Pa'ala 5

1Ho han wa'an Yenɛ yire na sigehe ho mɛŋa nam, la nyane hom kaanbere en wo gerego la. Se'ere n sɔe la geto ka mi' te bama ete sɛla dela be'em. 2Da kanbela la ho nɔɔrɛ yelese'ere, bii ho suunre tɛn'ɛhɛ yele wana kalam. Yenɛ boe la saazuo, te hom bɔna teŋa wa, da bahɛ te ho yetɔgom zɔ'ɔra. 3Potɛn'ɛrɛ zo'e zo'e bo'ore la zaanheŋɔ, te yetɔgom me zo'e zo'e dɛna yoo. 4Ho han po'olɛ nɔɔrɛ la Yenɛ, da go'om, yɔ dɛ kalam ge Yenɛ nini ka tegɛ la geto tooma. 5La ane soŋa te ho da po'olɛ nɔɔrɛ, nyana hom po'olɛ ge ka eŋɛ dɛ. 6Da bahɛ te ho nɔɔrɛ yetɔgom bahɛ te ho tom be'em, bii ho ze'ele Yenɛ tontona nɛŋan porɛ yeti, Mam daa tue mɛ po'olɛ nɔɔrɛ la. Wane te ho bahɛ te ho mɛŋa tɔgom bahɛ te Yenɛ suunre nyie te a sagom ho sɛla woo bahɛ. 7Zaanheŋɔ zo'e mɛ, te yetɔgom zo'e zo'e bɔna, ge ho han po'olɛ nɔɔrɛ, ho zɔta Yenɛ. 8Ho han nyɛ te ba muguhere taromdoma, ka ete ba sɛla n nare, zagaha tontɔɔ vom teŋsɛka poan, da bahɛ te la dɛna pakerɛ ge kpɛ'ɛma woo boe la kpɛ'ɛnkantɛ nu'uhen te sɛba me n gane bama me bɔna ha. 9Naba la n de kpɛ'ɛn sɛka n gane zan'an la, enŋa n dite teŋa la samana yɔɔrɔ la. 10Se'em n nɔŋɛ ligiri ka malom tegera ligiri, bii se'em n nɔŋɛ kekeko la yɔɔrɔ tegɛ. La woo me dela yoo. 11Lɔgɔrɔ n zo'ore se'em la, to diteba me zo'ore la bala. Lɔgɔrɔ yɔɔrɔ dela bene bo to doma la, han dagana a yeen behɛ to la a nini ma'an? 12Tontona gɔɔm dela nyɛlom, a di zo'e woo, a di la fiin woo. Ge bontata han pon di la puurɛ me'en, a kan ginhe. 13Mam nyɛ te be'em sebo n daane suunre teŋparɛ wa zuo dela, lɔgɔrɔ n lagahɛ biŋe, ta tuluge sagom bo daana la, 14bii lɔgɔrɔ n doohe sɔrɔɔ yoo ta sagom bahɛ yoo, te bo daana la han tara bia, sɛla ka yee wan dekɛ soŋɛ bia wa. 15Asaala n ze'ele a ma pooren yehe beele se'em na la, a wan le lebe la en wa'an se'em na la. A kan dekɛ sɛla a namehegɔ la poan zanlɛ a nu'uhen lebe. 16Yele dena wa me dela be'em n daane suunre. Ban dɔgɛ asaala se'em na la, a kiiri la bala mea. A nyɛ la bem a namehegɔ yoo la te a namehe la poan? 17A vom dabeha la woo poan, a dite la sonsoohe, la daaŋɔ kanra, ban'ahe la sunsunyiim. 18Mam nyɛ te la ana soŋa ge nara te asaala dita ge nyuura, ge te a nini tegɛ la a namehegɔ lɔgɔrɔ la teŋparɛ wa zuo, a dabeha fiin wa, te Yenɛ dekɛ bo en la. A yɔɔrɔ n bala. 19Se'ere n pa'ahɛ dela, Yenɛ n bo se'em lɔgɔrɔ la tarega, a ne soŋɛ en mɛ te a di to nyɛlom, te la dɛna a yɔɔrɛ, ge tara popeelom la a namehegɔ la. Yenɛ n bo'ore wana me. 20Ena daana ka tɛn'ɛhere a yuuma n tole la yele. Se'ere n sɔe la, Yenɛ bahɛ te a tona mɛ saŋa woo la nyeema a suunre poan.

will be added

X\