Yɛhega 10

1Te Na'ayenɛ yele Moses yeti, Keŋɛ Faro wa zen'an, ge mam n bahɛ te enŋa la a kpɛ'ɛndoma la zan'an sunya kanbɛ bala la, te n ta'an doohe ba poan tom n kerehe ana wa, 2te yamam me ta ta'an dekɛ a tɔgɛ pa'alɛ ya kɔma, la ya yaahe, mam bahɛ te Mizraimdoma wa tom gɔɔn toonse'a taaba, la n kerehe toonse'a te n tom la, ge te ya mina te mam n de Na'ayenɛ. 3Bala te Moses la Aron keŋɛ Faro zen'an, ta yele en yeti, Na'ayenɛ n de Hebrudoma Yenɛ la yeti, Wane ma'an te hom wan sirige ho mɛŋa bo mam? Bahɛ te n nɛreba wa keŋɛ ta po'ohɛ mam. 4Ge ho han zagahɛ te ho kan bahɛ te ba keŋɛ, beere, n wan bahɛ te sonwa'ara bibige ho teŋa wa na. 5A wan pin' ho teŋa wa zan'an te tentɔnɔ pon kan nyɛta na. A wan obe sɛla te saakuga la sagom ge bahɛ finfiinhe la zan'an, ta ta' la tiihe se'ehe woo n boe ho teŋa samana zuto la. 6A wan perɛ hom, la ho kpɛ'ɛndoma la zan'an yiya, la Mizraimdoma zan'an yiya poohen, sɛla te ya sɔdoma, bii ya sɔyaabdoma n wa'an teŋa wa zuo na daarɛ, tara tara la zina, ba nini ka tabelɛ nyɛ. Te Moses tɔgɛ bo en ba'ahɛ ge yehe. 7Te Faro kpɛ'ɛndoma la yele naba la yeti, Nɛra wa wan bahɛ to bɛnrega la wane ma'an? Bahɛ te ba nɛreba la keŋɛ ta po'ohɛ Na'ayenɛ ba Yenɛ la. Hom kelom ka baŋɛ te Mizraim teŋa wa sagom ba'ahɛ la zan'an? 8Te ba doohe na yi' Moses la Aron lebe Faro zen'an na. Te a yele ba yeti, Keŋɛ ya ta po'ohɛ Na'ayenɛ ya Yenɛ la. Ge nɛre bane la bane n ye'ehe? 9Te Moses yele en yeti, Te ye' mɛ la to bonbilipaalehe, to bonkɛgehe, to dayɔɔhe, to pɔyɔɔhe, to piihe, la to nii. Se'ere n sɔe la, to ye'ehe te to ta de'em la de'eŋɔ bo to Na'ayenɛ la. 10Te Faro yeti, Na'ayenɛ wan seren bɔna la ya, ge mam kan sakɛ bahɛ te ya tare ya pɔgɔba la ya kɔma pa'ahɛ keŋɛ, ya maahom la potɛn'be'o seko ha. 11Aai, ya boraahe la ma'an keŋɛ ta po'ohɛ ya Na'ayenɛ la, wo yan yeti se'em daarɛ woo la. Te a tɔgɛ bala ba'ahɛ ge sa'ɛ Moses la Aron te ba ihege keŋɛ. 12Te Na'ayenɛ yele Moses yeti, Tɛɛn ho nu'o pa'alɛ Mizraim teŋa wa kae, te sonwa'ara wa sige ka zuo na obe sɛla woo n ze' samana zuto, sɛla woo te saakuga la gee bahɛ la. 13Bala, te Moses zɛnkɛ doore la pa'alɛ Mizraim teŋa kae, te Na'ayenɛ bahɛ te sabeeo kantɛ ze'ele dapɔya bɔba na, lobe Mizraim teŋa poan de daarɛ, tara tara la yu'uŋɔ. Beere en ta yelegɛ la, te sabeeo la pe'e