Efɛɛzɩ 1

1Mam Paul se'em te Yenɛ bɔta te n dɛna Krista Yesu tontoneba la yema la n golehɛ gɔŋɔ wa. N golehɛ bɔ'ɔra la Yenɛ nɛreba la n boe Epesus teŋa poan ge me dɛna birikindoma ba bɔŋa Krista Yesu sore dɔlɔga poan la. 2To Sɔ Yenɛ la Na'ayenɛ Yesu Krista wan eŋɛ ya som ge bahɛ ya te ya tara sunma'ahom. 3Bahɛ ya te to bo Yenɛ n de to Na'ayenɛ Yesu Krista Sɔ la fara. Se'ere n sɔe la, to bɔŋa Krista poan, Yenɛ kan' kan'somɔ bo to. A eŋɛ dena wa yɛhera la bo'olom sebo woo n ze'ele saazuo ha na te a Sea bo to la. 4Ge Na'ayenɛ yuun pon lo'e to mɛ te to dɛna a nɛreba to bɔŋa Krista poan. A yuun eŋɛ dena wa mɛ ge yuun nya baŋɛ naam teŋa wa zuo. A yuun eŋɛ bala te to ta'an bɔna bo la enŋa ma'an ge me da tara tuure a nɛŋa. N nɔŋɛ tɔ la zuo, 5te a yuun pon eŋɛ a potɛn'ɛrɛ te Yesu Krista poan, a wan tare tɔ wa'an a zen'en na te to dɛna a kɔma. Dena wa n yuun de sɛla te a bɔta ge me yuun tɛn'ɛhɛ te la ana soŋa te a eŋɛ. 6Bala bahɛ ya te to bo Yenɛ fara la a zo'ohogɔ kantɛ la te a dekɛ bo to zaŋa doohe la Se'em n nɔŋɛ poan. 7Te la dela Krista n daa ki' te a ziim ka'ɛ na la zuo te Na'ayenɛ fan' to bahɛ wa. Dena wa vɔnrɛ dela Na'ayenɛ bahɛ to yelebe'ero bo to. Bala, behɛ ya Yenɛ zo'ohogɔ n zo'e se'em, 8te a dekɛ bo to bo ka tara makere. Yenɛ yam la a mi'ilom poan, 9te a eŋɛ a potɛn'ɛrɛ te a eŋɛ la. A me bahɛ tɔ te to mina yelese'a te nɛreba ka mina a la. A pon daa eŋɛ a potɛn'ɛrɛ te a eŋɛ sɛla woo ba'ahɛ doohe la Krista poan. 10Yenɛ n tare a potɛn'ɛrɛ te a eŋɛ sɛla woo zan'an zan'an ba'ahɛ dela daanse'ere daarɛ te a bɔta la han paɛ, a yete a tare la sɛla woo te a naam la wa'an bɔberɛ yenɛ na. Sɛla te a naam saazuo ha la la teŋa wa zuo wan wa'an bɔberɛ yenɛ na ge te Krista dɛna zuodaana sɔna behera. 11Yenɛ ete sɛla woo yɛhera la a mɛŋa n tɛn'ɛhɛ bɔta te de eŋɛ se'em la se'em. Enŋa Yenɛ n loe to te to bɔŋa Krista poan, to dɛna a mɛŋa nɛreba. Dena wa dela enŋa mea n tɛn'ɛhɛ de bala bɔta de pin'ileŋɔ ha na. 12Dene poan, bahɛ ya tomam sɛba n de yiadoma sakɛ to sunya poan bo Krista la, pɛngɛ Yenɛ paŋa wa. 13Ban daa mɔɔlɛ yelemɛŋɛrɛ yetɔgom la n de yelesoma bahera te nɛreba nyɛta faanrɛ te yamam me daa wom la, ya daa sakɛ bo Krista. Na'ayenɛ nya bo ya la a Sea la te a daa pon biŋe a nɔɔrɛ te a bo ya la pa'ala te enŋa n nya sɔe ya te ya dela a mɛŋa nɛreba. 14A Sea la n de se'em n ze'ele bo to pa'ala te to nyɛ' faanrɛ la te Yenɛ biŋe a nɔɔrɛ te a bo a nɛreba la. Dena wa n bahɛ te to mina soŋa soŋa te Yenɛ wan fan' sɛba n de a nɛreba la zan'an zan'an bahɛ. Bala, to pɛngɛ ya a paŋa wa. 15Ge n daa wom ya sakerɛ Na'ayenɛ Yesu sore dɔlɔga poan la n ane se'em, la yan me tare nɔŋerɛ se'em bɔ'ɔra Yenɛ nɛreba la woo la. 16Bala n sɔe, te n kɔ'ɔn bɔ'ɔra Na'ayenɛ fara saŋa woo ya zuo. N tɛnre ya yele la bala n po'ohegɔ poan, 17ge me sohora to Na'ayenɛ Yesu Krista Yenɛ eŋɛ la n de Sɔ ge dɛna paŋadaana la te a bahɛ te a Sea la bo ya yam, ge bahɛ te Yenɛ nɛɛ a mɛŋa bo ya te ya ta'an mina en. 18N me kelom sohora en te a bahɛ ya te ya mina soŋa soŋa ya potɛn'ɛra poan yɛhera sɛla te a yi' ya na te ya sakɛ ya sunya poan gura la. Ya me wan kelom bɔkɛ faanrɛ seko n ka tare makerɛ ze'ele saazuo na te enŋa Yenɛ biŋe a nɔɔrɛ te a bo a nɛreba la. 19Le yɛ'ɛha me, ya wan bɔkɛ a paŋa n ane se'em te a tara tona la to sɛba n sakɛ bo Krista la. Paŋkana wa n boe to zen'en wa dela boyena la paŋsɛka n gane zan'an, 20te enŋa Yenɛ daa dekɛ bahɛ te Krista le vo'e a kum poan la. Ge bahɛ en te a zin'ire a zuɔ saazuo ha. 21Krista n de zuodaana sɔna sɛba woo n boe saazuo ha dɛna zuodoma, la kpɛ'ɛndoma, la panhedoma, la daandoma behera. Enŋa kelom sɔna sɛla woo te nɛreba behera te la tare kpe'eŋo teŋa wa zuo la teŋsɛka te Yenɛ yeti a ta naam pooren te to bɔna bini la. 22Yenɛ dekɛ sɛla woo eŋɛ la Krista nu'uhen ge me loe en te a dɛna zuodaana sɛla woo poan lagaŋseko n dole enŋa Krista sore la. 23Lagaŋɔ la dela Krista iŋa la, te Krista paŋa pirɛ lagaŋɔ la poan. Te Krista bɔ'ɔra sɛla woo vom.

will be added

X\