Pa'ala 7

1Yu'urɛ sonɛ nyane kaam sebo n tare nyuŋo soŋɔ, te kum daarɛ nyana dɔgom daarɛ. 2Hom keŋɛ koorɛ yire nyane de'eŋɔ yire. Se'ere n sɔe la, kum n de asaala woo ba'ahegɔ zen'an. Vɔpa woo mi' de ba sunya poan. 3Sunsagaŋɔ nyane lɔ'ɔrɔ. Se'ere n sɔe la, nɛŋa ta'an sagom, ge te suunre pee. 4Yamdaana potɛn'ɛrɛ boe la zen'an te koonɔ bɔna, ge geto sunya boe la nyɛlom zen'an. 5La ane soŋa te ho kelehe yamdaana tanhega, nyane hom kelehe gerego yooma. 6Wo gɔn'ɔhe n boe dokɔ fehega dita tanhera se'em la, bala te gerego yelɔ'ɔrɔ ana. Wana me woo dela yoo. 7Muguhego wan bahɛ te yamdaana lebege gerego, te mu'ure gɛnta potɛn'ɛrɛ. 8Yele ba'ahegɔ nyane de pin'ileŋɔ, te suguru nyana pa'ale mɛŋa. 9Da kɔ'ɔn maahom ho suunre te ho eŋɛ suunre. Suunre dela geto denɛ. 10Da yeti wane te deemen deemen ha la ana soŋa gana zina? La dagɛ yam sokere. 11Yam han dɛna toolom lɔkɔ, la ane soŋa, ge tara yɔɔrɔ bo vɔpa. 12Yam gu'ure mɛ wo ligiri n gu'ure se'em la, ge mi'ilom la yam bo'ore ho la vom. 13Behɛ Yenɛ tooma wa, ane n wan ta'an tɛɛn sɛla te a yunre? 14Som dabeha la poan, tara popeelom, ge nɔyalegerɛ dabeha la me, mina te Yenɛ sɔe saŋkaŋa me mɛ wo kana la, bala te asaala kan baŋɛ sɛla n ye beere na. 15Mam nyɛ sɛla woo mɛ a vom dabeha yooro wa poan. Nɛra han pon dɛna tontɔɔ a ta'an wan ki kalam mɛ, te nɛra me dɛna toonfɛn'ɛhadaana, ge me yuue la a toonfɛn'ɛha la. 16Da ba' dɛna tontɔɔdaana, bii ho ba' dɛna yamdaana, ge ho wan sagom ho mɛŋa. 17Da ba' dɛna toonfɛn'ɛhadaana, da me dɛna gerego, ge ho wan ki tɔtɔ. 18La ane soŋa te ho gin' ke' ge gin' ke. Se'ere n sɔe la, se'em n zote Yenɛ wan nyaŋɛ tara ba zan'an. 19Yam bo'ore potɛn'ɛrɛdaana la paŋa n gana nadoma pia n boe teŋa poan. 20Yelemɛŋɛrɛ, tontɔɔdaana ka boe teŋparɛ wa zuo tona som kan malom tom be'em. 21Da kɛleha sɛla woo te nɛreba yɛta, ge ho wan ta wom te ho yameŋa toore hɔ. 22Ho mi' ho suunren te saŋa zo'e zo'e te hom me zɛrɛgɛ basɛba. 23Mam magahɛ yele ana wa zan'an behɛ ge yeti, Mam wan dɛna yamdaana, ge aai, yam zaan mɛ la mam. 24Sɛla n boe pon bɔna me na, sogɛ. Ane n wan ɛ nyɛ a? 25Mam lo' la n potɛn'ɛrɛ te n bɔkɛ, ge vɛɛnhɛ, ge ɛ yam wa, ge nyaŋɛ pa'alɛ toonfɛn'ɛha n de gɔɔnɛ se'em, la yelese'a n ka tare vɔnrɛ n de geretooma se'em. 26Mam n nyɛ te sɛla tɔe gana kum dela pɔgɔsɛka suunre n de bɛnregɔ la yoka, te ka nu'uhe dɛna banhe. Se'em vom n tegɛ Yenɛ nini n wan peɛn ka, ge ka wan nyɔkɛ la be'emdaana. 27Pa'ala wa yeti, Mam nyɛ la yele deyena. Mam dekere la sɛla pa'aha sɛla poan te n behɛ mam wan nyɛ sɛla. 28Mam kelom ɛɛra mɛ ge nan ka nyɛ. Boraahe tuhure poan, boraa boe bini lɔɔra, ge pɔgɔhe tuhure poan, pɔka ka boe bini lɔɔra. 29Behɛ, mam nyɛ sɛla dela, Yenɛ naam asaala la tontɔɔ, ge nɛreba mɛŋa n doohe ɛ nyaleŋɔ zo'e zo'e.

will be added

X\