Pa'ala 9

1Te mam behɛ yele ana wa woo, ko bo n mɛŋa yeti, tontɔɔdaana, la yamdaana, la ban ete sɛla boe la Yenɛ nu'uhen. Ba nɔŋɛ en bii ba yaɛ en. Asaala kan baŋɛ sɛla n gan' gura en. 2Yele yenɛ n sigere ba woo zuo. Tontɔɔ la toonfɛn'ɛhadoma, som la be'em, sɛla n ka dɛngɛ la sɛla n dɛngɛ, sɛba n bo'ore kaanbegɔ bo'olom la sɛba n ka bo'ore. Lan ete nɛresoma se'em la, la ete be'emdoma la bala mea, lan ete sɛba n pɔ' nɔɔrɛ se'em la, la ete sɛba n ka pɔ' la la bala mea. 3Yelebe'o seko n boe sɛla woo n ete teŋparɛ wa zuo dela, yele yenɛ n lute ba woo zuo. Sɛla n boe dela, saaleba woo sunya perɛ mɛ la be'em, te yelese'a n ka tare vɔnrɛ bɔna ba potɛn'ɛra poan, ba vom wa poan, te ba ta ki. 4Se'em woo n vɔe tare beere potɛn'ɛrɛ mɛ. Baa vɔa nyane gbegenɛ kɛ'ɛŋa. 5Vɔpa mi' te bama wan ki, ge kum pon ka mina sɛsɛla. Kum ka tara beere yɔɔrɛ, se'em ka tɛnra ba yele. 6Ba nɔŋerɛ, ba yaarɛ, la ba nini tɛnrega zan'an tole ya, bama kan le malom tara tɔntɛ sɛla woo n ete teŋparɛ wa zuo. 7Keŋɛ ta di ho dia la nyeema, ge nyu' ho daam la sunpeelom ge wana ma'an wa te Yenɛ bo ho fole hom ete sɛla poan. 8Yɛɛra lɔgɔsonɔ saŋa woo, ge maala ho zuo. 9Dita vom nyɛlom la ho pɔgɔsɛka te ho nɔŋɛ la, ho vom yoo dabahese'a woo te Yenɛ bo ho teŋparɛ zuo wa poan, ho tɔntɛ zan'an n bala ho vom la ho namehegɔ la woo te ho namehera teŋparɛ wa zuo la. 10Ho nu'o n wan ta'an sɛla eŋɛ, eŋɛ dɛ la ho paŋa zan'an. Ge yɔɔ la poan te ho yɛ'a la, tooma bii maaheŋɔ, bii bɔkerɛ bii yam ka boe bini. 11Mam nyɛ la yele deyema te de eta teŋparɛ wa zuo. Zoa la dagɛ sɛba n tan' kanbela zoa, te zaberɛ la me dagana sɛba n tare paŋa zaberɛ, bii dia kena yamdaana zen'an na, bii tarega bɔna sɛba n mi' nu'uhen, bii sɛba n zamehe yam ma'an n tare nyaŋerɛ. La woo dela la saŋa n paɛ, la zusoŋɔ n ete la zan'an. 12Nɛra me ka mi' a saŋa n ye' se'em ma'an na. Wo zinho te yoka ne nyɔkɛ se'em la, bii niihe te ba ne bɛnrɛ se'em la, saŋa be'o bɛnte nɛreba la bala, ne nyɔkɛ ba saŋsɛka te ba ka maahom poan. 13Mam nyɛ yam yele makerɛ se'ere teŋparɛ wa zuo te de kpemehe mam dela, 14teŋbila n wa bɔna tara nɛreba fiin wa ka poan, te naba kantɛ ihege la ka nɛreba te a zabɛ la ka, nya gum teŋa la mum, ti'ira dɔtɔ kaara ka te a ta'an sagom ka. 15Te boraa bɔna teŋa la poan dɛna naha, ge dɛna yamdaana, fan' teŋa la bahɛ la a yam la. Ge se'em ka tɛɛn naha wa yele. 16Bala te mam yeti, yam gane paŋa, ge naha yam ka tare tebehom, ba ka kelehe a yelehom. 17Hom kelehe yamdaana n tɔgɔre baanlam baanlam nyane hom kelehe naba n behere geto nyabega. 18Yam nyane zaba lɔgɔrɔ mɛ, ge be'emdaana ayena ma'an sagone la som zo'e zo'e.

will be added

X\