Yɛhega 17

1Te Israeldoma wa zan'an ze'ele Sin mɔen la, tagalɛ taaba ba yizuo, ba yizuo, kena wo Na'ayenɛ n bo ba nɔɔrɛ se'em la, keŋɛ ta paɛ Arepidim teŋa, tiihom bilam, te ko'om me ka bɔna bini te ba wa wan nyu'. 2Te ba zabera la Moses yeti, Bo' to ko'om te to nyu'. Te Moses soke ba yeti, Wane te ya zabera la mam? Bene n sɔe te ya magaha Na'ayenɛ beha wana? 3Ge ko'nyuuro n koore nɛreba la, te ba nyɔna Moses yeti, Bene n sɔe te ho ihege tare to ze'ele Mizraim teŋa yehe na, bahɛ te tomam, la to kɔma, la to dunhe zan'an kiira ko'nyuuro wa? 4Te Moses kaahɛ bo Na'ayenɛ yeti, Mam yeti n eŋɛ la wane la nɛreba wa? Ba pon maahom te ba lobe mam mɛ la kuga. 5Te Na'ayenɛ lebehe yele en yeti, Loe Israeldoma keendoma la basɛba, te hom, la bama tole nɛreba la nɛŋa, dekɛ ho doore la te ho daa dekɛ ŋmɛ' Nile Kolaa ko'om la, pa'ahɛ keŋɛ. 6N wan deŋɛ ho nɛŋa ta zɛ'a ho nɛŋan Horeb taŋa la zuo. Ta ŋmɛ' taŋa la, ge ko'om wan ze'ele ka poan yehe na, te nɛreba la nyu'. Te Moses eŋɛ bala Israel nɛŋadoma la nini, 7ge segɛ zen'an la yu'urɛ te Massa, la Meriba. Se'ere n sɔe la, bilam te Israeldoma la nyɔna, ge magahɛ Na'ayenɛ behɛ, doohe la ban sokere yeti, Na'ayenɛ mea ton bɔna la to yoi la. 8Te Amalek yehe na te a tɛn' Israeldoma wa n tiihom bɔna Arepidim teŋai la. 9Te Moses yele Yosua yeti, Ganhɛ to borase'ehe wa te se yehe ta zabɛ la Amalekdoma wa. Beere, n wan keŋɛ ta zom zoore la zuo ha, la n zɛnkɛ Yenɛ doore wa n nu'uhen. 10Te Yosua eŋɛ wo Moses n pa'alɛ en se'em la, keŋɛ ta zabɛ la Amalekdoma la. Ge te Moses, la Aron, la Hur keŋɛ ta zom zoore la zuin ha. 11Moses nu'o la han zɛnga saazuo, Israeldoma n ne kpe'em, ge a nu'o la ne han ta sigera teŋa na, Amalekdoma n ne tee kpe'em. 12Te Moses nu'uhe nya ta banlɛ, te ba ɔnbegɛ kugure na biŋe en, te a zin'an de zuo, ge te Aron, la Hur nya paɛ, te ena ze'ele ke te ena me ze'ele ke, te ba gorɛ a nu'uhe la, zɛnkɛ saazuo, te yenɛ ta lu. 13Bala te Yosua nya nyaŋɛ Amalek wa, la a nɛreba la so'a. 14Te Na'ayenɛ yele Moses yeti, Golehɛ yele dena wa eŋɛ gɔgɔ poan tɛnra, ge dekɛ dɛ tɔgɛ bo Yosua. Se'ere n sɔe la, n yeti n sagom Amalek buuri wa yu'urɛ teŋa wa zuo la zan'an. 15Te Moses mɛ' bimbine, segɛ de yu'urɛ yeti, Na'ayenɛ N De Mam Gu'ura. 16A yeti, nu'uhe n page Na'ayenɛ danlehom la zuo. Na'ayenɛ wan zabɛ la Amalekdoma wa la bala saŋa woo poan.

will be added

X\