Yɛhega 20

1Te Yenɛ mɛŋa tɔgɛ yele ana wa yeti, 2Mam de Na'ayenɛ ya Yenɛ. Mam daa tare ya ze'ele Mizraim teŋa ya yamenɛ la poan yehe na la. 3Da tare ya yenɛ pa'ahɛ mam. 4Da yagom ya sɛla wɔnhom n boe saazuin ha, bii sɛla n boe teŋa teŋa ha, bii ko'om poan poan ha. 5Da na'ahɛ ya ba, bii ya po'oha ba. Se'ere n sɔe la mam Na'ayenɛ ya Yenɛ la, dela nyuunre Yenɛ, namehera kɔma, ba sɔyaabdoma be'em zuo, sɛba n zagahɛ mam la, ba yaahe setan' yɛ'ɛha senaahe ha. 6Ge n tare nɔŋerɛ dɔla yaahe tuha tuha n nɔŋɛ mam ge dɔla mam bo n nɔɔrɛ se'em la. 7Da yi'ira Na'ayenɛ ya Yenɛ la yu'urɛ yoo. Na'ayenɛ kan bahɛ hom se'em n yi'ire a yu'urɛ yoo yoo. 8Tɛnra Vo'ohogo Daarɛ la te de dɛna toolom dabaherɛ. 9Dabeha ayoobe n de tooma dabeha. 10Ge ayopɔe daarɛ la dela Vo'ohogo Daarɛ bo Na'ayenɛ ya Yenɛ la. Da tom ya toonɛ de daarɛ, ya mɛhe, bii ya dayɔɔhe bii la ya pɔyɔɔhe bii ya yamehe bii ya pɔgɔsɔɔrɔ bii ya dunhe bii saana n kɛn'ɛra la ya. 11Dabeha ayoobe te Na'ayenɛ dekɛ maalɛ saazuo, la teŋparɛ wa, la ko'kantɛ wa, la sɛla woo n boe ba poan la, ge vo'ohe yopɔe daarɛ la. Bala zuo te Na'ayenɛ kan' som bahɛ dabeha ayopɔe daarɛ wa poan, ge eŋɛ dɛ te de dɛna toolom dabaherɛ. 12Na'aha ho sɔ la ho ma. Bala te ho wan tara vom woko teŋsɛka te ya Na'ayenɛ ya Yenɛ la dekera bɔ'ɔra ya wa poan. 13Da ko' nɛra. 14Da gan'anrɛ la ho tadaana pɔga bii ho tadaana sera. 15Da zun'. 16Da parom la tadaana yele. 17Da bahɛ te ho potɛn'ɛrɛ bɔna nɛra yire poan. Da bahɛ te ho potɛn'ɛrɛ bɔna nɛra pɔga bii a yameŋa bii pɔsɔɔ bii a lɔlega bii a boŋa bii sɛla n yeen dɛna nɛra bonɔ poan. 18Nɛreba la n ze' ge wom saa la n tanhere, ge nyagera, te tentanɛ la peebere paŋa, ge nyɛ zun'uhe la n pin' zoore la se'em la, te dabeem kɛn' ba. Te ba lebe ta zɛ'a kenkɛleŋa ha, 19ge yele Moses yeti, Hom mɛŋa tɔgɔra bɔ'ɔra tɔ, ge to wan kelehe, da bahɛ te Na'ayenɛ la tɔgɔra, ge te wan ki. 20Te Moses lebehe yele nɛreba la yeti, Da bahɛ ya te dabeem tara ya, Yenɛ wa wa'ana te a makɛ ya behɛ mɛ, wana wan bahɛ te Yenɛ zɔɔlom la kɛn' ya, te ya kan tona be'em. 21Te nɛreba la yee zɛ'a kenkɛleŋa la ha, ge te Moses ma'an tuta kɛn'ɛra lika la poan te Yenɛ bɔna ha la. 22Te Na'ayenɛ yele Moses yeti, Yele Israeldoma la yeti, Ya mɛhe nini nyɛ mam n ze'ele saazuo ha tɔgɛ bo ya na, 23da dekɛ ya sanlenpeelega, maale baga pa'ahɛ mam poan, bo ya mɛhe, bii ya dekɛ sanlema maalɛ baga bo ya mɛhe. 24Tun' ya tentɔnɔ wa mɛ' bimbine bo mam, la ya kaanbera ya nyɔ'an bo'olom, la ya popeelom bo'olom la ya piihe la boohe la nii de zuo bɔ'ɔra mam, zen'sɛka woo te n ne bɔta te n yu'urɛ wa pota bini la. N ne wan wa'an ya zen'an bilam na, la n kan' som bahɛ ya zuo. 25Ya han dekɛ la kuga mɛta bimbine bɔ'ɔra mam, da ŋma ya a, ya han dekɛ ketega kalom kuguse'a te ya yeti ya dekɛ mɛ mam bimbine la, ya ganlom ka mɛ n bala. 26Da mɛ' bimbine zom saazuo ha nya ne zom ha ta nyiga te se'em ta nyɛ ho beele.

will be added

X\