Efɛɛzɩ 2

1Ge yia saŋa la, ya ka tare vom, te ya daa nan ka nane Yenɛ nɔɔrɛ ge daa tona be'em zuo, ge nananawa Krista nya bo ya vom. 2Bala ma'an la, ya daa nan dole tona la be'emtooma teŋa wa zuo. Ya daa nan nane la Dima la n sɔ'e panhe behera la nɔɔrɛ. La zina wa mɛ panhe sena wa mɛ n kelom tara sɛba n ka nane Yenɛ la ba suunre poan. 3Yelemɛŋɛrɛ, to zan'an daa ane wo bama n ane se'em eta sɛla te to mɛhe suunre bɔta la. To daa tare to iinhe wa eta la sɛla te to mɛhe suunre bɔta. To mɛhe me daa lagom dɛna la boyena la nɛresɛba te la daa nara te ba nyɛ' Yenɛ namehegɔ la. 4Ge Yenɛ zɔ' tɔ ninbɔn'ɔn, ge me nɔŋɛ tɔ. 5Tomam n daa nan ki' to sea poan doohe tomam n ka nam la zuo Yenɛ bo to vom doohe la Krista poan, la dela Yenɛ zo'ohogɔ zuo te to nyɛ faanrɛ. 6To bɔŋa Krista Yesu poan, enŋa Yenɛ daa bahɛ te to daa wona te to lagom le vo'e to kum poan mɛ la Krista. A daa eŋɛ tɔ bala te to lagom la Krista zin'an la Yenɛ sɔna sɛla woo behera. 7A daa eŋɛ bala te a pa'alɛ saŋa woo n kena a zo'ohogɔ la n ka tare makere n ane se'em, doohe la a nɔŋerɛ te a tara bo to Krista Yesu poan la. 8La dela Yenɛ zo'ohogɔ la zuo te ya nyɛ' faanrɛ doohe la yan nam la zuo. Dena wa dagɛ la ya mɛŋa etegɔ, ge la dela Yenɛ bo'olom. 9La dagɛ la ya mɛŋa tone te se'em wan ŋmɛ' nyɔn'ɔn. 10Yenɛ n eŋɛ tɔ ton de sɛba wa, to bɔŋa Krista Yesu poan, a naam tɔ te to tona toonsoma se'a te a pon maahom te to tona. 11Yamam sɛba sɔdoma la ya madoma n dagɛ Yudoma, la nare ya tɛnra dena wa, Yudoma behera ya te ya de'a la sɛba n ka ŋma' ge ton behera ba mɛhe te bama dela sɛba n ŋma'. Ge ŋmaa dela sɛla te nɛreba eta bɔ'ɔra ba iinhe. 12N bote ya tɛnra la yan daa nan ane se'em yia la. Bala ma'an ha la, ya daa nan ka dekɛ ya mɛhe bo Krista. Ya daa nan dela saama ge daa nan ka lagom dɛna nɛresɛba te Yenɛ loe la. Ya daa nan ka boe Yenɛ nɔbiŋere la te a biŋe bo a nɛreba la poan. Ya bɔŋa teŋa wa zuo, ya daa ka mi' sɛla te ya wan sakɛ ya suunre poan gura. Ya me daa ka mi' Yenɛ. 13Ge nananawa, ya bɔŋa Krista Yesu poan, Yenɛ nya tare yamam sɛba n daa zaan a zen'en la lɛm mɛ na Yesu ziim la zuo. La dela Krista n ki' la poan te a tara ya te ya lɛm en bala. 14Se'ere n sɔe la, Krista mɛŋa bahɛ tɔ te to tara sunma'ahom yɛhera la enŋa n bahɛ te sɛba n de Yudoma la la sɛba n dagɛ Yudoma nya dɛna nɛra yene la zuo. A sagom sɛla n gu'ure ge bahera te ya dɛna diŋdoma la taaba la la a kum la poan. 15A saalom pa'alegɔ la la ko ze'elego la ko malema zan'an mɛ. A eŋɛ dena wa te a ta'an bahɛ mɛ buuri bayi' wa dɛna buuri deyena bɔna enŋa poan. Etekona wa poan te a daa bahɛ te nɛreba tara sunma'ahom. 16Krista n daa ki' punpuuredɔɔ zuo la daa dela sɛla n sagom sɛla n daa bahɛ ya te ya dɛna diŋdoma la. N daa ki' punpuuredɔɔ zuo la daa le kelom bahɛ mɛ te a ta'an dekɛ buuri bana bayi' la te ba naɛ taaba dɛna buuri deyena. A daa eŋɛ ba bala ge nya tare ba mɛ lebe Yenɛ zen'en na. 17Bala Krista wa'ana mɔɔlɛ la yelesoma yɛhera sunma'ahom yele bo nɛra woo. A mɔɔlɛ dɛ bo yamam n daa zaan Yenɛ zen'en la. A me kelom mɔɔlɛ dɛ bo yamam n daa lɛm Yenɛ la. 18Te la dɛna Krista poan te to zan'an, to sɛba n de Yudoma la to sɛba n dagɛ Yudoma ta'an wa'an to Sɔ Yenɛ zen'en na yɛhera a Sea la poan. 19Dene poan, yamam sɛba n dagɛ Yudoma ka le dɛna saama. Ya nya dɛna la Yenɛ nɛreba bɔna Yenɛ buuri la poan. 20Yamam mɛ dela sɛba te ba nya dɔgɔle ɛnberɛ la te Yesu tontoneba la la nɔtɔgɔheba la ɛɛnbɛ la zuo, te Yesu mɛŋa dɛna ɛnberɛ la kugure la. 21Magahɛ wo ɛnberɛ n ane se'em bo yire la, bala me te enŋa Yesu me gorɛ ya woo bɔberɛ yenɛ bii bahɛ te ya de'a nɛresɛba n zo'ore sɛ' ze'ele ana wo Yenɛ Toolom Yire la. 22Ya bɔŋa Yesu poan, yamam me lagom mɛ la nɛrebana woo wo yire la ge te Yenɛ nya dɛna se'em n boe bini yɛhera a Sea la paŋa poan.

will be added

X\