Efɛɛzɩ 5

1Bala, yan diŋɛ dɛna Yenɛ kɔma sɛba te a nɔŋɛ la, la sontii ya ana wo enŋa n an se'em la. 2Ya tara nɔŋerɛ wo Krista n daa nɔŋɛ to se'em ge ki to zuo, wo kaanbegɔ bo'olom n tare nyuŋo soŋɔ bo Yenɛ. 3Bala, yan kelom diŋɛ dɛna Yenɛ nɛreba wa, la ka nare te ya tɔgɔra yalom yetɔgom, bii yelese'a n de dɛngerɔ, bii nyika. 4La me da tɔgɔra yelenyalehe, bii yetɔgom sebo n ka tare vɔnrɛ, bii yelese'a n ka nare nɛra tɔgɔra. Ge, la ton sona mɛ te ya pɛngera Yenɛ. 5Ya mɛhe mi' soŋa soŋa te nɛra se'em n tone yalomtooma, bii eta yelese'a n de dɛngerɔ, bii nyigera kan ta'an bɔna zen'sɛka te Krista la Yenɛ sɔna behera la. Nyika la dela baga kaanbegɔ. 6Ge, da bahɛ ya te se'em dekɛ yetɔgɔyooro pan'ahɛ ya. Te la dela yele ana mɛŋa zuo te Yenɛ wan namehɛ nɛresɛba n ka nane en la. 7Bala, da tare ya yelese'ere te ya eŋɛ la nɛre bama taaba. 8Ge yamam mɛhe daa nan boe lika poan. Ge yan nya de Na'ayenɛ nɛreba la, ya nya boe la nɛɛhom la poan. Bala, ya bɔna wo nɛresɛba n de nɛɛhom n boe se'em la. 9Ho dɛna nɛɛhom vɔnrɛ dela ho eta yelese'ere woo n ane soŋa, ge dɛna tontɔɔ, ge me dɛna yelemɛŋɛrɛ. 10Kpeŋe ya ya mɛhe la ya zamehe ya sɛla n ete Na'ayenɛ suunre nyɛlom. 11Da tare ya yelese'ere te ya eŋɛ la yelese'a n ka tare vɔnrɛ te nɛreba eta. Yele aŋa dela lika poan yɛla. Ge ton bahɛ ya nɛɛ peelome na. 12La de vi' te ho tɔgɔra yɛhera yelese'a te nɛreba sogora eta la yele 13Ge sɛla woo han ta wa'an nɛɛhom la poan na, nɛreba wan nyɛ' la ba nini ban seren ane se'em. 14Te nɛɛhom n de sɛla n bahere te nɛra nyɛta sɛla woo la a nini. Bala n sɔe, te ba yeti, Be'em daana wa, ihege. Han dagana bala, la wan sagom hɔ, wa'ana te Krista fan' hɔ. 15Dene poan, tare ya mɛŋa soŋa soŋa yɛhera ya bɔŋa poan. Da bo ya wo nɛresɛba n ka mi' sɛsɛla la, ge boe ne ya wo nɛresɛba n tare yam la. 16Ya han nyɛ' sose'ere woo, dekɛ ya dɛ tom toonsonɛ. Se'ere n sɔe la, Tomam saŋa wa, nɛreba tona toonfɛn'ɛha. 17Bala, da de ya gɔɔnɔ, ge ton kpeŋe ya ya mɛhe mina sɛla te Na'ayenɛ bɔta ya te ya eta. 18Da de ya daamnyuureba, te bala sagom ne ya me. Ge ton bahɛ ya te Yenɛ Sea kɔ'ɔn tona la ya. 19Tare ya pɛnka yooma, Yenɛ baaŋa la toolom yooma yɛla tɔgɔra bɔ'ɔra taaba, yoone ya pɛnka yooma woo ya suunre poan pɛngera Na'ayenɛ. 20Po'ohe ya to Sɔ enɛ yelese'ere woo poan to Na'ayenɛ Yesu Krista paŋa poan. 21De ya sɛba n wan nana taaba yan bo'ore Krista na'ahegɔ la. 22Pɔgɔhe, nane ya, ya sereba wo yan nane Na'ayenɛ se'em la. 23Sera n de zuodaana a pɔga zen'en wo Krista me n de zuodaana lagaŋɔ la poan se'em la. Krista mɛŋa n de lagaŋɔ n de a iŋa la faanra. 24Bala, pɔgɔhe kɔ'ɔn nana ba sereba sɛla woo poan wo lagaŋɔ kɔ'ɔn nana Krista se'em la. 25Dene mea, yamam sereba me, ya nɔŋɛ ya pɔgɔba wo Krista n daa nɔŋɛ lagaŋɔ la se'em ge ki' ba zuo la. 26Krista daa eŋɛ dena wa te a bahɛ mɛ te lagaŋɔ la dɛna Yenɛ ma'an dene, doohe la yelehom la poan, la en pee ko la ko'om ba'ahɛ. 27A daa eŋɛ dena te a dekɛ lagaŋɔ la mɛ la ko soŋa zan'an bo a mɛŋa. Te ko dɛna fa'a da tara dɛnkɔ bii tuure, bii ŋmɛlema, bii ganleŋɔ. 28Bala mea, boraahe nɔŋɛ ba pɔgɔba wo ban nɔŋɛ ba mɛhe iinhe se'em la. Se'em n nɔŋɛ a pɔga me nɔŋɛ a mɛŋa mɛ. 29Nɛra ka boe ka nɔŋɛ a mɛŋa iŋa. A daana n wan to eŋɛ se'em dela a wan diiha a mea mɛ gee me beha a mea soŋa soŋa wo Krista n ete se'em bɔ'ɔra lagaŋɔ la. 30Se'ere n sɔe la, tomam me lagom dɛna la a iŋa la loga a se'a. 31Ge, ba golehɛ Yenɛ gɔŋɔ la poan yeti, Yele dena wa zuo, boraa wan bahɛ a sɔ la a ma ge dekɛ ka mɛŋa naɛ boyena la ka pɔga, te ba bayi' lebege boyenɛ. 32Yele dena wa dela yelekantɛ n sogɛ ge mam dekɛ dɛ tɔgɔra makara mɛ la Krista la a lagaŋɔ la. 33Ge dena wa, dekere bɔ'ɔra la yamam mɛ te sera woo nɔŋɛ a pɔga wo n nɔŋɛ a mɛŋa se'em la. Te pɔka woo mɛ na'ahe ka sera.

will be added

X\