Yɛhega 24

1Ge Na'ayenɛ nya yele Moses yeti, Zom mam zen'an na, hom, la Aron, la Nadab, la Abihu, la Israel keendoma pihiyopɔe la. Ya han wa'ana, ba zɛ'a kenkɛleŋa ha, ge po'oha. 2Moses ma'an n wan lɛm mam na, ge bana la woo da lɛm na. Nɛresɛba n yee la da lagom doohe zom na. 3Te Moses wa'ana yele Na'ayenɛ n yele se'em woo la a nɔze'elego la te a ze'ele bo ba la woo, te nɛreba la zan'an lagom yele boyena yeti, Na'ayenɛ n yele to sɛla woo la, te wan eŋɛ. 4Te Moses golehɛ Na'ayenɛ n yele sɛla woo la, ge ihege bolika yu'uŋyu'uŋɔ ta mɛ' bimbine zoore la tilin, dekɛ kuga pia, la ayi' sɛ', te a ze'ele bo Israel yizuto pia la toyi' la, 5ge nya loe bodibinto Israel nɛreba la poan, te bama keŋɛ ta kaanbɛ nyɔ'an bo'olom kaanbegɔ, ko lɔlehe, te bama dɛna popeelom bo'olom bo Na'ayenɛ. 6Te Moses poregɛ ziim la boyi', eŋɛ laahe poan, ge dekɛ posoka la n gee la, miihe bimbine la kae, 7ge nya dekɛ nɔbiŋere gɔŋɔ la, kaanlɛ kɔ poan bo nɛreba la, te ba lebehe koŋkoyenɛ yeti, Sɛla woo te Na'ayenɛ yele, to wan nam. 8Te Moses dekɛ ziim la miihe nɛreba la zuo, ge yele ba yeti, ziim wa dela Na'ayenɛ nɔbiŋere la te a biŋe la ya la, maanɛ. 9Te Moses la Aron la Nadab la Abihu la Israel keendoma pihiyopɔe zom zoore la zuo, 10ta nyɛ Israel Yenɛ la, te a ze' sɛla n ane wo sore la zuo, te de dɛna kuga poonhogɔ kɔ'ɔn nɛɛ wo Yenɛ yire poan la. 11Ge te Yenɛ ka eŋɛ Israel keendoma wa se'ere, ba nyɛ la Yenɛ, ge kelom vɔna la ba nyoɔnrɛ, dita ge nyuura. 12Te Na'ayenɛ yele Moses yeti, Zom paɛ mam zoore wa zuo na, te n dekɛ kuge lameha la te n golehɛ n pa'alegɔ la n nɔya eŋɛ a poan la bo ho. 13Te Moses ihege la a soŋora Yosua, zɔna Yenɛ zoore la zuo, 14ge yele keendoma la yeti, Ze' ya ka'lam gura te to ta lebe ya zen'an na. Aron la Hur wan dekɛ tomam na'arɛ bɔna la ya, gura te to ta lebe na, hom se'em n tare yelese'ere, ho tare keŋɛ ba zen'an. 15Te Moses zɔna zoore la, te saŋgbanɛ pin' de. 16Te Na'ayenɛ na'ahegɔ sige Sinai Zoore wa zuo na, te saŋgbanɛ wa pin' zoore la dabeha ayoobe, dabeha ayopɔe daarɛ la, te Na'ayenɛ ze'ele saŋgbanɛ la poan yi Moses na. 17Na'ayenɛ na'ahegɔ la n nɛɛ se'em zoore la zuo wo bugum n taɛ mɔen la, Israeldoma la ninin. 18Te Moses zom zoore la, ta kɛn' saŋgbanɛ la poan ha. Moses boe zoore wa zuo la dabeha pihinaahe, yu'uŋɔ la wontɛɛŋa zan'an.

will be added

X\