Yɛhega 13

1Te Na'ayenɛ yele Moses yeti, 2Yehe sɛla woo n de bikeŋa dɛna bondɔɔ Israel buuri wa poan, ze'ele la tɔka, te la dɛna toolom denɛ bo mam, sɛla woo n de nɛresaaleba, bii dunhe sare sare dɔgom Israel buuri wa poan dela mam denɛ. 3Te Moses yele nɛreba la yeti, Tɛnre ya zina dabaherɛ wa, daanse'ere daarɛ te Na'ayenɛ mɛŋa dekɛ a paŋa fan' ya yamanɛ tooma Mizraim teŋa bahɛ la. Da di ya sɛla n tare mi'ihom de poan. 4Abib ŋmarega wa zina te ya bahera ka'lam. 5Na'ayenɛ han tare ya ta kɛn'ɛhɛ Kanaandoma la Hitidoma la Amoridoma la Hivdoma la Yebusdoma teŋhe la te a pɔ' bo ya sɔyaabdoma te a wan dekɛ bo ya la, teŋsɛka te iilom la seerom zɔta wo ko'om la poan, ya tɛnra de'eŋɔ kona wa ŋmarekana wa poan. 6Dabeha ayopɔe te ya ne wan obe boroboro te mi'ihom ka bɔna bo poan la, te dabeha ayopɔe la ba'ahegɔ daarɛ la dɛna de'eŋɔ la bɔ'ɔra Na'ayenɛ. 7Boroboro se'a te mi'ihom ka bɔna bo poan te ya wan dita dabeha ayopɔe la zan'an poan, da bahɛ ya te mi'ihom pon pota ya zen'an, bii mi'ihom bɔna la ya, ya teŋa la poan. 8Dabeha aŋa poan, ne yele ya kɔma yeti, Na'ayenɛ n tare mam ze'ele Mizraim teŋa poan yehe na, ge tom se'em bo mam la n sɔe te n ete wana wa. 9De'eŋɔ kona wa wan dɛna danlehom lo' ya nu'uhen, ge lama ya gbɛya poan tɛɛnha ya, ge te Na'ayenɛ pa'alegɔ bɔna ya nɔgbamai. Se'ere n sɔe la, Na'ayenɛ dekɛ la a paŋa ve'e ya ze'ele Mizraim teŋan yehe na. 10Bala, tɛnre ya malema kona wa, la ko saŋa, yuunɛ woo. 11Na'ayenɛ han ta tare ya kɛn' Kanaandoma teŋa la poan, wo n pon pɔ' bo yamam, la ya sɔyaabdoma te a wan eŋɛ se'em la, seren ta dekɛ ka bo ya, 12ya yehe sɛla woo bideeŋa ze'ele ka tɔka bo Na'ayenɛ. Ya dunhe kɔmdeena se'ehe n de bondɔɔrɔ zan'an, ta dɛna la Na'ayenɛ denɛ. 13Ge boŋa sare sare bia woo, ne dekɛ ya pehego tee yɔ to'e, ho han kan nyaŋɛ tee ka, ho ye kɔ' boŋa la nyugela. Dekɛ ya sɛla tee yɔ to'e ya kɔmdeena sɛba n de bodibinto. 14La han kena na te ya kɔma ta sɔkera ya yeti, Bene n sɔe te ya eta wana wa? Ya yele ba yeti, Na'ayenɛ paŋa te a dekɛ ve'e to to yamenɛ poan, Mizraim teŋa poan yehe na. 15Faro yuum kanbɛ la suunre ka sakɛ te to yehe a teŋa la poan, te Na'ayenɛ doohe Mizraim teŋa wa poan zan'an ko' nɛresaaleba, la dunhe bideeŋa woo. Bala zuo, te to tara sɛla woo sare sare bia kaanbera bɔ'ɔra Na'ayenɛ la, ge a han dɛna nɛresaala, to ne dekɛ la pehego tee yɔ to'e. 16Lana wa wan dɛna danlehom lo' ya nu'uhen, ge lama ya gbɛ'ya poan pa'ala te Na'ayenɛ dekɛ la a mɛŋa paŋa tare to ze'ele Mizraim teŋa poan yehe na. 17Faro n bahɛ nɛreba la te ba yehe yɛ'a la, Yenɛ ka tare ba doohe Pilistidoma teŋa sore la n ŋmate gi'a la. Se'ere n sɔe la, Yenɛ mi' yeti, Nɛreba wa han kɔ'ɔn to'ohɛ zaberɛ nananawa, ba potɛn'ɛrɛ wan daam ba, te ba tuluge lebe Mizraim. 18Bala, te Yenɛ tare ba na doohe mɔen so golema la, yɛ'a tɔɔra Mɔgɔ Mɔlega la ha. Israeldoma wa n yehe Mizraim teŋa yɛ'ɛha la, ba kɔ'ɔn maahom ba mɛhe mɛ gura zaberɛ. 19Te Moses guruge Yosef konba pa'ahɛ, tara yɛ'a. Se'ere n sɔe la, Yosef yuum bahɛ te Israeldoma pɔ' la nɔɔrɛ, ge te a yele ba yeti, Yenɛ wan gura ya, ge ya han ta yɛhera teŋa wa poan, ya guruge n konba ka'lam pa'ahɛ keŋɛ. 20Te ba ze'ele Sukot teŋa, keŋɛ ta paɛ Etham, tiihom mɔen la kenkɛleŋa bilam. 21Wontɛɛŋa saŋa, Na'ayenɛ ne dɛna la saŋgbanɛ pin' ba te ba kena, te yu'uŋɔ te a dɛna bugum bɔna ba nɛŋa te ba kena, bala, te ba wan ta'an kena ba kenɛ la bolika, la yu'uŋɔ zan'an. 22Saŋgbanɛ se'ere n pin'ire ba bolika la, bii bugum sebo n nɛɛre bɔ'ɔra ba yu'uŋɔ te ba kena la, ka malom bahɛ ba nɛŋan.

will be added

X\