'em, maalɛ a, te aŋa denɛ dɛna sɛla n wan pile taɛ Sogorɛ la yeŋa na. 15Ŋma zaaŋa dɔɔrɔ te dɔɔ tonɔ dɛna Sogorɛ la dɔɔrɔ. 16Dɔɔ woo woko dɛna santira pia te to kantɛ dɛna santire la girigo, 17Dekɛ yagoma ayi' n wan tuhe dɔɔ woo poan, te ko tana ze'elehe la poan. Eŋɛ Sogorɛ dɔɔrɔ la woo bala. 18Maalɛ Sogorɛ dɔɔrɔ pihiyi', te dɔɔ tonɔ dɛna sogorɛ la gɔbega bɔba dɔɔrɔ, 19ge dekɛ sanlenpeelega kure ze'elehe pihinaahe bo dɔɔrɔ pihiyi' la, yia dɔɔ woo tare la yagoma ayi' a bala, ze'elehe seyi' te yia dɔɔ woo dekera, te dɔɔseko n tagalɛ la me tare la yagoma ayi' me dekera ze'elehe seyi'. 20Sogorɛ la zuɔ bɔba dɔɔrɔ pihiyi' la me wan ane la bala mea, 21tara sanlenpeelega ze'elehe pihinaahe, te yia dɔɔ dekera ze'elehe seyi', le tagela dɔɔ me dekera ze'elehe seyi' mea. 22Sogorɛ la nɛŋa bɔba na la, bo dɔɔrɔ toyoobe bilam, 23maalɛ dɔɔrɔ toyi', dekɛ tonɔ sɛ Sogorɛ la bilam bɔba sɛngehe la poan. 24Dɔɔrɔ la teŋa na, zɛ'a yema yema, ge to zuin ha ta' taaba yia baŋa la. Ge dɔɔ tonɔ toyi' la n wan ana se'em n bala, tonɔ n wan goŋe sɛngehe seyi' la. 25Bala, dɔɔrɔ tonɔ la wan dɛna la tonii, la to sanlenpeelega ze'elehe dɛna pia la seyoobe, dɔɔ woo ze'elehe seyi'. 26Ge dekɛ zaaŋa dɔɔrɔ peehe dɔɔsaala tonuu bo te tonɔ dɛna Sogorɛ la logerɛ deyema, 27ge peehe dɔɔrɔ tonuu bo logerɛ deyema, ge tonuu bo nɛŋa bɔba na la. 28Teŋasoka dɔɔ la wan doohe yeŋa kɛn'ɛhɛ na, te ka porogerɛ pagelɛ dɔɔseto la zuo, ta yehe. 29Dekɛ sanlema takɛ dɔɔseto la woo, ge dekɛ sanlema kure banhe kɛn'ɛhɛ dɔɔseto la poan, te dɔɔsaala tuhe se poan. Takɛ dɔɔ tonɔ me la sanlema. 30Dekɛ lɔgɔtona woo tin' Sogorɛ wa, woo mam n pa'alɛ ho se'em zoore wa zuo wa. 31Dekɛ gun sɔbelɔ la gun mɔlɔ la gun mɔle mɛŋka la tan peelega, te se'em n mi' tama kpa'a, kpa' kelompagehedoma eŋɛ tama la poan. 32Te tama aŋa ta lo yule dɔɔseto tonaahe la te sanlema takɛ tɔ, te to zɛ'a to salenpeelehe ze'elehe zuo te banhe yula to poan la. 33Dekɛ tanɛ la lo' yule poan ha banhe la poan, beŋe Sogorɛ wa boyi', dekɛ nɔbiŋere daka la kɛn' Sarai la ha, tanɛ la Pooren ha la, ta ze'ele. 34Dekɛ be'em duuhego liŋa la, vuge nɔbiŋere daka la ka ze'elego zen'an, Saraa la poan ha. 35Ge dekɛ tebole la ze'ele tanɛ la n beŋe Sogorɛ wa la pooren na, te butolela zɛ'ɛlega la me zɛ'a gɔbega nu'o bɔba, te tebole la me zɛ'a zuɔ nu'o bɔba. 36Dekɛ gun sɔbelɔ la gun mɔlɔ la gun mɔle mɛŋka la tan peelega, te se'em n mi' futo kpa'a kpa' tɔ te ho dekɛ yule pin' Sogorɛ wa nɔɔrɛ. 37Peehe zaaŋa dɔɔsaala tonuu, te tonɔ dɛna nɔɔrɛ la dɔɔrɔ, te ho dekɛ sanlema takɛ tɔ, ge dekɛ sanlema kure banhe yule to, ge dekɛ nyɔgom kure ze'elehe senuu, te dɔɔrɔ tona wa yaga se zuo, te tanɛ dena wa lo' yule pin' nɔɔrɛ la.

will be added

X\