Efɛɛzɩ 4

1Dene poan, mam Paul se'em te ba pagɛ te n tona Na'ayenɛ tooma zuo la yete ya mɛ la ninmɔ'ɔrɛ. Bahɛ ya te ya bɔŋa dɛna bɔŋsɛka n makɛ la Yenɛ n yi' ya se'em la. 2Sirihe ya ya mɛŋa ge dɛna na'ahegɔ nɛreba ge me tara suguru daarɛ woo. Ge da ihegera suunre tɔtɔ la taaba nɔŋerɛ zuo. 3Yeregɛ ya mɛ la ya tara nɔyenɛ la te Sea la bɔ'ɔra doohe la sunma'ahom sebo te ya tara la. 4Se'ere n sɔe la, iŋa kayena ma'an n boe, Sea kayena la potɛn'ɛrɛ deyena te to gura. 5To tare la Na'ayenɛ ayena ma'an la sakerɛ deyena me ma'an, la ko'om soa boyena me ma'an. 6Yenɛ ayena dɛna nɛre woo Sɔ, tona sɛla woo ge sɔna sɛla woo. 7Ge bala zan'an, Yenɛ bo to woo mɛ zo'ohogɔ wo Krista n yelehe bo'olom mɛŋa se'em la. 8Dene n sɔe, te ba golehɛ Yenɛ gɔŋɔ la poan yeti, A zom zoore la mɛ la nyaŋere te yamehe zo'e zo'e dɔla a poore, te a bɔ'ɔra nɛreba bo'olom. 9Lan yeti, N daa zom saazuo saazuo ha la, vɔnrɛ dela bem? La vɔnrɛ dela yia a daa sige la teŋa teŋa, teŋa wa zuo na. 10Bala, se'em n sige teŋa wa zuo na, n kelom dɛna se'em n zom saazuo saazuo ha, ta gaŋɛ sɛla woo n boe bilam ha. A eŋɛ bala, te a ta'an sɔna sɛla woo n boe teŋa wa zuo la sɛla woo n me boe saazuo ha la. 11La dela enŋa bo nɛreba bo'olom. A daa loe nɛreba te ba dɛna a tontoneba, te sɛba me dɛna nɔtɔgɔheba, sɛba me dɛna a yehe mɔɔladoma, sɛba me dɛna Yenɛ yire duŋkeema la pa'aleba. 12A daa eŋɛ dena wa, te a maahom la Yenɛ nɛreba la woo te ba tom a tooma. Te a mɛ' lagaŋɔ la n de Yesu Krista iŋa la, 13to zan'an wan wa'ana dɛna boyena to sakerɛ la la ton mi Yenɛ Dayɔa la se'em la. To wan bi'e ta paɛ Krista naanɛ n ane se'em. 14Ge te lagaŋseko n dole Yesu sore la han ta zo'e bala. To kan le dɛna kɔma te ponpan'ahom doma la pa'alegɔ la nigiŋɔtooma ziira wo ko'mi'inhe, bii sabebego kaara zen'en woo. 15Te ton dɛna la bonkoteba ge me wan ta tɔgɔra yelemɛŋɛrɛ nɔŋerɛ zuo, to wan zo'e sɛla woo poan paɛ Krista se'em n de zuodaana la. 16Enŋa n de zuo iŋa la poan ge te to mam me dɛna iŋa la logoha yema yema. Ge iŋa la nyɔkɛ la taaba dɛna iŋyeŋɔ te ko logoha yema yema la me tona ba tooma. Bala me, tomam me tare la nɔyenɛ ge zɔ'ɔra ton tare nɔŋerɛ bɔ'ɔra taaba la zuo. 17Bala, Na'ayenɛ paŋa poan, n yeti ya dena wa la ninmɔ'ɔrɛ, te ya da le bone ya wo sɛba n ka nane Yenɛ n bo se'em la. Sɛla te ba tɛn'ɛha la ka soŋore ba. 18Se'ere n sɔe la, ba potɛn'ɛra boe lika poan, te ba me ka tara Yenɛ vom la ban zagahɛ en mɛ ge me ka zamehɛ sɛla te a pa'alɛ ba la zuo. 19Dena mea zuo, ba ka tare valom la fiin me. Be'em tooma ma'an te ba kɔ'ɔn nɔŋɛ ba eta ge tona yelese'a n ka nare. Ba kelom kɔ'ɔn bɔta te ba tona la yele ana. 20Ge han dɛna yamam, la daa dagɛ la yele ana taaba te ya daa zamehɛ yɛhera Krista yele. 21Yelemɛŋɛrɛ, ya wom Krista yele. Ba me pa'alɛ ya yelese'a n de yelemɛŋɛrɛ Yesu poan wo yan de a dɔlɔba la. 22Bala, bahɛ ya nɛrekɛka la n daa bahɛ te ya bɔna yan bote se'em la. Nɛrekɛka sɛka koŋkoma'ahom n daa sagone ka la. 23Tee ya suunre la ya tɛn'ɛseto te ya tara yia saŋa la ge nya bɔna bɔŋsɛka n ane soŋa nananawa. 24Tee ya nɛrepaalega la te Yenɛ naam ka te ka wɔna la en la yɛ. Nɛrepaalega wa nɛɛre ka mɛŋa la tontɔɔ la toolom vom poan. 25Dene poan, da le parone ya. Nɛra woo yɛta yelemɛŋɛrɛ bɔ'ɔra a sɔɔn. Se'ere n sɔe la, to zan'an lagom dɛna la boyena Krista iŋa la poan. 26Ho sunsunya han nyie, da bahɛ te bala bahɛ hɔ te ho tom be'em. Da me bahɛ te ho sunsunya kɔ'ɔn nyie bala yɛ'a yenlore. 27Da bahɛ te Sagona la nyɛ' sore ho zen'en. 28Se'em n daa zuunre a bahɛ zunwa ge tona. A han tona bala, a wan diiha a mɛŋa ge me soŋora sɛba n ba soŋɛ ba. 29Ya han tɔgɔra, da bahɛ ya te yetɔgom sebo n tare be'em kena na bɔna ya yetɔgom la poan. Tɔgɔre ya yetɔgom sebo n tare soŋorɛ bahera te nɛreba zɔ'ɔra soŋa soŋa nyɛta sɛla te ba tara. Bala, te sɛla te ya tɔgɔra la wan tara soŋorɛ bɔ'ɔra sɛba n kelehere ya la. 30Da nyiihe ya Yenɛ Sea la suunre. Se'ere n sɔe la, Yenɛ Sea la n de a danlehom pa'ala te enŋa Yenɛ n sɔe ya gura te de daarɛ la han paɛ a wan fan' ya bahɛ. 31Bahɛ ya tɛn'ɛbe'ero la pototɛn'ɛhegɔ la sunsunyiim. La ka nare te ya le nyabera bii toora se'em. La me ka le sona te ya tɛn'ɛha tɛn'ɛseko woo n yare nɛra se'em. 32Ge, ton de ya sɛba n wan soŋora taaba ge eta sɛla n an soŋa bɔ'ɔra taaba. De ya sɛba n wan dita suguru bɔ'ɔra taaba wo Yenɛ n di' suguru bo ya se'em Krista zuo la.

will be added

X\