Ester 9

1Adar ŋmarega la n de ŋmarehe pia la seyi' la, ka dabeha pia la atan' daarɛ la n wan dɛna daanse'ere te ba wan pɔhɛ eta naba la nɔze'elego la te a golehɛ la, de daarɛ te Yudoma diŋdoma la eŋɛ ba potɛn'ɛrɛ te ba sagone ba, ge la nya ton tuluge mɛ, te Yudoma nyɛ paŋa la sɛba n yaɛ ba la. 2Yudoma wa n boe teŋsɛka woo poan naba Ahasurus sɔ'ɔlom la poan daa lagahɛ ba mɛhe mɛ teŋa woo poan, te zabɛ la sɛba n wan bɔta te ba sagom ba, te se'em ka'na wan ta'an ze'ele la ba, se'ere n sɔe nɛra woo daa zote la dabeem la ba. 3kpɛ'ɛndoma sɛba woo n tone teŋhe la woo poan la, la gɔŋminiba la, la sɛba woo n sɔe teŋhe beha la, la naba yire kpɛ'ɛndoma la zan'an pa' la Yudoma wa poore. Se'ere n sɔe la, ba zote la dabeem la Mordekai. 4Mordekai n nya de kpɛ'ɛma naba la yire poan, te a yu'urɛ tara teŋhe la woo poan, te boraa wa kɔ'ɔn malom pa'aha la paŋa. 5Lan eŋɛ se'em te Yudoma wa nyaŋɛ kɔrom ba diŋdoma wa so'ahe n bala, kɔrom ba te ba sunya nya ma'ɛn. 6Susa teŋa poan, Yudoma wa n ko' nɛresɛba kanlɛ dela nɛre kɔbehe senuu, 7ta ta la Pasandata, la Dalpon, la Aspata, 8la Porata, la Adalia, Aridata 9la Parmasta, la Arisai, la Aridai, la Vaizata, 10nɛre pia wa dela Hamedata dayɔa Haman, se'em n de Yudoma wa diŋdaana la dayɔɔhe, te Yudoma wa ko'. Ge ka kalom ba lɔkɔ. 11Ban ta yele naba la de daarɛ mea nɛresɛba te ba ko' ba Susa teŋa poan la kanlɛ la, 12te naba la nya yele a pɔgɔkeema Ester yeti, Behɛ Susa teŋkantɛ wa poan wa, Yudoma la nyaŋɛ ko' la nɛre kɔbehe senuu, ta ta' la Haman dayɔɔhe pia ge teŋse'ehe n gee mam sɔ'ɔlom wa poan wa ba eŋɛ la wane bini? Nananawa, yele mam sɛla n daane hɔ, n wan maalɛ bo ho, yele mam hom bote sɛla, ge n wan eŋɛ bo ho. 13Te Ester lebehe naba la yeti, La han wan pee ho puurɛ, bo Yudoma wa n boe Susa teŋa wa fole te ba beere le doohe hom n yele se'em gɔŋɔ la poan la, ba yule Haman dayɔɔhe pia la dɔɔrɔ la zuto. 14Te naba la bo nɔɔrɛ te ba golehɛ gɔŋɔ Susa teŋa poan, te ba seren yule Haman dayɔɔhe pia la. 15Te Yudoma la n boe Susa teŋa poan la lagahe taaba Adar ŋmarega la, ka dabeha pia la anaahe daarɛ, ko' nɛre kɔbehe setan', ge ka kalom ba lɔkɔ. 16Te Yudoma sɛba n gee kɛn'ɛra naba sɔ'ɔlom la poan, lagahe la taaba te ba gu' ba mɛhe, la ba ta'an fan' ba mɛhe ba diŋdoma la nu'uhen. Ba ko' la nɛreba tuha pihiyopɔe la banuu ge ka kalom ba lɔkɔ. 17Ba daa ko' nɛreba wa la Adar ŋmarega la poan ka dabeha pia la atan' daarɛ, ge ka dabeha pia la anaahe daarɛ la, te ba vo'ohe, ge eŋɛ de te dɛ dɛna de'eŋɔ, la dia, la nyeema dabaherɛ bɔ'ɔra ba. 18Dabeha pia la atan' la dabeha pia la anaahe daarɛ la, te Yudoma la n boe Susa teŋa poan la kan'ahɛ taaba, ge ka dabeha pia la anuu daarɛ la, te ba vo'ohe, ge eŋɛ de te dɛ dɛna de'eŋɔ, la dia, la nyeema dabaherɛ bɔ'ɔra ba. 19Bala zuo te Yudoma sɛba n wa kɛn'ɛre teŋbibihe se'ehe la poan tɛnra Adar ŋmarega wa ka dabeha pia la anaahe daarɛ wa, te de dɛna ba de'eŋɔ, la dia, la nyeema, la lɔgɔrɔ bɔ'a dabaherɛ. 