Ester 1

1Yele ana wa eŋɛ la Ahasurus saŋa la poan, Ahasurus yuun dela naba beha teŋhe kɔbega la pihiyi' la seyopɔe, te a sɔ'ɔlom la ze'ele India teŋa tɛnregɛ ta ta' Kus teŋa, 2te a zin'an a na'am gɔŋɔ la zuo Susa. 3A na'am dia yuuma atan' poan te a dogɛ dia eŋɛ de'eŋɔ bo a nabiihe la a yamehe, ge yi' Persia la Media teŋhe kpɛ'ɛndoma, te a mɛŋa teŋa nabiihe la a nɛrezura la woo lagahɛ na bɔna a nɛŋan. 4Te a dekɛ dabeha kɔbega la dabeha pihinii sɔrom pa'alɛ a na'am la paŋa la a tarega. 5Dabeha ana wa n ta ba'ahɛ la, te naba wa de'em dabeha ayopɔe de'eŋɔ a vo'ohogo zen'an la poan bo a teŋa Susa nɛreba woo, naha ta paara dakanrɛ. 6A yire vo'ohogo zen'an la poan la, ba dekɛ la tanpɛɛlsoma la tanmɔlɔsoma te ba dekɛ tama n ane baanlehe lo' ba nɔya la, nya lo' sanlenpeelega banhe n fere zɛnya la poan. Ge te sanlema la sanlenpeelega ma'an te ba dekɛ maalɛ kɔgɔdɛlehe, te to zɛ'a dɔlɔga zen'an la te ba dekɛ kuguponpɔntɔ la kugasaala n pɔrehɛ yema yema maale la zen'an woo kae. 7Te ba tara sanlema lɔgɔrɔ yema yema tɔnta nadoma daam, te daam buge te ba tara sanlema wama te ba golɛ ayema ayema, yoora daam la tɔnta. 8Naba la n daa bo nɔse'ere doohe daam la nyua poan dela nyu hom bote se'em. Ge bo a tontoneba sɛba woo n behere dia tooma a yire la poan la nɔɔrɛ yeti, Eŋɛ ya nɛra se'em woo n bote sɛla woo bo ya en. 9Te Vasti n de naba la pɔga la me eŋɛ de'eŋɔ la dia me bo pɔgɔhe la me ba tɔka naba Ahasurus yire mea poan. 10Dabeha ayopɔe la poan, te daam la nya zom naba Ahasurus te a bo nɛrekanreba bayopɔe la n boe a nɛŋa tona bɔ'ɔra en la nɔɔrɛ, ba dela Mehuman la Bizta la Harbona la Bigta la Abagta la Zetar la Karkas. 11Te ba keŋɛ ta bahɛ te naba pɔgɔkeema dekɛ a naba pɔga fuo yɛ, la a dekɛ a sandoma bɔbɔga vuge la a wa'an a nɛŋan na, la a dekɛ a soŋa la pa'alɛ nɛrekooŋɔ la la kpɛ'ɛndoma la n boe la woo, se'ere n sɔe pɔka la daa seren ba' som mɛ. 12Ge naba nɛrekanreba wa n tare naba nɔɔrɛ la wa'ana bo naba pɔga Vasti la, Vasti daa ka to'e de bala a keŋɛ. Te la daam naba la te a suunre nyie gaŋɛ. 13Teŋa la malema n de se'em dela naba ta'an soka nɛra doohe la teŋa ze'elego n de se'em yɛla a se'a poan la sɛla n sone te la tom. Bala zuo te naba la nya yi sɛba n de yamdoma. 14Ge nyɛta liligere, ge me dɛna sɛba n lɛm n ba dela Karsena, la Setar, la Admata, la Tarsis, la Meres, la Marsena, la Memukan; nɛrebana bayopɔe ze'ele la Persia la Media teŋhe poan na, ba dela naba mɛŋa nɛresoma ge me dɛna sɛba n de kpɛ'ɛndoma kanra gana kpɛ'ɛndoma woo teŋa la poan. 15Te naba wa soke ba yeti, Yamam n behɛ teŋa wa yɛla ze'elego la poan la bene n sone te ba dekɛ eŋɛ naba pɔga Vasti? A ka nam mam naba Ahasurus n dekɛ n nɔse'ere bo yamam n nɛrekanreba te ya tare ta bo en la. 16Te Memukan ze'ele naba la, la a kpɛ'ɛndoma nɛŋan lebehe yeti, Naba pɔga Vasti tue me, a ka tue la naba ma'an, ge a tue tomam sɛba woo n de kpɛ'ɛndoma wa mɛ, la nɛresɛba woo n boe naba Ahasurus sɔ'ɔlom wa poan. 17Pɔgɔhe woo wan ba'ahom wom naba pɔga wa n eŋɛ se'em wa te ba me tɔgɔhɛ bala ka nana ba sereba ge yɛta yeti, Naba Ahasurus n pon dɛna naba ge bo nɔɔrɛ te naba pɔga Vasti wa'an a zen'an na la, a zagahɛ mɛ. 18Zina dabaherɛ wa pɔgɔhe se'ehe woo n boe Persia, la Media teŋhe wa poan dɛna nɛrekanreba pɔgɔba me yeti ba dekɛ la ete seko taaba te Vasti dekɛ eŋɛ ho wa eŋɛ ho nɛrekanreba wa woo. La nya kɔ'ɔn yeti la ana la bala yɛ'ɛha, te pɔgɔhe ka le nana ba sereba. 19Bala zuo, la han pee hom naba poorɛ, ho bahɛ te ba soolom, ge golehɛ de pa'ahɛ Persia la Media teŋa ze'elego yɛla la poan te ho mɛŋa din'ɛn nu'o bini yeti zina dabaherɛ wa yɛ'ɛha naba pɔga Vasti na'arɛ kan le malom nɛ naba Ahasurus nɛŋan. Le yɛ'ɛha, ho dekɛ a na'am tee bo nɛra se'em n nyane en pia la bowae'. 20Sɔɔleŋa kana han ze'ele hom naba wa zen'an yehe mɔɔlɛ kae ho sɔ'ɔlom wa poan mum la wan bahɛ te pɔgɔhe zɔta ba sereba, pɔhɛ naha ta paara bontata. 21Te potɛ dena wa pee naba la, la a nɛrekanreba la suunre, te a eŋɛ wo Memukan n pa'alɛ se'em la. 22Te a tom nɛreba te ba tara buuri woo la de gɔŋɔ, la buuri woo la de yetɔgom te ba golehɛ enŋ bini, ge tɔgɔra pa'ala buuri woo de yetɔgom poan te boraa woo dɛna paŋadaana a yire poan ge sɔna de behera.

will be added

X\