Yɛhega 1

1Yakob dayɔɔhe se'ehe la se nɛreba n doohe en keŋɛ Mizraim teŋa la dela, 2Areuben la Simeon la Levi la Yuda la 3Isakar la Zebulun la Benyamin la 4Dan la Naptali la Gad, la Aser. 5Yakob buuri la n nɔgɛ la n keŋɛ Mizraim teŋa poan la, zan'an kanlɛ dela, nɛre pihiyopɔe. Ge bala ma'an la, te a dayɔa Yosef pon bɔna la Mizraim teŋa la poan. 6Te la bɔna bɔna te Yosef ta ki, te a sɔɔnrɔ la saŋa la n boe Mizraim teŋa saŋkaŋa ha la zan'an ta ki ba'ahɛ, 7ge Israeldoma wa n nɔbere tɔtɔ la zuo, wi'ɛ le perɛ Mizraim teŋa, ge kpe'em. 8Te naba kayema ta soe Mizraim teŋa la, naba sɛka n ka tabelɛ mina Yosef yele. 9Te naba wa ta yele a kpɛ'ɛndoma daarɛ deyema yeti, Israeldoma wa zo'e gaŋɛ mɛ to teŋa wa poan, ge me kpe'em, wana wa dela paleŋ'ɛnka bɔ'ɔra to. 10Bahɛ ya te to muguhe ba, han dagana bala, ban wi'ɛre se'em wa, zaberɛ han ta sige to teŋa wa poan, ba wan soŋɛ to diŋdoma la te ba zabɛ nyaŋɛ tɔ, ge te ba yehe to teŋa wa poan. 11Bala te ba loe tooma kpɛ'ɛndoma te ba beha Israeldoma la, muguha ba te ba tona toonkpɛ'ɛma. Ba dekɛ la Israel nɛreba wa mɛ teŋkanra se'a te ba yi'ira Pitom, la Arameses la, bo Mizraim teŋa naba, 12ge muguhego seko woo te Israeldoma wa nyɛta la zan'an, ba kelom wi'ɛ mɛ perɛ Mizraim teŋa la, te dabeem kɛn' Mizraimdoma la. 13Te Mizraimdoma wa malom kanbɛ suunre, vɛngelena Israeldoma wa la toonkanra, 14pɛnregera ba tona toonkpɛ'ɛma, birikihe ŋmɛ'a, tonɔ kanra tooma, la va'am poan tooma woo. Te Mizraimdoma wa kɔ'ɔn kanbɛ sunya vɛngelena ba bora bora, te vom kpe'em bo Israeldoma wa. 15Te Mizraim teŋa naba wa ta yele Hebru buuri pɔgɔhe, Sipra la Puah, n dɔgehe Hebru pɔgɔhe la yeti, 16Ya han ne ta dɔgehɛ Israel pɔgɔhe wa, te pɔgɔsɛka dɔgɛ bodibila, ya ko bikaŋa, ge ka han dɛna pugula, ya bahɛ ka. 17Ge Sipra la Puah n zote Yenɛ la zuo, ba ka sakɛ eŋɛ naba la n yele ba se'em la, ge bahera bodibinto la. 18Te Mizraim teŋa naba wa tom yi' pɔgɔhe seyi' wa na soke se yeti, Ya ete la wane wa? Wane te ya ka eta mam yele ya te ya eta se'em la, ge bahera bodibinto la? 19Te ba yele en yeti, Hebru pɔgɔhe la ka ane wo teŋa wa pɔgɔhe la. Ba dɔgom ka tɔe, se'em ma'an te tomam ne ta baŋera la, te ba pon dɔgɛ mɛ. 20Pɔgɔhe seyi' wa n zote Yenɛ la zuo, te Yenɛ nu'o page se zuo, te Israel buuri la wi'ɛ, ge kpe'em. 21Pɔgɔhe wa n zote Yenɛ la zuo, Yenɛ bo se dɔgom mɛ, te se tara kɔma. 22Te Mizraim teŋa naba wa ta bo a teŋa nɛreba la nɔɔrɛ yeti, Hebru buuri la poan, ba han dɔgɛ bilɛa woo te ka dɛna bodibila, ba tare ka ta lobe bahɛ Nile Kolaa la poan, ge bahɛ ba pugunto la.

will be added

X\