Pa'ala 4

1Te mam behɛ muguhego seko woo n boe teŋparɛ wa zuo. Mam nyɛ te ban muguhe sɛba la kele mɛ ka tara se'em n wan bogolɛ ba suunre. Sɛba n muguhere ba la n tare paŋa ge bama ka tare se'em n wan bogolɛ ba suunre. 2Bala te mam ko yeti, sɛba n ki la tare popeelom nyane vɔpa n vɔe wa. 3Ge se'em n nyane bana bayi' wa dela se'em n ka tabelɛ bɔna. Se'em n ka tabelɛ nyɛ be'em sebo n ete teŋparɛ zuo wa. 4Mam le nyɛ yeti, namehegɔ woo, la mi'ilom woo n ete wa dela, nini tɛnrega n boe nɛra la a tadaana teŋasoka. Dena me dela yoo, la dela sabeeo dika. 5Gerego bobe la a nu'uhe zɛ'a, ta obere a mɛŋa iŋa. 6Hom tare kunkute ma'an ge tara sunma'ahom nyane hom gumene nu'uhe seyi' nameha, zegera la sabeeo. 7Te mam le behɛ sabeeo dika wa teŋparɛ wa zuo. 8Boraa n boe ka ma'an, ka tara se'em beha, ka tara dayɔa, bii sɔɔn, ge nameha ka tara vo'ohogo. Ka malom tegera lɔgɔrɔ. Ge ka ka malom soke ka mɛŋa yeti, N ton nameha wana bɔ'ɔra la ane? N ŋmɛgera n mɛŋa wana ka dita nyɛlom wa te n bo la ane? Wana me dela yoo, sunkpɛnlega tooma. 9Bayi' nyane nɛra yene. Se'ere n sɔe la, ba tooma wan bo ba yɔɔrɔ sonɔ. 10Ayema han lu, ayema wan ve'e en ihege, ge ninbɔn'ɔn boe hom se'em n de ho ma'an, ho han ta lu, se'em ka boe wan soŋɛ hɔ. 11Le yɛ'ɛha, nɛreba bayi' han gan'an, la ane ba wam mɛ, ge hom yeti ho eŋɛ la wane gan'an ho ma'an te la ana ho wam? 12Nɛra ta'an zabɛ nyaŋɛ nɛra n de a ma'an, ge ba han dɛna bayi' a kan nyaŋɛ ba. Mi'an n ta' botan' kɔ'a tɔe mɛ. 13Bonbilipaalega n de naha ge tara yam nyane naba n korogɛ, ge dɛna gerego te ba kan ta'an kan'am. 14A ze'ele la paka deon yehe na, ba dɔgɛ en la nɔŋɔ poan, ge te a wa'ana dɛna naba. 15Mam nyɛ te nɛra woo boe la a tooma poan la ninmɔ'ɔrɛ teŋparɛ wa zuo, te mam nyɛ te bonbilipaalega me ze' bini. 16Te nɛra sɛba n dole en la ka tare kanlɛ. Ge la bala zan'an, sɛba n wa'an pooren na la ka behɛ nyɛ en. Yele dena me dela yoo, la dela sabeeo dika.

will be added

X\