Efɛɛzɩ 3

1Te dene mea zuo mam Paul se'em te ba pagɛ Krista Yesu zuo yamam sɛba n dagɛ Yudoma zuo la, n sohore la Yenɛ. 2Ge mam mi' te ya seren wom te Yenɛ n ete som bɔ'ɔra nɛreba la zuo, te a bo mam toondena wa te n tom ya mam som zuo. 3Yenɛ daa nɛɛ pa'alɛ mam te n mina a yelese'a te asaala ka ta'an mina a la. N golehɛ sɛla fiin wa yɛhera a yɛla. 4Ya han kan'anlɛ sɛla te n golehɛ bo ya la, ya wan baŋɛ mam bɔkɛ Krista yelese'a te asaala kan ta'an mina a la. 5Yuuma yuuma ha la, Yenɛ ka yele yɛla la bo nɛreba la. Ge nananawa, a nɛɛ a bo Yesu tontoneba la la nɔtɔgɔheba la yɛhera la a Sea la poan. 6Yɛla la dela ana wa, yelesoma la poan, sɛba n dagɛ Yudoma la me lagom tara tɔntɛ la sɛba n de Israeldoma la yɛhera Yenɛ som la poan mɛ. Ba me le lagom bɔna la lagaŋɔ koyema mea me poan, ge me tara ba tɔntɛ yɛhera Yenɛ n biŋe a nɔɔrɛ doohe Krista Yesu poan. 7La dela Yenɛ zo'o'hogɔ bo'olom sebo n boe deyema la te mam dɛna yameŋa bo yelesoma la. Dena wa daa de bala yɛhera la enŋa Yenɛ mɛŋa paŋatooma poan. 8Yenɛ nɛresɛba woo n pɔ'ɛ la, mam me n le sahɛ pɔ'ɛ bama me poan. Ge bala zan'an, Yenɛ bo mam sore te n mɔɔlɛ yelesoma la yɛhera yelese'a n boe Krista zen'en ka tara magahegɔ la bo sɛba n dagɛ Yudoma la. 9Ge la n me le bahɛ te nɛra woo baŋɛ Yenɛ tooma n wan ana se'em yɛhera a yelese'a te asaala kan ta'an mina la. Yenɛ se'em n naam sɛla woo la daa ka nɛɛ yele ana wa bo nɛreba yuuma yuuma n tole ha. 10A yuun eŋɛ bala te nananawa, a ta'an bahɛ te lagaŋseko n dole Yesu sore la bahɛ mɛ te sɛba n de kpɛ'ɛndoma la zuodoma bɔna saazuo ha ta'an mina Yenɛ yam la n boe tɔka tɔka se'em woo la. 11Ge Yenɛ n tɛn'ɛhɛ se'em yuuma yuuma ha la kelom kɔ'ɔn dɛna la bala nananawa te a nyaŋɛ eŋɛ dena wa yɛhera Yesu Krista to Na'ayenɛ poan. 12To bɔŋa Yesu poan la to sakerɛ poan, sore boe bo to te to keŋɛ Yenɛ zen'en te sɛsɛla ka bɔna wan ta'an gu' to te dabeem tara tɔ. 13Dene poan, n bene ya mɛ, te ya da bahɛ te la daana ya la mam nyɛte namehegɔ ya zuo la. La dela ya nyɛ' pɛnka zuo te n nyɛta namehegɔ la bala. 14Dene mea zuo, mam dɔnbelɛ teŋa mɛ to Sɔ Yenɛ nɛŋa. 15Enŋa n de sɔ bo yiredoma sɛba woo n boe saazuo ha la teŋa wa zuo. 16Mam sohore te Yenɛ se'em pɛnka n ka tare magahegɔ la wan bo ya paŋa yɛhera a Sea la poan te ya ta'an sɛ' ze'ele ya sakerɛ ya suunre poan. 17Ge te ya sunya me wan dɛna zen'an te Krista wan bɔna yɛhera ya sakerɛ a sore dɔlɔga la poan. Mam kelom sohora mɛ te ya nyɛga la ya ɛnberɛ wan sɛ' nɔŋerɛ poan. 18Bala, te yamam la Yenɛ nɛreba la woo wan ta ta'an bɔkɛ Krista nɔŋerɛ la yaleŋa la bo ko'olom ane se'em. 19Yelemɛŋɛrɛ, nɛra nare te a ta'an baŋɛ a nɔŋerɛ la zan'an zan'an. Ge ya han baŋɛ dɛ ya wan kɔ'ɔn tara Yenɛ ya zen'an. 20Dena wa dela paŋsɛka n boe to poan n tone yɛla kekeko bɔ'ɔra tɔ gana sɛla te to sohora a zen'en, bii tɛn'ɛha la. 21Pɛnka dɛna Yenɛ n boe lagaŋɔ la poan la Krista Yesu dene saŋa woo. Taarɛ.

will be added

X\