Ester 7

1Te ba tare Haman paɛ, te enŋa, la naba nya yehe keŋɛ Ester zen'an te ba ta di di sɛka te a maahom ze'ele naba la. 2Daan denɛ pa'ahɛ la ba dabeha ayi' n bala te ba ta bɔna bini nyuura daam te naba la le soke Ester yeti, Hom n de mam pɔgɔkeema, yele mam hom bote sɛla ge n wan eŋɛ bo ho. Bene te ho bɔta? La han pon dɛna mam sɔ'ɔlom wa porogerɛ te ho bɔta, n wan dekɛ bo ho. 3Te Ester lebehe yeti, Naa, hom naba han seren nɔŋɛ mam mɛ, ge me pee la ho puurɛ te ho wan eŋɛ sɛla woo te mam bɔta bo mam, mam bote sɛla dela, ho da ko' mam, la n buuri la, 4Se'ere n sɔe la, ba koohe mam, la n buuri la tehɛ mɛ te ba sagom tɔ, ba ko' tɔ, ge fan' tɔ lɔgɔrɔ. Ba han pon koohe ne mam nɛreba wa ba boraahe la ba pɔgɔba tehɛ ne te ba dɛna da'aba, la ka daane ne mam, ge lan eŋɛ se'em la, se'em ka boe wan ta'an yɔ to'e te naba nu'uhen bahɛ, 5Te naba soke en yeti Ester, Ane n de en, a daana boe la bɛ, ane n de en maahom te a eŋɛ bala wa? 6Te Ester lebehe yeti, Haman wa n bala, a dela diŋdaana, la potɔya! Te dabeem nya kɛn' Haman, naba la Ester nɛŋan. 7Te naba ihege dia la poan la sunsunyiim, yehe a zenzaka poan ha, ge te Haman yee te a belom Ester, te a to'e a vom bahɛ, se'ere zuo a mi' te naba la nya maahene la a sagom en. 8Naba la n ta ze'ele a zenzaka la poan lebe kɛn' bɔ' seko te ba zin' ne bini dita la, nyɛ te Haman lu Ester koka la nɛŋan, belona en. Te naba nyabege yeti, Ho yeti mam pɔga n nɛŋan! Te naba tɔgɛ ba'ahɛ la, te ba pin' Haman nɛŋa. 9Bilam te naba bɔla ayema nya yele naba yeti, Naa naba, Haman pon sɛ la dɔɔrɔ a yiren ha, te la dɛna santira pihinuu te a dekɛ Mordekai se'em yelehom n yuum fan' ho bahɛ la yule bini. Te naba yeti, Han dɛna bala, tare a mɛŋa ta lo' yule bini. 10Te ba tare Haman ta lo' yule dɔɔseto te a sɛ ze'ele te a lo' ne Mordekai yule bini la, te naba sunsunya nya ma'ɛn.

will be added

X\