Yɛhega 23

1Da tara yelese'ere n dagɛ sera tɔgɔra. Da naɛ la potɔpa parom sagom se'em. 2Ho han dɛna aze'elenyɛdaana yele poan, da naɛ la nɛrekooŋɔ la n bote se'em la lagom parom la ba, gu' yelemɛŋɛrɛ la, 3bii ho mina ge zɔ nɛra ninbɔn'ɔn yele poan te a de naha zuo. 4Ho han to'ohɛ ho diŋdaana lɔlega, bii boŋa te ka bɔregɛ yɛ'a, gu' ka lebe na bo en. 5Ho han nyɛ se'emdaana n yaɛ hɔ, te a boŋa zi lɔgɔrɔ n tebegɛ gaŋɛ ka, te ka lu gan'an, da bahɛ ka, soŋɛ te ka ihege. 6Da faanra nahadoma yelemɛŋɛrɛ yetɔgom poan. 7Da kɛn'ɛra ponpɔrɔŋɔ yela poan, bii koora sɛba n ka tare taalɛ, bii yelemɛŋɛrɛdaana, mam kan bahɛ be'emdaana la naana. 8Da to'e mu'ure bo'olom, mu'ure bo'olom pin'ire la nyɛta nini, te ba ka nyɛta sɛla n nare, ge sagona sɛba n de tontɔɔdoma. 9Da namehɛ saana, ya mɛhe mi' lan tɔe bo saana se'em, se'ere zuo, ya tabele dɛna saama Mizraim teŋa poan nyɛ. 10Yuuma ayoobe te ya ne wan bɔta, ge kɛ'ɛra dia ya samana zuto, 11ge yuuma ayopɔe poan la, ne bahɛ ya te ya samana la gan'an bala, da kɔ ya, da tom ya a zuo, te sɛba n de taromdoma ya poan la wan doohe a poan yi'iha dia, te dunhe me ɛɛra a zuo ɔbera yaan se'a woo n boe a zuo la. Bahere ya ya tiihe wɔla vatɔ la ya kaam tia vatɔ la me bala. 12Dekɛ ya dabeha ayoobe tom ya tooma, ge dabeha ayopɔe daarɛ la, da tom toon toonɛ, ne bahɛ ya te ya nii, la ya bonhe, la ya yamehe, la sɛba woo n de saama kɛn'ɛra la ya la vo'ohe de daarɛ. 13Ma'ɛn ya mɛhe eta sɛla woo te n yɛta bɔ'ɔra ya wa. Da pon pote ya yena se'a yu'urɛ, da bahɛ ya te baga se'a yu'ura yehe ya nɔya wa poan. 14Yuunɛ woo poan, ya dɛ'ɛna de'enɔ totan' bɔ'ɔra mam. 15De'ene ya Boroboro N Ka Tare Mi'ihom De'eŋɔ la, la han ne paɛ de'eŋkoŋo saŋa, ya ne obe boroboro n ka tare mi'ihom ka poan, se'ere n ka tare mi'ihom de poan la, dabeha ayopɔe, wo mam bo ya nɔɔrɛ se'em la. De'ene ya de'eŋɔ wa ko saŋa la poan n de Abib ŋmarega la poan la, ŋmarekaŋa poan te ya ze'ele Mizraim teŋa poan yehe na. Se'em da wa'an mam nɛŋan saŋkaŋa poan na la nu'beela. 16De'ene ya Dideena Kɛ'a De'eŋɔ la Kɛ'ɛŋa Ba'ahɛ De'eŋɔ yuunɛ woo.. 17Yuunɛ woo, boraahe la ne wan lagahɛ Na'ayenɛ wa n de ya Yenɛ wa nɛŋan na la sugumnɔɔren botan'. 18Da ne dekɛ ya sɛla te mi'ihom bɔna la poan, lagom kaanbɛ kaanbegɔ la bo mam, bii ya bahɛ te nɛnɔ kaam la te ya dekɛ kaanbɛ bo mam de'eŋɔ kona wa poan, gee ze'ele yelegɛ beere. 19Ganhɛ ya ya va'am poan dideena la tare wa'an Na'ayenɛ ya Yenɛ la yire la poan na. Da tare ya boa bin'ihom dogora ka bia nɛnɔ. 20N wan tom n soŋora te a bɔna ya nɛŋa, gu'ura ya ta paɛ zen'an te n maahom ka biŋe ya la poan. 21Eŋɛ ya kɛle, ge kɛleha en yeti ya sɛla la. Da bire ya pɔya bahɛ en, a kan di suguru bo ya pobirega la. Mam n tom en na. 22Ge ya han ana kɛle, ge kɛleha en yeti ya sɛla la soŋa, ge eta mam n pa'ale ya sɛla la, n wan dina la ya dima, ge yaɛ yan yaɛ se'em. 23Mam soŋora wa han bɔna ya nɛŋa, tare ya na kɛn'ɛhɛ teŋse'ehe n de Amoridoma, la Hitidoma, la Perizidoma, la Kanaandoma, la Hivdoma, la Yebusdoma teŋhe la poan, ge te n tee piihe ba yehe ba teŋhe la poan ba'ahɛ. 24Da pɔnte ya na'ma bɔ'ɔra ba baga la, bii ya po'oha ba, bii ya tɔgeha ba etegɔ, ton sagom ya ba, ge kɔ' ba toolom dɔɔrɔ la buuri buuri. 25Po'ohere ya Na'ayenɛ la n de ya Yenɛ la, ge n wan kan' som bahɛ ya boom, la ya saahe poan, n wan gu' ban'ahe ya zen'an bahɛ, 26ya mina mina kan dɔgɛ bahɛ, bii kondɔgɔrɛ bɔna ya poan. N wan bo ya vom n seke. 27N wan tom dabeem te bo bɔna ya nɛŋa gbirigera nɛresɛba woo te ya to'oha la, ya wan nyɛta la ya diŋdoma la pɔya ma'an 28N wan tom too, te ko tole ya nɛŋa ta sa'ahɛ Hivdoma, Kanaandoma, la Hitidoma la n boe ya nɛŋan ha la bahɛ. 29Ge n ka yeti n kɔ'ɔn sa'ɛ ba yuum yenɛ poan, n han eŋɛ bala, nɛreba kan bɔna teŋa la loga zan'an poan, te bala wan bahɛ te mɔen dunhe ye'ɛ gaŋɛ ya, nya daana ya. 30N yeti n sa'aha ba la finfiinhe, te ba yɛhera, ge te yamam me ye'era peta teŋa la. 31N wan dekɛ ya teŋa la beene ze'ele la Mɔgɔ Mɔlega la nɔɔrɛn, ta paɛ Pilistidoma Mɔgɔrɛ la, le ze'ele mɔen la, tare na paɛ Kolaa la poan. N wan dekɛ nɛresɛba n sɔe teŋa wa enŋa ya nu'uhen, te ya sa'aha ba. 32Da biŋe ya nɔɔrɛ la ba, bii la ba baga la. 33Da bahɛ ya te ba kɛn'ɛra la ya teŋa la poan, se'ere zuo, ba wan bahɛ te ya tom be'em bo mam, ba baga kaanbegɔ la wan ba'ahom dɛna bɛnregɔ bo ya.

will be added

X\