Yɛhega 11

1Na'ayenɛ pon yele Moses yeti, N wan bahɛ te namehegɔ kantɛ koyema sige naba wa, la Mizraim teŋa zan'an zuo na, bala han wa'ana tole, a wan bahɛ te ya yehe ka'lam keŋɛ, a me han ta yeti a eŋɛ bala, a kɔ'ɔn yeti a sa'ɛ ya mɛ te ya keŋɛ. 2Yele nɛreba la yeti, boraa woo, la pɔka woo n kɛn'ɛre lɛm Mizraim teŋa nɛra se'em la, a sohɛ en to'e sanlenpeelega, la sanlema nonɔm lɔgɔrɔ. 3Te Na'ayenɛ dekɛ ninbɔn'zoolom kɛn'ɛhɛ Mizraim nɛreba wa, te ba bo Israel nɛreba la en sohɛ ba sɛla woo la. Moses mɛŋa pon dɛna la nɛre zure Mizraim teŋa la poan, la Faro la kpɛ'ɛndoma la nɛŋan. 4Te Moses yele Faro yeti, Na'ayenɛ yeti, Yu'uŋsunsua bɔba ha, n wan doohe Mizraim teŋa wa poan zan'an tole. 5Sɛla woo n de bikeema Mizraim teŋa wa poan wan ki. La wan pɔhɛ la Faro n zin' a na'am gɔŋɔ zuo wa bikeema, ta paɛ pɔgɔsɛka n de da'aberɛ, ɛɛra nɛɛna zom bikeema, duŋa woo bikeema wan ki. 6Tagurehe wan luta Mizraim teŋa wa poan zen'an woo, tagurega sɛka te ba ka tabelɛ wom, bii pon kan le wom ka taaba. 7Ge baa pon kan wehege Israel buuri la nɛra, bii ba duŋa, bala te ya wan baŋɛ te Na'ayenɛ tare yelegere mɛ, Mizraim la Israeldoma teŋasoka. 8Ho kpɛ'ɛndoma wa zan'an wan wa'ana pɔnrɛ na'ma mam nɛŋan, bɛlona mam yeti, tare ho nɛreba la zan'an te ya yehe. Ya wan ta eŋɛ mam la bala, ge te n nya yehe. Moses en tɔgɛ wana ba'ahɛ la, a ze'ele naba wa yire yehe mɛ la sunsunyiim. 9Na'ayenɛ pon yele Moses yeti, Faro pon kan kelehe ho, la wan eŋɛ la bala, te n ta'an tom n kerehe tooma wa zo'e zo'e Mizraim teŋa wa poan. 10Te Moses la Aron tom toonkerehe ana wa woo, ge te Na'ayenɛ kanbɛ naba la suunre, te a kan bahɛ te Israeldoma wa yehe a teŋa la poan keŋɛ.

will be added

X\