20Te Mordekai golehɛ yele ana wa, nya tom te ba tare gɔnɔ la ta bo Yudoma la n boe naba Ahasurus sɔ'ɔlom la poan, teŋse'ehe woo n lɛm la teŋse'ehe woo n zaan, 21yɛta ba te ba tɛnra Adar ŋmarega wa ka dabeha pia la anaahe la ka dabeha pia la anuu la yuunɛ woo poan la ba dɛ'ɛna de'eŋɔ se poan. 22dabeha ana wa poan te Yudoma la fan' ba mɛŋa ba diŋdoma nu'uhen, ŋmarekaŋa mea poan te ba yehe sunsagaŋɔ, la kaahega poan kɛn' de'eŋɔ la popeelom poan te dabaherɛ la lebege Vo'ohogo dabaherɛ, dɛna daanse'ere te ba bɔ'ɔra taaba lɔgɔrɔ, ge tɔnta nahadoma me lɔgɔrɔ la popeelom. 23Te Yudoma wa lo' ba sunya te ba wan eta yele wa te ba pɔhɛ la, wo Mordekai n pon golehɛ de se'em eŋɛ gɔŋɔ poan bo ba la. 24Se'ere zuo la, Agag boraa Hamedata dayɔa Haman se'em n de Yudoma la diŋdaana la daa ŋmɛ' la gbaŋa loe Purim dabaherɛ wa te a sagom Yudoma wa teŋa la poan. 25ge Ester n daa lu naba la nɛŋan la, naba la daa golehɛ la gɔŋɔ tɔnrɛ zen'an woo a sɔ'ɔlom la poan yeti, tee dekɛ ya potoseko te Haman maahom te a dekɛ tom Yudoma wa la bo Haman mɛŋa, nyɔkɛ ya enŋa, la a dayɔɔhe la yule dɔɔrɔ te a sɛ ze'ele te a lo' Mordekai yule bini la zuo. 26Bala zuo la, Yudoma la yi'ire dabeha ana wa la Purim dabeha, yu'urɛ la yehe la Pur poan na. Se'ere n sɔe la ba daa golehɛ yɛla wa zan'an eŋɛ la gɔŋɔ la poan, la ban daa nyɛ sɛla woo, la sɛla woo n daa eŋɛ ba la, 27te Yudoma wa lo' ba sunya poan yeti bama, la ba yaahe, la sɛba woo n dekɛ ba mɛhe lagom bama wan tɛnra dɛ'ɛna dabeha ayi' ana wa yuunɛ woo poan wo lan golehɛ se'em la, la saŋsɛka n sone te ba dɛ'ɛna dela. 28Ya tɛnra dabaherɛ ana ya tuunhom la buuri la zan'an poan, ya sɔ'ɔlom woo la ya teŋkanra la poan. Da malom bahɛ ya Purim dabeha de'eŋɔ wa bii ya tamɛ de'eŋɔ wa te ko bahɛ yoo ya tuunhom woo poan. 29Te naba pɔgɔkeema Ester, se'em sɔ n de Abihail la, la Mordekai Yudoma nɛra la, n ŋmɛ' nyɔ'ɔn le golehɛ gɔŋseko n pa'ahe boyi' la doohe te ba golehɛ pooren doohe Purim dabeha wa. 30Te Mordekai bo Yudoma la zan'an n boe teŋkanra kɔbega la pihiyi' la seyopɔe la n boe naba Ahasurus sɔ'ɔlom la poan la gɔnɔ, la som po'ohegɔ. 31ge bahɛ te Purim de'eŋɔ ba' nyɛgere ko dabeha mea poan, wo Mordekai Yudoma nɛra la, la Ester n bo ba nɔɔrɛ se'em la, ge maahom dabaherɛ ana te la dɛna ba zagahɛ ba mɛhe, la fabelɛ bo ba mɛhe. 32Te Ester nɔɔrɛ la te a bo doohe Purim de'eŋɔ yɛla la, ba golehɛ a zan'an eŋɛ la gɔnɔ la poan.

will be added

X\