Ester 4

1Mordekai n ta baŋɛ sɛla woo n eŋɛ la, la daam en mɛ, te a aanhom a futo seto te a yɛ la, yɛɛhɛ to bahɛ ge tee sunsagaŋɔ futo yɛ', ge vaɛ tampegelom puke a mɛŋa, nya kɔ'ɔn dɔla ɛɛra teŋa la poan zen'an woo kaaha tagurega, 2nya kele bala ta paɛ naba nayaŋa la poan zɛ'a yeŋa. Se'ere n sɔe la, ba ka yɛɛre sunsagaŋɔ futo ge dɔla naba nayaŋa la poan kɛn'ɛra. 3Naba la gɔŋɔ la n paɛ teŋsɛka poan woo, Yudoma la zagahɛ ba mɛhe la nintam la fabelegɔ, te ba kekeko yɛ' sunsagaŋɔ futo, ge puke ba mɛhe la tampegelom. 4Te Ester pɔsɔɔrɔ, la sɛba n de bɔla la ta wom yele la dekɛ yele Ester, te la daam Ester suunre, te a dekɛ lɔgɔ yɛɛtɔ, te ba tare ta bo Mordekai, te a yɛɛhɛ sunsagaŋɔ futo la bahɛ, ge to'e lɔgɔsonɔ la yɛ', te Mordekai zagahɛ futo la. 5Te Ester yi' naba tontoneba la kpɛ'ɛma ayema yu'urɛ n de Hatak, se'em te ba loe en te a tona bɔ'ɔra Ester la, nya tom en te a keŋɛ ta soke Mordekai baŋɛ yelese'ere n daane en. 6Te Hatak yehe teŋa la poan ha, paɛ naba nayaŋa la nɔɔrɛn na, te Mordekai zin' bilam, te a soke en, 7Te Mordekai me yele en sɛla n eŋɛ, ge mɛ yi ligise'a te Haman yeti naba han bahɛ te ba sagom Yudoma la n wan yɔ pa'ahɛ naba ligiri poan la nɔɔrɛ bo en. 8Ge me dekɛ gɔŋɔ seko te ba golehɛ bo Susa teŋa poan te ba sagom Yudoma la bo en, te a tare ta pa'alɛ Ester, la a pa'alɛ en gɔŋɔ la vɔnrɛ, ge yele en te a kɛn' ta nyɛ naba, la a belom en te a soŋɛ a nɛreba wa. 9Te Hatak lebe ta yele Ester Mordekai n yele sɛla woo la. 10Te Ester bo Hatak nɔɔrɛn, te a ta yele Mordekai yeti, 11Naba tontoneba la woo, la a nɛreba woo n boe sɔ'ɔlom wa poan la mi' te nɛra woo, bii pɔka woo, bii boraa han kɛn' naba zoŋen ge te naba ka yi en, yele yenɛ ma'an te ba wan dekɛ eŋɛ nɛre'ena taaba dela a ki. Ho ye han kɛn' te naba la zɛnkɛ sanlema doore tɔ hɔ, n de ho fai. Mam mɛŋa n boe wa dabeha pihitan' n wana tole te ba ka yi mam te n kɛn' ta nyɛ naba. 12Ban wa'ana yele Mordekai Ester n yele se'em la, 13te Mordekai me lebehe yele ba yeti, ta yele ya Ester yeti, 14Da tɛn'ɛha te hom boe naba nu'uhen la zuo, ba han koora Yudoma la hom kan pa'ahɛ. Ho han sina saŋkana wa, faanrɛ la vo'ohogo wan doohe zen'an wa'an Yudoma wa zuo na ge hom Ester, la ho sɔ buuri la zan'an wan nyɛ sagaŋɔ. Ane n mi' daanse'ere yele dena wa zuo te ho nyɛ fole dɛna naba pɔgɔkeema wa! 15Te Ester nya lebehe yele Mordekai yeti, 16Han dɛna bala, ihege saazuo la ho doohe lagahɛ Yudoma la woo n kɛn'ɛre Susa teŋa poan wa la, te ya zagahɛ ya mɛhe bo mam ya da nyu bii ya di dia yu'uŋɔ la wontɛɛŋa zan'an da baha atan'. Mam la n pɔsɔɔrɔ la me wan zagahɛ to mɛhe bala mea. Bala han tole la mam pon ka tara sore te n kɛn' naba zen'an la n wan kɛn' n han wan ki, n ki. 17Te Mordekai me seren ihege saazuo enŋɛ wo Ester n yele en se'em la.

will be added

X\