Yɛhega 19

1Ŋmarehe setan' pɔhega poan, bala ma'an te Israeldoma wa pon yehe Mizraim teŋa poan mɛ keŋɛ na paɛ Sinai mɔen la na. 2Ba ze'ele la Arepidim teŋa, keŋɛ bala na kɛn' Sinai mɔen la, nya tiihom Sinai Zoore la nɛŋan bilam. 3Te Moses zom Yenɛ zen'an zoore la zuo, te Na'ayenɛ yi' en zoore la zuo ha, yele en yeti, Yele Yakob yiredoma wa, la Israeldoma wa zan'an yeti, 4ya mɛhe nini nyɛ mam n eŋɛ Mizraimdoma wa se'em, ge dekɛ yamam yagelɛ tuguho kelompagehe zuo tare ya na bo n mɛŋa se'em. 5Bala, nananawa, ya han wan nana mam nɔɔrɛ, ge tara mam nɔbiŋere la soŋa, yamam n wan dɛna mam toolom lɔkɔ teŋa wa nɛreba woo poan. Teŋa wa woo dela mam denɛ, 6ge yamam teŋa wa wan dɛna la malemadoma teŋa, toolom teŋa n de mam ma'an denɛ. Tɔgɛ yele ana wa bo Israeldoma la. 7Te Moses ze'ele zoore la zuo sige na, yi' Israeldoma keendoma la zan'an lagahɛ, dekɛ yelese'a woo te Na'ayenɛ tɔgɛ bo en te a tɔgɛ bo ba la biŋe ba nɛŋan. 8Te nɛreba la zan'an ko nɔyenɛ lebehe yeti, Na'ayenɛ n bo to nɔse'ere woo, to wan doohe. Te Moses tare nɛreba la lebehegɔ la lebe ta bo Na'ayenɛ. 9Te Na'ayenɛ yele Moses yeti, N yeti n bɔna la saŋgbanɛ sɔbelegɔ la poan wa'an ho zen'an na, tɔgɔra la hɔ te nɛreba la wom. Bala te ba wan nana hɔ saŋa woo. Moses n tare nɛreba la lebehegɔ la ta yele Na'ayenɛ la. 10Na'ayenɛ yele Moses yeti, Lebe sige ta paɛ nɛreba la, la ho maahom ba soŋa te ba dɛna toolom bonɔ, zina la beere. Bahɛ te ba pee ba futo. 11La ta paara dabeha atan' daarɛ la, te ba pon maahom ba mɛhe ba'ahɛ. Se'ere n sɔe la, daanden daarɛ, mam, Na'ayenɛ wan sige Sinai Zoore la zuo, nɛreba la zan'an nɛŋan na. 12Boonhɛ beena kae zoore la, ge yele nɛreba la n kae zɛ'a la te, ba behɛ ba mɛhe soŋa, la da zom zoore, bii ba kalom dɛ. Se'em woo n kalom dɛ, ya ko en. 13Ya da dekɛ nu'o kalom a daana, lobe ya a en la kuga, bii ya tɛn' en la pɛɛma ko. Duŋa bii nɛresaala han kalom zoore la, ya ko en. Ge tentanɛ han ta peebe paŋa paŋa na, nɛra woo nya ta'an zom zoore la zuo. 14Te Moses ze'ele zoore la zuo sige wa'an nɛreba la zen'an na, nya maahom ba, bahɛ te ba pee ba futo. 15Te a yele ba yeti, Maahom ya ya mɛhe gura dabeha atan' daarɛ. Se'em da lagom la pɔka. 16Dabeha atan' daarɛ la bolika, te saa kɔ'ɔn tanhera, ge yagera, ge te saŋgbanɛ sɔbelegɔ kɔ'ɔn pin' zoore la tape', te tentanɛ kele. Te nɛra woo n boe tiiheŋɔ la poan la zɛ'a te ba iŋhe gbe'era. 17Te Moses ihege tare nɛreba la ba tiiheŋɔ la poan na, te ba to'ohɛ Na'ayenɛ. Te ba paana zɛ'a zoore la tilin. 18Te Sinai Zoore la pin' la zun'uhe tape'. Se'ere n sɔe la, Na'ayenɛ n sige de zuo na la bugum. Te zun'uhe gulugera zɔna saazuo ha, wo bugum n taɛ mɔen dita te zun'uhe gulugera se'em la, ge te zoore la zan'an miina, 19te tentanɛ la peebego la malom pa'aha paŋa paŋa. Te Moses ne tɔgɛ, te Yenɛ ne lebehe en na te a konkore la tanhera wo saa la. 20Te Na'ayenɛ sige Sinai Zoore la zuo na, bɔna zoore la zuin zuin ha, ge yi Moses yeti a zom na. Te Moses zom, 21te Na'ayenɛ yele en yeti, Lebe sige ta yele ho nɛreba la la ninmɔ'ɔrɛ yeti, ba da zegera te ba nyɛ Na'ayenɛ. Ba han eŋɛ bala, ba kekeko wan ki. 22Sɛba n pon dɛna keendoma la me, pee ba mɛhe soŋa, han dagana bala, n sunsunyiim wan taɛ bahɛ ba zuo na. 23Te Moses lebehe yele Na'ayenɛ yeti, Te pon ka bo nɛreba la sore te ba zom zoore la zuo na, doohe la hom mɛŋa n zam pon yele to te to makɛ beena kae zoore la te de dɛna toolom zoore la zuo. 24Te Na'ayenɛ lebehe yele en yeti, Lebe sige, ta tare Aron na, ge keendoma la, la nɛreba la zan'an da zegera te ba zom Na'ayenɛ zen'an na, ba han eŋɛ bala, n sunsunyiim wan taɛ bahɛ ba zuo na. 25Te Moses lebe sige nɛreba la zen'an na yele ba bala.

will be added

X\