sonwa'ara la mɛ na, 14te a to'e Mizraim teŋa zan'an, te Mizraim zen'an woo perɛ la sonwa'ara. Mizraim teŋa ka tabelɛ nyɛ sonwa'ara aŋa taaba, a taaba me pon kan le malom wa'ana. 15Te sonwa'ara wa pin' teŋa la zan'an, te ka lebege sɔbelegɔ, te a obe tiihe se'ehe woo te saakuga la wa'ana sagom tole ge bahɛ la, la se wɔla zan'an, te bonbule, bii tia la kayena me ka gee zɛ'a Mizraim teŋa samanɛ zuo. 16Te Faro la kanbelɛ kalam yi' Moses la Aron na yele ba yeti, Mam tom la be'em bo Na'ayenɛ ya Yenɛ la, la yamam mɛhe, 17le bahɛ ya n be'em bona me bo mam, ge sohɛ Na'ayenɛ ya Yenɛ la te a pakɛ namehegɔ too kona wa n zuo bahɛ. 18Te Moses yehe Faro la zen'an, keŋɛ ta sohɛ Na'ayenɛ. 19Te Na'ayenɛ tuluge sabeeo la te ko lɔbera yɛ'a nɛŋa bɔba ha, pe'e sonwa'ara la zan'an ta bahɛ Mɔgɔ Mɔlega la poan ha, te sonwa'atɛ la deyena me ka le pota Mizraim teŋa la zen'sɛka poan. 20Te Na'ayenɛ kaanbɛ Faro la suunre, te a ka sakɛ te Israeldoma la keŋɛ. 21Te Na'ayenɛ yele Moses yeti, Tɛɛn ho nu'o pa'alɛ saazuo ha, te lika wa'ana pin' Mizraim teŋa wa zan'an, lika sɛka n wan daam. 22Te Moses tɛɛn a nu'o pa'alɛ saazuo ha, te lika wa'ana pin' Mizraim teŋa la zan'an gbarete, tara tara la dabeha atan'. 23Te nɛnɛra ka nyɛte a tadaana, te nɛra ka vuruge n boe zen'an keŋɛ zen'an, tara la dabeha atan'. Ge Israeldoma la n kɛn'ɛre zen'an Mizraim teŋa poan la ma'an n tare wontɛɛŋa, la yu'uŋɔ. 24Te Faro le bahɛ te ba yi Moses na, te a yele en yeti, Kene ya ta po'ohɛ Na'ayenɛ la, ya pɔgɔba la ya kɔma la ta'an doohe ya keŋɛ, ge da pe'e ya dunhe la pa'ahɛ. 25Te Moses yele en yeti, La dela pɛnregerɛ te ho bahɛ te to tara kaanbegɔ, la nyɔ'an bo'olom ta kaanbɛ bo Na'ayenɛ to Yenɛ la. 26To dunhe la zan'an dole yɛ'a mɛ, to'fiinɛ ka yeere ka'lam, to wan ta loe la dunhe senhe poan po'ohɛ Na'ayenɛ to Yenɛ la, to me kan ta'an baŋɛ to wan ta dekɛ dunhe se'ehe kaanbɛ to Na'ayenɛ la, han dagana to paɛ la bini. 27Te Na'ayenɛ kanbɛ Faro suunre, te a ka bɔta te a bahɛ te Israel nɛreba la keŋɛ. 28Te Faro yele Moses yeti, Mɛlom mam nɛŋan, behɛ ho mɛŋa soŋa da le wa'ana ze'ele mam nɛŋan yɛ'ɛha, daanse'ere daarɛ te ho wan le wa'ana ze'ele mam nɛŋan la, ho ba'ahegɔ daarɛ n bala. 29Te Moses lebehe yele en yeti, Hom yele se'em la, mam kan le malom wa'an ho nɛŋan na yɛ'ɛha.

will be added

X\